DIPROVERBIA 20

₁Veine ke mosomi, jwala bo lerata; bohle ba kgeloswang ke bona ha ba na bohlale.

₂Bohale ba morena bo tshabeha jwaloka tau ha e puruma; ya mo halefisang o itshitelwa moya wa hae.

₃Ke thoriso ho motho ho intsha tsekong; empa lehlanya le phehella ho yona.

₄Sekgoba ha se leme, hoba se hatsetse; mohla ho kotulwang, se a kopa, empa ha ho letho.

₅Morero pelong ya motho e ka koetsa, ya nang le kelello o ya kga teng.

₆Ba ipolelang molemo ba bangata, empa motho ya tshepehang a ka fumanwa ke mang?

₇Ha motho a lokile, mme a tsamaya ho lokeng, ho lehlohonolo bana ba hae ba mo latelang!

₈Morena ya dutseng tulo ya kahlolo o fedisa bobe bohle ka mahlo a hae.

₉Ke mang ya ka reng: Ke itlhwekisitse pelo, ke hlatswehile bobe ba ka?

₁₀Diponto tse pedi tsa ho lekanya tse fapaneng, le diefa tse pedi tse fapaneng, ke manyala ho Jehova.

₁₁Esita le moshanyana o itsebahatsa ka diketso tsa hae, ha metsamao ya hae e tla ba metle, e loke.

₁₂Tsebe e utlwang le leihlo le bonang, Jehova o di entse tse pedi.

₁₃Se rate boroko, esere mohlomong wa fumaneha; phaphama, o tutubolohe, mme o tla kgora bohobe.

₁₄E mpe! e mpe! ho bolela moreki; ebe o a ikela, a ntse a ithorisa.

₁₅Kgauta e teng, le diperela tse ngata, empa ntho e theko e thata ke melomo e rutehileng.

₁₆Mo amoheng kobo, etswe a itlamile ho lefela e mong; o mo tlame bakeng sa osele.

₁₇Bohobe ba thetso bo ye bo hlabosehe ho motho, empa hamorao molomo wa hae o ye o tlale lehlohlojane.

₁₈Merero e tiiswa ke keletsano; ka baka leo, o rere ntwa ka ho nahanisisa.

₁₉Mosebi ya tsamayang a seba, o phunya makunutu; ha ho le jwalo, tshaba ho tlwaelana le ya ntseng a ahlamisa melomo ya hae.

₂₀Ya rohakang ntatae le mmae, lebone la hae le tla tima lefifing.

₂₁Lefa ha le le manyala ho qaleng, le ke ke la hlohonolofatswa qetellong.

₂₂Se re: Ke tla busetsa bobe ka bobe. Tshepa Jehova, ke yena ya tla o boloka.

₂₃Ponto tsa ho lekanya tse pedi tse fapaneng ke manyala ho Jehova, le sekala sa thetso ha se setle.

₂₄Maoto a motho a laelwa ke Jehova; ha ho le jwalo, ke mang motho ya ka utlwisisang tsela ya hae?

₂₅Ke leraba ho motho ho kgethela Modimo ntho ka potlako, le ho belaela ha ho se ho annwe.

₂₆Morena ya bohlale o hlokola baetsadibe, mme o ba pola ka sepolo.

₂₇Moya wa motho ke lebone la Jehova, o batlisisa tse tebileng ka ho yena.

₂₈Mohau le nnete di tiisa morena, ka mohau wa hae o tiisa terone ya hae.

₂₉Kganya ya ba batjha ke matla a bona, mokgabo wa maqheku ke moriri o moputswa.

₃₀Maqeba a phekola moetsadibe, le tsona dikotlo tse mo kenang le maleng hare.