PESALEME YA 25

₁Oho Jehova, ke phahamisetsa moya wa ka ho wena. ₂Modimo wa ka, ke beile tshepo ya ka ho wena; oho, ke se ke ka swaba! bao e leng dira ho nna ba tle ba se ke ba thaba ka nna! ₃E mong le e mong ya itshepetseng wena, a ke ke a swaba; tshwabo ke ya ba iketsetsang bolotsana ka boomo.

₄Jehova, mpontshe ditsela tsa hao, o nthute mekgwa ya hao. ₅O ntsamaise nneteng ya hao, o nthute, hobane ke wena Modimo wa poloko ya ka; kamehla ke ntse ke bea tshepo ya ka ho wena.

₆Jehova, o elellwe mehauhelo ya hao le lereko la hao, hobane ke tsa kamehla! ₇O lebale dibe tsa botjha ba ka le ditlolo tsa ka! ₈O nkelellwe ka lereko la hao ka baka la mohau wa hao, Jehova!

₉Jehova o molemo, o lokile; ke ka baka leo a bontshang baetsadibe tsela, a tsamaisang ho lokeng ba bonolo pelong, a ba rutang tsela ya hae.

₁₀Ditsela tsa Jehova kaofela ke mohau le nnete ho bohle ba bolokang selekane sa hae le ditaelo tsa hae. ₁₁Ka baka la lebitso la hao, Jehova, o ntshwarele bokgopo ba ka, leha bo le boholo.

₁₂Na motho ke ofe ya tshabang Jehova? Jehova o tla mmontsha tsela eo a tshwanetseng ho ikgethela yona. ₁₃Moya wa hae o tla iketla lehlohonolong, ditloholo tsa hae di tla rua lefatshe.

₁₄Lekunutu la Jehova ke la ba mo tshabang, o ba ruta selekane sa hae. ₁₅Mahlo a ka a tadima Jehova kamehla, hobane o tla tshwasolla maoto a ka lerabeng.

₁₆Jehova, o retelehele ho nna, o nkgauhele, hobane ke nnotshi, ke madimabe! ₁₇Matswalo a pelo ya ka a eketsehile; o ntokolle tsietsing tsa ka.

₁₈Tadima bomadimabe le bohloko ba ka, o ntshwarele dibe tsa ka tsohle. ₁₉O tadime bongata ba dira tsa ka, le hloyo e mpe eo ba ntlhoileng ka yona.

₂₀O boloke moya wa ka, o ntopolle; ke se ke ka swaba, hobane ke beile tshepo ya ka ho wena. ₂₁Bokgabane le ho loka a di ke di ntiise, hobane ke o tshepile.

₂₂Oho Modimo, o ntshe Iseraele matswalong a hae kaofela.