PESALEME YA 10

₁Jehova, o emelang kathoko, o ipatelang mehleng ya matswalo? ₂Ya madimabe o hloreha ke boikgohomoso ba bakgopo, o tshwaswa marabeng a lohilweng ke bona, ₃hobane molotsana o ithorisa ka takatso ya pelo ya hae, mme leshodu le rohaka, le nyedisa Jehova. ₄Molotsana, boikgantshong ba hae, o re: A ke ke a botsisisa; ha ho Modimo! Ke yona kgopolo ya hae kaofela ha yona. ₅Katleho e ka tseleng ya hae kamehla; o sitwa ho bona dikahlolo tsa hao; o tsheha hodima dira tsohle tsa hae. ₆Pelong ya hae o re: Nke ke ka sisinngwa ke letho le ka mohla o le mong; ke itshireleditse ditsietsi. ₇Molomo wa hae o tletse dithohako le thetso le bolotsana; leleme la hae le patile lonya le bokgopo. ₈O laletse pela metsana; o bolaya ya se nang molato nqalong tse sephiring; mahlo a hae a lalla ya madimabe. ₉O nanara ka sephiring jwaloka tau letsabeng la yona; o laletse ho tshwara ya madimabe; o tshwara ya madimabe, o mo hulanya letloweng la hae. ₁₀O a kgukguna, o a kgasa, mme ba madimabe ba wela marong a hae. ₁₁Pelong ya hae o re: Modimo o a lebala, o patile sefahleho sa wona, ha o tadime le ka mohla o le mong!

₁₂Tsoha, Jehova! Oho Modimo, otlollela letsoho la hao hodimo. O se ke wa lebala ba madimabe! ₁₃Na ya kgopo o nyedisetsang Modimo, ha a re pelong ya hae: Ha o batlisise? ₁₄Athe o a bona; hobane o tadima hlokofalo le matshwenyeho, mme o di ngola letsohong la hao. Ya madimabe o itshepetse wena; esale o le moemedi wa kgutsana. ₁₅Roba letsoho la ya kgopo, o batlisise bokgopo ba motho e mobe, ho fihlela o sa hlole o mo fumana.

₁₆Jehova ke Morena wa kamehla, ya sa feleng. Baditjhaba ba fediswa lefatsheng la hae. ₁₇Jehova o utlwa merapelo ya ba tshwenyehang. ₁₈Tiisa pelo tsa bona, o sekehele tsebe tsa hao, o lokisetse kgutsana le mofutsana, hore motho a se hlole a hlahisa letsoso lefatsheng.