PESALEME YA 58

₁Fale le tla nne le ikgutsetse na? Na ha le tumise ho loka keng na? A le tla ahlola ka tokelo, lona bana ba batho? ₂Tjhe, le etsa ho sa lokang dipelong tsa lona, mme tokiso ya lona lefatsheng ke ho tsohela batho matla feela. ₃Ba bolotsana ba kgelohile esale ba etswa popelong, mahata a lahlehile esale a hlaha; ₄ba na le mahloko a kang a dinoha, ba tshwana le marabe a ithibanyang ditsebe, ₅a tle a se ke a mamela lentswe la moupelli le la ngaka e tsebang ho upa.

₆Modimo, o ba robe meno melomong ya bona! Jehova, pshatla mehlahare ya ditau! ₇Ba fele jwaloka metsi a phallang, metsu eo ba e fulang e thithibane. ₈Ba be jwaloka kgofu e menyelang e ntseng e eya, ba be jwaloka sefolotsana sa mosadi se sa kang sa bona letsatsi. ₉Dipitsa tsa lona di eso ho utlwe mollo wa meutlwa, e metala le e tukileng e tla phamolwa hammoho ke setsokotsane.

₁₀Ke moo ya lokileng a tlang ho thaba, ha a bona phetetso; o tla hlatswa maoto a hae mading a molotsana; ₁₁mme ho tla thwe: Moputso o teng ruri wa ya lokileng; ruri, Modimo o teng o ahlolang lefatshe.