DIPROVERBIA 10

₁Diproverbia tsa Salomone.

Ngwana ya hlalefileng ke thabiso ho ntatae; empa ngwana ya lewatla ke mapalesapelo ho mmae.

₂Maruo o fumanwang ka bokgopo ha a na moeno; empa ho loka ho qobisa lefu.

₃Jehova a ke ke a tlohella motho ya lokileng tlala; empa tse labalabelwang ke e mobe, o mo hlakola tsona.

₄Ya letsoho le botswa o tla fumaneha, empa letsoho la sekgothadi le tla se ruisa.

₅Ya bokellang lehlabula ke ngwana ya bohlale; empa ya robalang ha ho kotulwa, ke ngwana ya hlabisang dihlong.

₆Motho ya lokileng o rwetse mahlohonolo hloohong, empa lonya le aparetse melomo ya e mobe.

₇Ho hopolwa ha mofu ya lokileng ke lehlohonolo, empa lebitso la e mobe le tla bola.

₈Motho ya pelo e hlalefileng o utlwa keletso, empa ya beberang tsa bosawana o tla dihelwa.

₉Ya tsamayang ka ho loka o tsamaya ka kgotso; empa ya kgopamisang metsamao ya hae o a tsebahala.

₁₀Ya bonyang ka mahlo o a ferekanya; ya molomo o bosawana o ya timelong.

₁₁Molomo wa motho ya lokileng ke sediba sa bophelo; empa lonya le kwahetse molomo wa ya sa lokang.

₁₂Hloyo e hotetsa dikomang, empa lerato le apesa ditshito tsohle.

₁₃Bohlale bo fumanwa molomong wa motho ya masene, empa thupa e mokokotlong wa ya sa utlweng.

₁₄Ba hlalefileng ba ipokellela tsebo, empa molomo wa mawatla o fehla tshenyeho.

₁₅Menono ya morui ke qhobosheane ya hae, empa bomadimabe ba mafutsana ke ho fumaneha ha wona.

₁₆Ya lokileng o sebeletsa ho phela, empa ya sa lokang o ruela sebe.

₁₇Ya elellwang tayo o tshwere tsela ya bophelo, empa ya hanang nyatso o a lahleha.

₁₈Ya patang hloyo o na le molomo o mano, empa ya hasang disebo ke lehlanya.

₁₉Dipolelong tse ngata, tshito ha e hlokwe; ka baka leo, ya itshwarang molomo o bohlale.

₂₀Leleme la ya lokileng ke silefera e hlwekileng; empa pelo ya e mobe ke lefeelafelane.

₂₁Molomo wa ba lokileng o phedisa ba bangata, athe mawatla a timela ke ho hloka kelello.

₂₂Lehlohonolo la Jehova le entsha motho, hase mokgathala wa hae o mo ekeletsang leruo.

₂₃Ho lewatla ke monyaka ho etsa hampe; ho motho ya hlalefileng monyaka ke ha a etsa ka bohlale.

₂₄Seo e mobe a se tshabang ke sona se tlang ho mo wela hodimo; empa ba lokileng ba tla newa seo ba se ratang.

₂₅Jwaloka setsokotsane ha se feta, ya bolotsana o feta jwalo; empa ya lokileng o tiile ka ho sa feleng.

₂₆Motho ya botswa ho ba mo romang ke asene menong le mosi mahlong.

₂₇Ho tshaba Jehova ho atisa ditshiu, empa dilemo tsa moetsadibe di tla kgutsufatswa.

₂₈Tshepo ya ya lokileng e tla fetoha thabo, empa tebello ya motho ya sa lokang e tla timela.

₂₉Tsela ya Jehova ke qhobosheane ho ya kgabane, empa ho ba kgopo ke tshenyeho.

₃₀Ya lokileng a ke ke a sisinngwa le ka mohla o le mong; haele ba babe, ba ke ke ba nna ba hlola lefatsheng.

₃₁Molomo wa ya lokileng o hlahisa tsa bohlale, empa leleme le kgopameng le tla qhwishilwa.

₃₂Melomo ya ba lokileng e tseba tse kgahlisang; empa molomo wa ba sa lokang o bolela bokgopo feela.