NUMERE 6

₁Jehova a bua le Moshe, a re: ₂Bolella bana ba Iseraele, o re ho bona: Ha monna, kapa mosadi, a ikgethetse ho ineela Jehova ka kano ya bonasari, ₃o tla itima veine le tse tahang; a se ke a nwa asene e entsweng ka veine, leha e le asene e entsweng ka tse tahang; a se ke a nwa dino tse entsweng ka ditholwana tsa morara, mme a se ke a ja ditholwana tsa morara tse ntjha, leha e le lengangajane la tsona. ₄Ka ditshiu tsohle tsa bonasari ba hae, a se ke a ja letho le tswang morareng, ho qala ka thootsenyana ya tholwana ho isa ho letlalo la yona. ₅Ka ditshiu tsohle tsa bonasari ba hae, lehare le se ke la feta hloohong ya hae; o tla kgetheha ho isa qetellong ya ditshiu tseo a ikgethetseng Jehova ka tsona, o tla lesela moriri wa hlooho ya hae ho hola. ₆Ka ditshiu tsohle tsa ho ikgethela Jehova ha hae, a se ke a atamela setopo se shweleng. ₇A se ke a itshilafatsa ka ntatae; leha e le ka mmae, leha e le ka ngwanabo, leha e le ka kgaitsedie, ha ba shwele, hobane boikgethelo ba hae ba ho ikgethela Modimo bo hloohong ya hae. ₈Ka ditshiu tsohle tsa bonasari ba hae o kgethetswe Jehova. ₉Ha e mong a ka tshoha a eshwa hanghang haufile yena, mme hlooho ya hae e kgethehileng e silafatswa ke hona, o tla e beola ka tsatsi la ho itlhwekisa ha hae, o tla e beola ka tsatsi la bosupa. ₁₀Ka tsatsi la boroba meno e le mmedi, o tla tlisetsa moprista, monyako wa tente ya pokano, maebanakgorwana a mabedi, kapa maebana a mabedi. ₁₁Moprista o tla etsa ka le leng sehlabelo sa sebe, ka le leng a etse setjheso; o tla mo etsetsa pheko ya sebe seo a leng ho sona ka baka la setopo seo; hape ka tsatsi leo o tla halaletsa hlooho ya hae. ₁₂O tla boela a kgethele Jehova ditshiu tsa bonasari ba hae, mme o tla tlisa konyana e tona e lemo se le seng, e be sehlabelo sa molato; hobane matsatsi a fetileng a ke ke a balwa, hobane bonasari ba hae bo ile ba silafala.

₁₃Ke ona molao wa bonasari. Etlare hobane matsatsi a bonasari ba hae a phethehe, monasari o tla tliswa monyako wa tente ya pokano. ₁₄O tla hlahisetsa Jehova kabelo ya hae, e leng konyana e tona e lemo se le seng, e se nang sekodi, e be setjheso; le sethole sa nku se se nang sekodi, se lemo se le seng, e be sehlabelo sa sebe, le pheleu e se nang sekodi, e be sehlabelo sa teboho; ₁₅le seroto sa mahobe a se nang ditomoso, le dinkgwana tse entsweng ka lefi la phofo, tse dubilweng ka ole, le maqebekwane a se nang ditomoso a tlotsitsweng ka ole, le dinyehelo tsa tsona le dino tsa tsona. ₁₆Moprista o tla hlahisa dintho tseo pela Jehova, mme o tla hlahisa sehlabelo sa monasari sa sebe le setjheso sa hae. ₁₇Ka pheleu o tla etsetsa Jehova sehlabelo sa teboho, hammoho le ka sona seroto sa mahobe a se nang ditomoso; o tla hlahisa nyehelo ya hae le dino tsa hae. ₁₈Monasari o tla beola hlooho e kgethehileng ya hae monyako wa tente ya pokano; o tla nka moriri wa hlooho e kgethehileng ya hae, mme a o kenye mollong o katlasa sehlabelo sa teboho. ₁₉Moprista o tla nka letsoho la pheleu le butswitseng, le senkgwana se seng se se nang ditomoso, le leqebekwane le leng le se nang ditomoso; o tla di bea diatleng tsa monasari, hlooho e kgethehileng ya hae ha e se e beotswe; ₂₀moprista o tla di tsokotsa jwaloka nyehelo e tsokotswang pela Jehova: ke ntho e kgethehileng ya moprista hammoho le sefuba se tsokotswang le letsoho le emisitsweng. Kamora tseo, monasari a ka nwa veine.

₂₁Ke oo molao wa ya iketsang monasari ka kano; ke eo nyehelo ya monasari ho Jehova, ho sa balwe tsee a ka nnang a mo abela tsona kamoo matla a hae a leng kateng: o tla phetha se laelwang bakeng sa kano ya hae kamoo molao wa bonasari o leng kateng.

₂₂Jehova a bua le Moshe, a re: ₂₃Bua le Aarone, le bara ba hae, o re: A le ke le hlohonolofatseng bana ba Iseraele jwalo, le re ho bona:

₂₄Jehova a o hlohonolofatse, mme a o boloke!

₂₅Jehova a o kgantshetse sefahleho sa hae, mme a o hauhele!

₂₆Jehova a retelletse sefahleho sa hae ho wena, mme a o fe kgotso!

₂₇Ke ka mokgwa o jwalo ba tla bea lebitso la ka hodima bana ba Iseraele, mme nna ke tla ba hlohonolofatsa.