PESALEME YA 65

₁Modimo, boimamelo le hlompho di teng pela hao, Sione! Dikano di phethelwa wena! ₂Wena ya utlwang merapelo, batho bohle ba tla tla ho wena. ₃Boima ba makgopo bo a nkimela, empa o hlakotse ditlolo tsa rona. ₄Ho lehlohonolo eo o mo kgethileng, eo o mo atametsang pela hao, a tle a ikahele mabaleng a hao. Re tla kgora tse monate tsa ntlo ya hao, tsa tempele ya bokgethehi ba hao!

₅Oho Modimo wa poloko ya rona, o re arabela ho lokeng ha hao ka diketso tse tshabehang; wena, tshepo ya bohle ho isa dipheletsong tsa lefatshe le ho isa moo mawatle a fellang teng; ₆wena ya tiisang dithaba ka matla a hao, ya apereng matla; ₇ya kgutsisang modumo wa mawatle, modumo wa maqhubu a wona, le mohorohoro wa ditjhaba. ₈Ba ahileng pheletsong tsa lefatshe ba tshoha mehlolo ya hao; o thabisa ba ahileng botjhabela le bophirimela.

₉O lekola lefatshe, o a le nosetsa, o le ruisa haholoholo; metsi a tlala molatswaneng wa Modimo; o lokisetsa batho mabele, ha o lokisa lefatshe jwalo. ₁₀O nosetsa boleme ba lona bo lemilweng, o phophotha makote a lona, o le nolofatsa ka dipula, mme o hlohonolofatsa dimela tsa lona. ₁₁O rwesa selemo molemo wa hao, nala e latela mehlala ya hao; ₁₂mehlala ya hao e medisa makgulo a nahathothe, dithota di apara thabo. ₁₃Makgulo a tlala mehlape, diphula di apeswa ke mabele, mme ho utlwahala mehoo ya thabo le dipina.