PESALEME YA 130

₁Jehova, botebong ba bodiba ke bitsa ho wena! ₂Morena, utlwa lentswe la ka; ditsebe tsa hao a di ke di sekehelwe thapelo ya ka!

₃Jehova, ha o ka lotolotsa makgopo, ke mang ya ka emang pela hao, Morena? ₄Empa tshwarelo e teng ho wena, o tle o tshajwe.

₅Ke itshepetse Jehova, moya wa ka o mo tshepile, ke itshepisa ka pallo ya hae. ₆Moya wa ka o lebeletse Morena ka tebello e fetisang ya ba lebellang meso, ya ba lebellang meso.

₇Iseraele, o itshepele Jehova, hobane mohau o teng ho Jehova; topollo e kgolo e teng ho yena. ₈Ke yena ya tlang ho lopolla Iseraele makgopong a hae kaofela.