NUMERE 28

₁Jehova a bua le Moshe, a re: ₂Laela bana ba Iseraele, o re ho bona: Sehlabelo sa ka le sejo sa ditjheso tsa ka tse nang le monko o monate ho nna, le bone hore le ntlhahisetse tsona ka nako ya tsona.

₃Ere ho bona: Ke sena setjheso seo le tla se hlahisetsa Jehova: Ka tsatsi le leng le le leng le tla hlahisa dikonyana tse tona tse pedi tse se nang sekodi, tse lemo se le seng, e nne e be setjheso sa kamehla. ₄O tla hlaba konyana e nngwe hosasa, e nngwe mantsiboya; ₅nyehelo e be ya boshome ba efa ya lefi la phofo le dubilweng tekanyong ya bone ya hine ya ole e hlwekileng. ₆Ke setjheso sa kamehla se nnileng sa hlahiswa thabeng ya Sinai; ke sehlabelo se tjheswang ka mollo, se monko o monate ho Jehova. ₇Tshelo e tla ba ya karolo ya bone ya hine hodima konyana ya hosasa; tshelo ya veine e hlwekileng o tla e etsetsa Jehova nqalong e halalelang. ₈O tla hlaba konyana ya bobedi mantsiboya, e ena le nyehelo le tshelo tse jwaloka tsa hosasa; ke sehlabelo se tjheswang ka mollo, se monko o monate ho Jehova.

₉Ka tsatsi la Sabatha, le tla hlaba konyana tse tona tse pedi tse lemo se le seng, tse se nang sekodi; le tla hlahisa nyehelo ya boshome ba bobedi ba efa ya lefi la phofo le dubilweng ka ole, le yona tshelo ya yona. ₁₀Ke sona setjheso sa Sabatha, sa Sabatha e nngwe le e nngwe, kantle ho setjheso sa kamehla le tshelo ya sona.

₁₁Qalong ya dikgwedi tsa lona, le tla hlahisetsa Jehova setjheso sa dipohwana tse pedi, le pheleu e le nngwe, le dikonyana tse tona tse supileng tse lemo se le seng, tse se nang sekodi; ₁₂le nyehelo ya pohwana e nngwe le e nngwe, e leng karolo tse tharo tsa boshome ba lefi la phofo le dubilweng ka ole; ₁₃le nyehelo ya pheleu, e leng karolo tse pedi tsa boshome ba lefi la phofo le dubilweng ka ole; le nyehelo ya konyana e nngwe le e nngwe, e leng karolo e le nngwe ya boshome ba lefi la phofo le dubilweng ka ole. Ke setjheso, ke sehlabelo se tjheswang ka mollo, se monko o monate ho Jehova. ₁₄Ditshelo e tla ba halofo ya hine ka pohwana; le karolo ya boraro ya hine ka pheleu; le karolo ya bone ya hine ka konyana. Ke sona setjheso sa qalo ya kgwedi, sa kgwedi e nngwe le e nngwe, sa dikgwedi tsohle tsa selemo. ₁₅Ho tla hlabelwa Jehova phooko, e be sehlabelo sa sebe, kantle ho setjheso sa kamehla le tshelo ya sona.

₁₆Ka kgwedi ya pele, ka tsatsi la leshome le metso e mene la kgwedi, e tla ba Paseka ya Jehova. ₁₇Ka tsatsi la leshome le metso e mehlano la kgwedi, mokete o tla ba teng. Ka matsatsi a supileng ho tla jewa mahobe a se nang ditomoso. ₁₈Ka tsatsi la pele, le tla ba le phutheho e kgethehileng; le ke ke la etsa mosebetsi le o mong ka lona. ₁₉Le tla etsetsa Jehova sehlabelo se tjheswang ka mollo, e be setjheso, ka pohwana tse pedi, le pheleu, le dikonyana tse tona tse supileng tse se nang sekodi, tse lemo se le seng. ₂₀Le tla di ekeletsa ka nyehelo ya lefi la phofo le dubilweng ka ole, e ba karolo tse tharo tse boshome ka pohwana, le karolo tse pedi tsa boshome ka pheleu, ₂₁le karolo e le nngwe ya boshome ka konyana e nngwe le e nngwe ya tse supileng. ₂₂Le tla hlaba phooko, e be sehlabelo sa sebe, le tle le etsetswe pheko. ₂₃Le tla hlahisa mahlabelo ao, kantle ho setjheso sa hosasa, e leng setjheso sa kamehla. ₂₄Le tla a hlahisa ka tsatsi le leng le le leng, ka matsatsi a supileng, e be sejo sa sehlabelo se tjheswang ka mollo, se monko o monate ho Jehova. ₂₅Di tla hlahiswa kantle ho setjheso sa kamehla le tshelo ya sona. Ka tsatsi la bosupa, le tla ba le phutheho e kgethehileng, mme le ke ke la etsa mosebetsi le o mong ka tsatsi leo.

₂₆Ka tsatsi la dithakangwaha, ha le hlahisetsa Jehova nyehelo e ntja, e leng ka mokete wa lona wa diveke, le tla ba le phutheho e kgethehileng; le ke ke la etsa mosebetsi le o mong ka lona. ₂₇Le tla hlahisa, e be setjheso se monko o monate ho Jehova, dipohwana tse pedi, le pheleu, le dikonyana tse tona tse supileng tse lemo se le seng. ₂₈Le tla di ekeletsa ka nyehelo ya lefi la phofo le dubilweng ka ole, e be karolo tse tharo tsa boshome ka poho, le karolo tse pedi tsa boshome ka pheleu, ₂₉le karolo e le nngwe ya boshome ka konyana e nngwe le e nngwe ya tse supileng. ₃₀Le tla hlaba phooko, le tle le etsetswe pheko. Le tla hlahisa mahlabelo ao, kantle ho ditjheso tsa kamehla le dinyehelo tsa tsona. ₃₁Konyana tsa lona le tla kgetha tse se nang sekodi, mme le tla hlahisa le ditshelo tsa tsona.