PESALEME YA 77

₁Lentswe la ka le nyolohela ho Modimo, ke ntse ke howa; lentswe la ka le nyolohela ho Modimo; hola o ka nkutlwa! ₂Ka letsatsi la ka la matswalo ke batla Morena, ka bosiu matsoho a ka a otlolohile, a sa kgathale; moya wa ka o hana tshediso. ₃Ke hopola Modimo, ke sisa pelo; ke a nahana, mme moya wa ka o a tsieleha. (Sela.)

₄O fadimehisa dintshi tsa ka; ke sa ferekane, ke sitwa ke puo. ₅Ke hopola matsatsi a kgale le dilemo tsa boholoholo. ₆Bosiu ke elellwa dipina tsa ka, ke losa pelong ya ka, mme moya wa ka o a nahana.

₇Na Morena a ka lahla motho ka ho sa feleng? A ke ke a boela a hauhela na? ₈A mohau wa hae o se o feletse ruri? Lentswe la hae le se le kgutsitse kamehla le mehla na? ₉Na Modimo o lebetse ho utlwela batho bohloko? Bohaleng ba wona na o thibetse mehauhelo ya wona na? (Sela.)

₁₀Ka re: Se nkutlwisang bohloko, ke hoba letsoho la Mookamedi ya phahameng haesale lona ... ₁₁Empa ke tla hopola diketso tsa Jehova, ke elellwe meeka ya hao ya boholoholo; ₁₂ke tla bolela mesebetsi ya hao kaofela, ke qaqisetse diketso tsa hao.

₁₃Oho Modimo, tsela ya hao e a halalela. Modimo ke ofe o moholo, o jwaloka Modimo wa rona? ₁₄Ke wena Modimo o etsang meeka; o bonahaditse matla a hao hara ditjhaba. ₁₅Ka letsoho la hao o lopolotse setjhaba sa hao, bana ba Jakobo le ba Josefa. (Sela.)

₁₆Metsi a o bone, Modimo, metsi a o bone, mme a reketla; madiba le wona a tsukutleha. ₁₇Maru a tsurutla metsi, maru a thetheretsa; metsu ya hao ya phosetswa mane le mane, ₁₈diaduma tsa hao tsa duma hara setsokotsane, mahadima a hao a bonesa lefatshe; lefatshe la tshoha, la reketla. ₁₉Wa iketsetsa tsela lewatleng, mmila metsing a maholo, mehlala ya hao ha e a ka ya tsejwa. ₂₀Wa tsamaisa setjhaba sa hao jwalokaha ho tsamaiswa dinku, ka letsoho la Moshe le la Aarone.