PESALEME YA 140

₁Jehova, o nnamolele ho batho ba babe; o ntwele ho batho ba bohale, ₂ba rerang bobe dipelong tsa bona, ba tsosang ntwa kamehla. ₃Ba tjhaditsa maleme a bona jwaloka dinoha, mahloko a marabe a katlasa melomo ya bona. (Sela.)

₄Jehova, ntshireletse letsohong la e mobe, o mpoloke ho batho ba bohale, ba rerang ho kgothometsa maoto a ka! ₅Baikakasi ba mpatetse mamena le maraba, ba tjheha difi mosikong wa tsela, ba ntjhehetse mamena. (Sela.)

₆Ke ntse ke re ho Jehova: O Modimo wa ka. Jehova, o sekehele lentswe la dithapedisiso tsa ka tsebe! ₇Jehova Morena, matla a poloko ya ka, o sirela hlooho ya ka ka letsatsi la ntwa. ₈Jehova, o se ke wa fa e mobe kamoo a lakatsang kateng; o se ke wa netafatsa morero wa hae, esere a ithorise hampe. (Sela.)

₉Ba ntikang a ba ke ba welwe ke ditshokelo tse tswileng melomong ya bona! ₁₀Mashala a hlenneng a ke a hlohlorehele hodima bona! Ba ke ba dihelwe malakabeng le mohomeng, ba tle ba se ke ba boela ba tsoha. ₁₁Motho ya leleme le lebe a ke ke a tiya lefatsheng, motho ya bohale o tla welwa ke dikotsi, a dihuwe.

₁₂Ke tseba hobane Jehova o ahlolela mohlomohi le hobane o lokisetsa ya lesitsi. ₁₃E, ba lokileng ba tla rorisa lebitso la hao; batho ba nang le ho loka ba tla nne ba hlole pela hao.