PESALEME YA 114

₁Enereha Iseraele a etswa Egepeta, le ntlo ya Jakobo ha e tloha setjhabeng sa puo esele, ₂Juda a fetoha sehalalelo sa Jehova, Iseraele ya eba mmuso wa hae.

₃Lewatle eitse ha le mmona, la baleha, Jordane a kgutlela morao, ₄dithaba tsa tlola jwaloka dipheleu, le dithabana jwaloka dikonyana.

₅O ne o na le eng, wena lewatle, ha o tla baleha, le wena Jordane, ha o tla kgutlela morao? ₆le lona, dithaba, ha le tla tlola jwaloka dipheleu, le lona dithabana, jwaloka dikonyana?

₇Wena lefatshe, o ke o thothomele pela sefahleho sa Morena, pela sefahleho sa Modimo wa Jakobo, ₈o fetolang lefika matsha a metsi, le lehakwe le thata mohlwedi o tsaratsehang!