PESALEME YA 74

₁Oho Modimo, o re lahletseng kamehla? Bohale ba hao bo kubellelang mohlape oo o leng modisa wa wona? ₂Hopola phutheho ya hao eo o e ruileng kgale, eo o e lopolotseng e be moloko wa lefa la hao; hopola le thaba ya Sione, eo o e entseng boaho ba hao. ₃Lebisetsa maoto a hao dithakong tse ntseng di senyehile. Sera se sentse hohle sehalalelong sa hao. ₄Bahanyetsi ba hao ba kile ba kurutla ka tempeleng ya hao, ba beile dipontsho tsa bona teng. ₅Ba eba jwaloka batho ba remakang ka dilepe boteteanong ba moru. ₆Ka dilepe le ka dinoto tsa bona, ba sentse dikgabiso tsohle tse betlilweng. ₇Ba tjhesitse sehalalelo sa hao ka mollo; ba hlompholotse, ba rapaladitse boaho ba lebitso la hao. ₈Ba itse dipelong tsa bona: A re keng re ba senye kaofela hammoho! Ba tjhesitse naheng ena nqalo tsohle tsa Modimo moo ho phuthehelwang teng. ₉Ha re sa bona dipontsho tsa rona; ha ho sa le moporofeta, ha re sa na motho ya ka tsebang hore na ho tla ba jwalo ho isa kae.

₁₀Oho Modimo, sera se tla re soma ho isa kae? A sera se tla nyefola lebitso la hao kamehla na? ₁₁O honyeletsang letsoho la hao, letsoho la hao le letona? Ako le ntshe fubeng sa hao, o ba timeletse! ₁₂Leha ho le jwalo, Modimo ke Morena wa ka esale le kgale, ya ntseng a sebetsa dipoloko hara lefatshe. ₁₃Ke wena ya arohantseng metsi a lewatle ka matla a hao; wa pshatla dihlooho tsa didrakone metsing. ₁₄Wa thumakanya hlooho ya leviathane, o e neetse diphoofolo tse lefeelleng e be dijo tsa tsona. ₁₅Wa tsaradisa mehlodi le melatswana, wa pshesa dinoka tse sa psheng le mehla. ₁₆Nyene ke ya hao, le bosiu ke ba hao; o entse lesedi le letsatsi. ₁₇O beile meedi kaofela ya lefatshe; lehlabula le mariha ke wena ya di entseng.

₁₈Hopola hoba sera se nyefotse Jehova, le hoba setjhaba se hlanyang se rohakile lebitso la hao. ₁₉O se ke wa neela selalome moya wa leebakgorwana la hao, o se ke wa nna wa lebala bophelo ba bahlomohi ba hao. ₂₀O hopole selekane sa hao, hobane dinqalo tse ntsho tsa lefatshe di tletse mahaha a dihlola. ₂₁O se ke wa kgutlisa motujwa ka maswabi; mohlomohi le ya lesitsi ba ke ba rorise lebitso la hao. ₂₂Oho Modimo, tsoha, o eme, o emele nyewe ya hao! Hopola kamoo lewatla le ntseng le o nyefola kateng ka matsatsi wohle! ₂₃O se ke wa lebala ho rora ha dira tsa hao; ho duma ha bahanyetsi ba hao ha ho kgaotse.