NUMERE 29

₁Ka kgwedi ya bosupa, ka tsatsi la pele la kgwedi, le tla ba le phutheho e kgethehileng; le ke ke la etsa mosebetsi le o mong ka lona. E tla ba letsatsi la ho letsa diterompeta haholo. ₂Le tla hlahisa setjheso se monko o monate ho Jehova sa pohwana, le pheleu, le dikonyana tse tona tse supileng tse se nang sekodi, tse lemo se le seng; ₃le nyehelo ya lefi la phofo le dubilweng ka ole; ₄e be ya karolo tse tharo ta boshome ka pohwana, le ya karolo tse pedi tsa boshome ka pheleu, le ya karolo e le nngwe ya boshome ka konyana e nngwe le e nngwe ya tse supileng. ₅Le tla hlahisa phooko ya sehlabelo sa sebe, le tle le etsetswe pheko. ₆Le tla hlahisa mahlabelo ao, kantle ho setjheso le ho nyehelo tsa kgwedi e nngwe le e nngwe, le ho setjheso sa kamehla le nyehelo, le ho ditshelo tse hlahiswang le tsona ka taelo e beilweng. Ke mahlabelo a tjheswang ka mollo, a monko o monate ho Jehova.

₇Ka tsatsi la leshome la kgwedi eo ya bosupa, le tla ba le phutheho e kgethehileng, mme le tla hlomola meya ya lona; le ke ke la etsa mosebetsi le o mong ka lona. ₈Le tla hlahisa setjheso se monko o monate ho Jehova sa pohwana, le pheleu, le dikonyana tse tona tse supileng tse lemo se le seng, tse se nang sekodi. ₉Le tla di ekeletsa ka nyehelo ya lefi la phofo le dubilweng ka ole; e be karolo tse tharo tsa boshome ka pohwana, le karolo tse pedi tsa boshome ka pheleu, ₁₀le karolo e le nngwe ya boshome ka konyana e nngwe le e nngwe ya tse supileng. ₁₁Le tla hlahisa phooko ya sehlabelo sa sebe, kantle ho sehlabelo sa dipheko le ho setjheso sa kamehla le ho nyehelo le ho ditshelo tsa tsona.

₁₂Ka tsatsi la leshome le metso e mehlano la kgwedi ya bosupa, le tla ba le phutheho e kgethehileng; le ke ke la etsa mosebetsi le o mong ka lona. Le tla etsetsa Jehova mokete ka matsatsi a supileng. ₁₃Le tla hlahisa sehlabelo se tjheswang ka mollo, e be setjheso se monko o monate ho Jehova, e leng dipohwana tse leshome le metso e meraro, le dipheleu tse pedi, le dikonyana tse tona tse leshome le metso e mene, tse se nang sekodi, tse lemo se le seng. ₁₄Le tla di ekeletsa ka nyehelo ya lefi la phofo le dubilweng ka ole, e be karolo tse tharo tsa boshome ka e nngwe le e nngwe ya dipohwana tse leshome le metso e meraro, ₁₅le karolo tse pedi tsa boshome ka e nngwe le e nngwe ya dipheleu tse pedi, le karolo e nngwe le e nngwe ya boshome ka e nngwe le e nngwe ya dikonyana tse leshome le metso e mene. ₁₆Le tla hlahisa phooko ya sehlabelo sa sebe, kantle ho setjheso sa kamehla le ho nyehelo le tshelo.

₁₇Ka tsatsi la bobedi, le tla hlahisa dipohwana tse leshome le metso e mmedi, le dipheleu tse pedi, le dikonyana tse tona tse leshome le metso e mene, tse se nang sekodi, tse lemo se le seng, ₁₈hammoho le nyehelo le ditshelo tse etsetswang dipohwana, le dipheleu, le dikonyana, ka palo ya tsona le ka taelo e beilweng. ₁₉Le tla hlahisa phooko ya sehlabelo sa sebe, ₂₀kantle ho setjheso sa kamehla le ho nyehelo le ditshelo.

₂₁Ka tsatsi la boraro, le tla hlahisa dipohwana tse leshome le motso o mong, le dipheleu tse pedi, le dikonyana tse tona tse leshome le metso e mene tse se nang sekodi, tse lemo se le seng, hammoho le nyehelo le tshelo tse etsetswang dipohwana, le dipheleu, le dikonyana, ka palo ya tsona le ka taelo e beilweng. ₂₂Le tla hlahisa phooko ya sehlabelo sa sebe, kantle ho setjheso sa kamehla le ho nyehelo le tshelo.

₂₃Ka tsatsi la bone, le tla hlahisa dipohwana tse leshome, le dipheleu tse pedi, le dikonyana tse tona tse leshome le metso e mene, tse se nang sekodi, tse lemo se le seng, ₂₄hammoho le nyehelo le ditshelo tse etsetswang dipohwana le dipheleu, le dikonyana, ka palo ya tsona le ka taelo e beilweng. ₂₅Le tla hlahisa phooko ya sehlabelo sa sebe, kantle ho setjheso sa kamehla le ho nyehelo le tshelo.

₂₆Ka tsatsi la bohlano, le tla hlahisa dipohwana tse robileng mono o le mong, le dipheleu tse pedi, le dikonyana tse tona tse leshome le metso e mene, tse se nang sekodi, tse lemo se le seng, ₂₇hammoho le nyehelo le ditshelo tse etsetswang dipohwana, le dipheleu, le dikonyana, ka palo ya tsona le ka taelo e beilweng. ₂₈Le tla hlahisa phooko ya sehlabelo sa sebe, kantle ho setjheso sa kamehla le ho nyehelo le tshelo.

₂₉Ka tsatsi la botshelela, le tla hlahisa dipohwana tse robileng meno e le mmedi, le dipheleu tse pedi, le dikonyana tse tona tse leshome le metso e mene, tse se nang sekodi, tse lemo se le seng, ₃₀hammoho le nyehelo le ditshelo tse etsetswang dipohwana, le dipheleu, le dikonyana, ka palo ya tsona le ka taelo e beilweng. ₃₁Le tla hlahisa phooko ya sehlabelo sa sebe, kantle ho setjheso sa kamehla le ho nyehelo le tshelo.

₃₂Ka tsatsi la bosupa, le tla hlahisa dipohwana tse supileng, le dipheleu tse pedi, le dikonyana tse tona tse leshome le metso e mene, tse se nang sekodi, tse lemo se le seng, ₃₃hammoho le nyehelo le ditshelo tse etsetswang dipohwana, le dipheleu, le dikonyana, ka palo ya tsona le ka taelo e beilweng. ₃₄Le tla hlahisa phooko ya sehlabelo sa sebe, kantle ho setjheso sa kamehla le ho nyehelo le tshelo.

₃₅Ka tsatsi la boroba meno e le mmedi, le tla ba le phutheho e phahameng; le ke ke la etsa mosebetsi le o mong ka lona. ₃₆Le tla hlahisa sehlabelo se tjheswang ka mollo, e be setjheso se monko o monate ho Jehova, e leng poho e le nngwe, le pheleu e le nngwe, le dikonyana tse tona tse supileng, tse se nang sekodi, tse lemo se le seng; ₃₇le nyehelo le ditshelo tsa poho, le tsa pheleu, le tsa konyana, ka palo ya tsona le ka taelo e beilweng. ₃₈Le tla hlahisa phooko ya sehlabelo sa sebe, kantle ho setjheso sa kamehla le nyehelo le tshelo.

₃₉Ke wona mahlabelo ao le tla a hlabela Jehova meketeng ya lona, e be ditjheso tsa lona, le dinyehelo tsa lona, le ditshelo tsa lona, le mahlabelo a lona a kgotso, kantle ho a etswang bakeng sa phetho ya maikano, kapa a nyehelwang feela ka ho ithatela ha motho. ₄₀Moshe a bolella bana ba Iseraele tsohle tseo Jehova a mo laetseng tsona.