1Mora wa ka, o se ke wa lebala thuto tsa ka, pelo ya hao e ke e boloke dikeletso tsa me; 2mme o tla ekelletswa ke tsona ditshiu, le dilemo, le ho phela, le kgotso. 3Molemo le nnete di se ke tsa kgaohana le wena, o ithwalle tsona molaleng wa hao, o di ngole letlapeng la pelo ya hao; 4mme o tla fumana mohau le hlompheho pela Modimo le batho. 5O tshepe Jehova ka pelo ya hao yohle, o se ke wa itshepa hlalefo ya hao. 6O mo kenye mererong ya hao yohle, mme o tla o tsamaisa ditseleng tsohle tsa hao. 7O se ke wa ipona bohlale. Tshaba Jehova, o sesefe bobe. 8E tla ba sehlare mesifeng ya hao, le moko masapong a hao. 9Tlotlisa Jehova ka moruo wa hao, le ka dilopotsiya tsa tsohle tse o atetseng. 10Mme mediko ya hao e tla tlala, e phanyaphanye, mafiso a hao a tlale veine e monate.
11Mora wa ka, o se ke wa nyedisa tayo ya Jehova, o se ke wa fellwa ke pelo ha o otlwa ke yena. 12Hobane Jehova o kgalemela eo a mo ratang, jwaloka ntata motho a yeng a kgalemele mora wa hae ya ratwang. 13Ho lehlohonolo motho ya fumaneng bohlale, ya fihletseng kutlwisiso; 14hobane kgwebo ya jona e fetisa silefera, ho ata ha jona ho fetisa ha kgauta. 15Bo fetisa diperela ka bohlokwa, tsohle tse lakatsehang ha di lekane le bona. 16Bo kakatletse bolelele ba ditshiu letsohong le letona, le menono le boholo letsohong le letshehadi. 17Ditsela tsa bona ke ditsela tse kgahlehang, mebila ya bona ke kgotso. 18Ke sefate sa bophelo ho ba bo ruileng, ba bo lotolotsang ba na le lehlohonolo. 19Jehova o theile lefatshe ka bohlale, o adile mahodimo ka kelello. 20Ka ho tseba ha hae metsi a tebileng a biloha, mme maru a rothisa phoka.
21Mora ka, tseo di se ke tsa ba tsa tloha pela hao, boloka bohlale le kutlwisiso; 22mme e tla ba bophelo moyeng wa hao, le kgabiso molaleng wa hao. 23Ke moo o tla tsamaya o ntse o tiile tseleng ya hao; leoto la hao le ke ke la kgoptjwa. 24Leha o ya robala, o ke ke wa tshoha; ha o se o kgalehile, boroko ba hao bo tla ba monate. 25U ke ke wa tshaba letsoso le sehloho, leha e le sefefo se tlang ho timetsa ba babe. 26Hobane Jehova e tla ba tshepo ya hao, a phemise leoto la hao sefi.
27Ya nang le tokelo, o se ke wa lesa ho mo etsa ka molemo, ha ho le matleng a hao. 28O se ke wa re ho wa heno: Tsamaya, o tle o boye hosasane, ke tla o nea; athe seo a se hlokang se teng ho wena.
29O se ke wa rera wa heno ka bobe, ha a ntse a ahisane le wena ka kgotso. 30O se ke wa tsekisana le motho feela, ha a se na molato le wena.
31O se ke wa kgahlwa ke ho itshwantsha le motshwenyi, mekgweng ya hae o se ke wa inkela leha o le mong. 32Ho Jehova motho ya kgopo ke manyala, empa ya lokileng o na le lekunutu la hae. 33Thohako ya Jehova e ka tlung ya moetsadibe, empa o hlohonolofatsa ntlo ya ba lokileng. 34Basomi o ba soma ruri, empa o hauhela ba ikokobetsang. 35Ba bohlale ba tla ja lefa la hlompho; haele dithoto, botumo ba tsona ke dihlong.
