PESALEME YA 73

₁Modimo o fela o le molemo ho Iseraele, ho ba pelo tse hlwekileng. ₂Haele nna, leoto la ka le batlile le kgoptjwa, mehato ya ka e batlile e thella; ₃hobane ke ne ke honohela baikakasi, ha ke bona lehlohonolo la banyefodi. ₄Hobane ha ba tsebe matshwenyeho ho isa lefung la bona, mmele wa bona o otleha hantle; ₅ba dutse kantle ho mahlomola a batho, mme ha ba otlwe jwaloka ba bang. ₆Ka baka leo, boikgohomoso bo ba ngomela jwaloka lepetu, sehloho se ba aparetse jwaloka kobo. ₇Mafura a rotola mahlo a bona, mehopolo ya pelo tsa bona e a itlhahisa. ₈Ke basomi, ke ba bolotsana, ba bolela ho tuba; ba bua ka puo tse phahameng. ₉Ba phahamisetsa melomo ya bona mahodimong, mme maleme a bona a lelera lefatsheng.

₁₀Ke ka baka leo setjhaba se retelehetseng ka nqa ho bona; se rata ho inwesa metsing a mangata, ₁₁se re: Na Modimo o ka tseba jwang? Mookamedi ya phahameng a ka ba le tsebo jwang? ₁₂Ba tadimeng ba babe bao! Ba iketla kamehla, ba totisa matlotlo a bona. ₁₃Ke feela ha ke hlwekisitse pelo ya ka, leha ke hlatswitse matsoho a ka bosweung; ₁₄ke otlwa ka matsatsi wohle, ke lauwa kameso yohle. ₁₅Hola nka re: Ke tla bua jwalo, moo e ka be e le ho eka moloko wa bana ba hao.

₁₆Yaba ke a nahana hore ke utlwisise taba tseo, mme ka fihlela hoba ke mosebetsi o thata, ₁₇ho fihlela ha ke kena sehalalelong sa Modimo, ya eba moo ke elang bofello ba batho bao hloko. ₁₈Ka re: O mpa o ba beile nqalong tse thellang, wa ba diha, mme ba senyehile. ₁₉Ba fedile jwang hanghang! Ba timela, ba senyeha, ba wa ba tshohile hampe. ₂₀Ha eba jwaloka toro phaphamong, wa ba tsosa jwalo, Morena; o entse seriti sa bona ntho feela e nyedisehang.

₂₁Enereha pelo ya ka e ntse e tlokoma, ke utlwa tsenene e hlaba lethekeng la ka, ₂₂ke ne ke le letlaopa le sa tsebeng letho, ke ne ke le jwaloka phoofolo pela hao. ₂₃Empa jwale ke ntse ke o kgomarela, o ntataisa ka letsoho la ka le letona. ₂₄O tla ntsamaisa ka keletso ya hao, mme qetellong o ntholle kganyeng ya hao. ₂₅Ke na le mang mahodimong haese wena? Kantle ho wena ha ke kgahliswe ke letho lefatsheng. ₂₆Nama ya ka le pelo ya ka di ntse di fela; lefika la pelo ya ka le kabelo ya ka ke Modimo, ka ho sa yeng kae! ₂₇Hobane ba o kwenehelang ba tla fela. O timetsa bohle ba yang ho itshilafaletsa hole le wena. ₂₈Empa haele nna, ho ba haufi le Modimo, ke molemo ho nna; ke beile setshabelo sa ka ho Morena Jehova, ke tle ke tsebe ho bolela mesebetsi ya hao kaofela.