PESALEME YA 8

₁Jehova, Morena wa rona, lebitso la hao le bokgabane hakakang lefatsheng lohle, wena ya beileng kganya ya hao mahodimong! ₂O theile kganya ya hao ka molomo wa bana le wa ba anyeswang ka baka la ba o lwantshang, ho kgutsisa sera sa hao le moiphetetsi.

₃Ha ke boha lehodimo la hao, mosebetsi wa menwana ya hao, kgwedi le dinaledi tseo o di bopileng, ke re: ₄Na motho keng, ha o tla mo hopola? le mora motho keng, ha o tla mo hlokomela? ₅O mo entse ya tlasana ho Modimo, o mo rwesitse kganya le boholo; ₆o mo laodisitse mesebetsi ya matsoho a hao; o beile tsohle katlasa maoto a hae; ₇dinku hammoho le dikgomo, le dibatana tsa naha, ₈le dinonyana tsa lehodimo, le dihlapi tsa lewatle, tsohle tse itsamaelang ditseleng tsa lewatle.

₉Jehova, Morena wa rona, lebitso la hao le bokgabane hakakang lefatsheng lohle!