PESALEME YA 66

₁Phahamisetsang ho Modimo mehoo ya thabo, lona mafatshe wohle! ₂Rokang kganya ya lebitso la wona, le o tlotlise ka dithoko. ₃Ereng ho Modimo: Mesebetsi ya hao e tshabeha hakakang! Ka baka la boholo ba matla a hao, dira tsa hao di ipea katlase ho wena; ₄lefatshe lohle le tla o kgumamela, le o binele, le hodise lebitso la hao! (Sela.)

₅Tloong, le bone mesebetsi ya Modimo; o tshabeha ho etseng ha wona bakeng sa bana ba batho! ₆O ile wa pshesa bodiba ba lewatle, ba tshela noka ka maoto, ra ba ra ithabela ho wona. ₇Ka matla a wona o ntse o busa ka ho sa yeng kae; mahlo a wona a fadimeha hodima ditjhaba; bakwenehi ba se ke ba ikgodisa. (Sela.)

₈Rorisang Modimo wa rona, lona ditjhaba; utlwahatsang modumo wa dithoko tsa wona! ₉O pholositse meya ya rona, ha o a ka wa lesa maoto a rona a kgothometseha. ₁₀Hobane wena, Modimo, o re lekile, wa re tshekisa ka mollo jwalokaha ho tshekiswa silefera, ₁₁o nnile wa re tshwasa ka letlowa, wa bea phahlo e boima mathekeng a rona; ₁₂o nnile wa kallisa batho hodima dihlooho tsa rona, ra kena mollong le metsing; empa wa ba wa re nyolla teng ho re kgatholosa menonong.

₁₃Ke tla kena ka tlung ya hao ka ditjheso, ke o lefele dikano tsa ka tse tswileng melomong ya ka, ₁₄tse boletsweng ke molomo wa ka, ha ke ne ke le matswalong. ₁₅Ke tla o hlahisetsa ditjheso tsa nku tse nonneng, le monko wa mafura a dipheleu, ke o hlabele dipohwana le diphooko. (Sela.)

₁₆Tloong, le mamele, lona kaofela ba tshabang Modimo, ke tla le bolella seo o se entseng bakeng sa moya wa ka. ₁₇Ke howeleditse ho wona ka molomo wa ka, thoko ya wona eba lelemeng la ka. ₁₈Hola eba ke hopotse bokgopo pelong ya ka, Morena a ka be a sa ka a nkutlwa; ₁₉empa Modimo o nkutlwile, o mametse lentswe la thapelo ya ka. ₂₀Modimo a o ke o bokwe kamoo o sa kang wa lahla thapelo ya ka kateng, o sa kang wa ntima mohau wa wona.