PESALEME YA 103

₁Boka Jehova, moya wa ka; tsohle tse ka ho nna a di ke di boke lebitso la hae le kgethehileng! ₂Boka Jehova, moya wa ka, o se ke wa lebala ditshitso tsohle tsa hae! ₃Ke yena ya tshwarelang makgopo a hao wohle, ya fodisang malwetse a hao kaofela. ₄O lopolla bophelo ba hao lebitleng, o o rwesa lereko le mehauhelo hloohong. ₅O kgorisa molomo wa hao ka tse molemo, mme botjha ba hao bo ntjhafala jwaloka ntsu.

₆Jehova o lokisetsa, o ahlolela bohle ba hatakelwang. ₇O ne a senolele Moshe ditsela tsa hae, a bontsha bana ba Iseraele diketso tsa hae tse phahamileng. ₈Jehova o mohau, o lereko, o dieha ho halefa, o ruile mehauhelo e mengata. ₉Ha a tsekise kamehla, hlonamo ya hae hase e sa feleng. ₁₀Ha a ka a re etsa kamoo dibe tsa rona di leng kateng, ha a ka a re putsa ka moputso wa makgopo a rona.

₁₁Empa jwaloka lehodimo ha le phahamile hodimo ho lefatshe, mohau wa hae o moholo jwalo ho ba mo tshabang. ₁₂Jwalokaha botjhabela bo le hole le bophirimela, o lahlela makgopo a rona jwalo hole le rona. ₁₃Jwalokaha ntata motho a hauhela bana ba hae, Jehova o hauhela jwalo ba mo tshabang. ₁₄Hobane o tsebisisa ho bopjwa ha rona, o elellwa hoba re lerole feela.

₁₅Motho, ditshiu tsa hae di jwaloka jwang; o kgaba jwaloka palesa ya naha;

₁₆ha moya o feta hodima yona, e se e le siyo, esita le tulo tsa yona ha di sa e tseba. ₁₇Empa mohau wa Jehova o hlola o le teng kamehla le mehla ho ba mo tshabang, le ho loka ha hae ho bana ba bana ba bona, ₁₈e leng ba bolokang selekane sa hae, ba elellwang ditaelo tsa hae ho di phetha.

₁₉Jehova o beile terone ya hae mahodimong, mme borena ba hae bo busa dintho tsohle.

₂₀Bokang Jehova, lona mangeloi a hae, bahale ba matla, ba phethang lentswe la hae, ba mamelang molomo wa hae! ₂₁Bokang Jehova, lona makgotla a hae kaofela, lona bahlanka ba hae kaofela, ba etsang ho ratwang ke yena! ₂₂Bokang Jehova, lona mesebetsi ya hae kaofela, nqalong tsohle tsa borena ba hae! Moya wa ka, o boke Jehova!