PESALEME YA 107

₁Rorisang Jehova, hobane o molemo, hobane mohau wa hae ke o sa feleng. ₂Balopollwa ba Jehova ba ke ba rialo, bao a ba lopolotseng matsohong a sera, ₃a ba latileng dinaheng tsohle, botjhabela le bophirimela, leboya le borwa.

₄Ba nnile ba solla feelleng, nahathothe, ba sa fumane motse wa ho aha; ₅ba ne ba shwele ke tlala le ke lenyora, meya ya bona e ne e idibana kahare ho bona. ₆Ba howa ho Jehova matswalong a bona, a ba lopolla ditsielehong tsa bona; ₇a ba tsamaisa ka tsela e lokileng, ba tle ba fihle motseng moo ba ka ahang teng. ₈A ba ke ba lebohe Jehova ka mohau wa hae le ka mehlolo ya hae ho bana ba batho; ₉hobane o kgodisitse moya o nyorilweng, mme a sitsa moya o lapileng ka menono.

₁₀Ba nnile ba aha lefifing le moriting wa lefu, e le ba tlamilweng ka bomadimabe le ditshepe. ₁₁Erekaha ba nnile ba eba manganga ditabeng tsa Modimo, ba nyedisa keletso ya Mookamedi ya phahameng; ₁₂ke moo a kokobeditseng dipelo tsa bona tlasa bohloko; ba imelwa, ba sa thuswe ke motho. ₁₃Ba howa ho Jehova matswalong a bona, a ba bona, a ba lopolla ditsielehong tsa bona; ₁₄a ba ntsha lefifing le moriting wa lefu, a roba ditlamo tsa bona. ₁₅A ba ke ba lebohe Jehova ka mohau wa hae le ka mehlolo ya hae ho bana ba batho; ₁₆hobane o robakile menyako ya koporo, a thuhakanya mekwallo ya tshepe.

₁₇Mahlanya a nnile a hlomodisetswa tsela ya wona ya lonya le makgopo a wona. ₁₈Ba ne ba se ba tennwe ke dijo tsohle, ba se ba fihlile menyakong ya lefu. ₁₉Ba howa ho Jehova matswalong a bona, a ba lopolla ditsielehong tsa bona; ₂₀a romela lentswe la hae, a ba fodisa, a ba ntsha mabitleng a bona. ₂₁A ba ke ba lebohe Jehova ka mohau wa hae le ka mehlolo ya hae ho bana ba batho! ₂₂Ba mo hlahisetse mahlabelo a teboho, ba bolele diketso tsa hae ka dipina.

₂₃Ba tsamayang lewatleng ka dikepe, ba hwebang metsing a maholo, ₂₄e bile dipaki tsa mesebetsi ya Jehova, le tsa mehlolo eo a e entseng madibeng. ₂₅A bolela, mme a tsosa moya wa sefefo, o emisang maqhubu a lewatle. ₂₆Ba phahama ho isa hodimodimo, ba theohela le ho isa bodibeng; meya ya bona ya qhibidiha ka ho tsieleha. ₂₇Ba tshwarwa ke modikwadikwane, ba thekesela jwaloka hola ba tahilwe, mme bohlale ba bona kaofela bo ne bo felle. ₂₈Ba howa ho Jehova matswalong a bona, a ba lopolla ditsielehong tsa bona. ₂₉A kgutsisa sefefo, a se fetola moya o mosesane, maqhubu a itholela; ₃₀ba thaba ha maqhubu a itholetse, a ba isa moo ba neng ba rata ho ya teng. ₃₁A ba ke ba lebohe Jehova ka mohau wa hae le ka mehlolo ya hae ho bana ba batho! ₃₂A ba ke ba mo phahamise phuthehong ya setjhaba, mme ba mo roke mokgatlong wa ba baholo.

₃₃O ne a fetole dinoka lefeella, le didiba tsa metsi naha e tshehla. ₃₄Lehwatata le behang a le fetola mobu wa letswai, ka baka la bolotsana ba baahi ba lona. ₃₅A fetola lefeella naha ya metsi, le naha e tshehla didiba tsa metsi; ₃₆teng a ahisa ba lapileng, teng ba thea metse ho aha ho yona. ₃₇Ba itjalla dithite, ba hloma merara, mme ba eja ditholwana tse behwang ke yona. ₃₈A ba hlohonolofatsa, a ba ngatafatsa haholo, ha a ka a fokotsa bongata jwa makgomo a bona. ₃₉Yaba ba fokodiswa, ba imelwa ke botubo le dikotsi le maswabi. ₄₀A tshollela nyediso ho marena, a a sollisa lefeelleng le sa nang tsela; ₄₁a tlosa ba lesitsi bomadimabeng ba bona, a ba tsosetsa bana ba bangata ba ka ka mehlape ya dinku. ₄₂Ba lokileng ba bona hoo, mme ba thaba; empa ba bolotsana kaofela ba thibana melomo. ₄₃Motho ya hlalefileng o kae? A ke a lemohe ditaba tseo, a ele mehauhelo ya Jehova hloko.