NUMERE 15

₁Jehova a bua le Moshe, a re: ₂Bolella bana ba Iseraele, o re ho bona: Etlare ha le kene lefatsheng la kaho ya lona, leo ke tlang ho le nea lona, ₃ha le rata ho hlahisetsa Jehova sehlabelo se tjheswang ka mollo, kapa e leng setjheso, kapa e leng sehlabelo sa ho phetha maikano, kapa sa boithatelo, kapa le rata ho hlahisetsa Jehova monko o monate meketeng ya lona e kgethehileng, ka makgomo kapa ka manku a lona, ₄motho ya hlahisetsang Jehova sehlabelo sa hae, o tla hlahisa nyehelo ya karolo ya leshome ya lefi la phofo le dubilweng ka karolo ya bone ya hine ya ole; ₅le tshelo ya karolo ya bone ya hine ya veine, eo o tla e hlahisa hammoho le setjheso kapa sehlabelo, bakeng sa konyana e nngwe le e nngwe. ₆Bakeng sa pheleu, o tle o hlahise nyehelo ya dikarolo tse pedi tsa leshome tsa phofo e dubilweng ka karolo ya boraro a hine ya ole; ₇le tshelo ya karolo ya boraro ya hine ya veine, e be monko o monate ho Jehova. ₈Ha o hlahisa pohwana e be setjheso, kapa sehlabelo se phethang maikano, kapa sehlabelo sa teboho ho Jehova, ₉ho tliswe, hammoho le pohwana, nyehelo ya dikarolo tse tharo tsa leshome tsa phofo e dubilweng ka ole e lekanang halofo ya hine; ₁₀nyehelo ya tshelo e be halofo ya hine ya veine; ke sehlabelo se hlahiswang ka mollo, se monko o monate ho Jehova. ₁₁Ho nno ho etswe jwalo bakeng sa pohwana e nngwe le e nngwe, kapa sa pheleu e nngwe le e nngwe, kapa sa konyana e nngwe le e nngwe, kapa sa potsanyane e nngwe le e nngwe. ₁₂Le etse jwalo ka palo ya tseo le di hlahisang, bakeng sa e nngwe le e nngwe, ka palo ya tsona. ₁₃Bohle ba tswaletsweng ha eno, ba nno etsa dintho tseo jwalo, mohla ba hlahisang sehlabelo se etswang ka mollo, se monko o monate ho Jehova. ₁₄Ha motho wa ditjhaba a aheletse hara lona, kapa a tla nne a ahe hara lona kamehla, ha a rata ho hlahisa sehlabelo se etswang ka mollo, se monko o monate ho Jehova, a etse kamoo lona le etsang kateng. ₁₅Molao o tla ba mong wa phutheho, wa lona le wa moditjhaba ya aheletseng hara lona; e be molao wa kamehla melokong ya lona; kamoo ho leng kateng bakeng sa lona, le bakeng sa modijhaba ho tla ba jwalo pela Jehova. ₁₆Molao o tla ba mong le mokgwa o tla ba mong ho lona le ho moditjhaba ya aheletseng hara lona.

₁₇Jehova a bua le Moshe, a re: ₁₈Bua le bana ba Iseraele, o re ho bona: Etlere ha le fihlile naheng eo ke le isang ho yona, ₁₉mohla le jang bohobe ba naha eo, le tle le hlahisetse Jehova kabelo. ₂₀Le hlahise kabelo ya polokwe, e be dilopotsiya tsa hlama ya lona; ho be jwaloka kabelo e nkwang seotlong. ₂₁Melokong yohle ya lona, le tla abela Jehova kabelo ya hlama ya lona ya ho qala.

₂₂Ekare ha le sitilwe ka ho se tsebe, le sa ka la phetha melao kaofela eo Jehova a e boleletseng Moshe, ₂₃tsohle tseo Jehova a le laetseng tsona ka molomo wa Moshe, haesale e le letsatsing leo Jehova a le laetseng tsona, ho isa melokong yohle ya lona; ₂₄ekare ha le sitilwe ka ho se tsebe, phutheho e sa ka ya lemoha, phutheho yohle e tla hlahisa sehlabelo sa pohwana, e be setjheso se monko o monate ho Jehova, hammoho le nyehelo ya sona le tshelo ya sona e loketseng; mme le teng e hlahise phooko ya sehlabelo sa sebe. ₂₅Moprista a etse pheko bakeng sa phutheho yohle ya bana ba Iseraele, mme ba tla tshwarelwa; hobane ke sebe se entsweng ka ho se tsebe, mme ba tlisitse sehlabelo sa bona e le sehlabelo se etsetswang Jehova ka mollo, le sehlabelo sa sebe pela Jehova, bakeng sa sebe se entsweng ka ho se tsebe. ₂₆Phutheho yohle ya bana ba Iseraele e tla tshwarelwa, le yena moditjhaba ya aheletseng hara bona, kahobane setjhaba sohle se sitilwe ka ho se tsebe.

₂₇Ekare ha ho sitilwe motho a le mong ka ho se tsebe, o tla hlahisa sethojana sa podi se selemo se le seng, e be sehlabelo sa sebe. ₂₈Moprista o tla etsa pheko bakeng sa motho ya sitetsweng Jehova ka ho se tsebe; hobane a etsetswe pheko o tla tshwarelwa. ₂₉Le tle le be le molao o le mong bakeng sa ya ka sitwang ka ho se tsebe, kapa ke ya tswetsweng hara bana ba Iseraele, kapa ke moditjhaba ya aheletseng hara lona. ₃₀Empa motho ya etsang ka boomo, kapa e leng ya tswaletsweng ha eno, kapa e leng moditjhaba, yena o hobosa Jehova; motho eo o tla tloswa setjhabeng sa hae. ₃₁Hobane o nyedisitse lentswe la Jehova, o tlotse molao wa hae, motho eo o tla kgaolwa ruri; o tla jara bokgopo ba hae.

₃₂Bana ba Iseraele ha ba sa ntsane ba le feelleng, ba tshwara monna a rwalla patsi ka tsatsi la Sabatha. ₃₃Ba mo tshwereng a rwalla patsi, ba mo tlisa ho Moshe le Aarone, le ho phutheho kaofela. ₃₄Yaba o a lebelwa, kahobane ho ne ho eso ho bolelwe hoba e ka kgona a etswe jwang. ₃₅Yaba Jehova o re ho Moshe: Motho eo o tshwanetse ho bolawa; phutheho yohle e tla mo tlepetsa ka majwe kantle ho diahelo. ₃₆Yaba phutheho yohle e mo isa kantle ho diahelo, ya mo tlepetsa ka majwe, a ba a shwa, kamoo Jehova a neng a laetse Moshe kateng.

₃₇Jehova a bua le Moshe, a re: ₃₈Bua le bana ba Iseraele, o ba laele hore ba iketsetse ditjellane mephethong ya diaparo tsa bona, melokong yohle ya bona, mme ba manamise leqhwele le leputswa tjellaneng e mephethong ya diaparo tsa bona. ₃₉Tjellane eo e rokilweng, etlere ha le e tadima, le hopole ditaelo tsohle tsa Jehova, le di etse; le ke ke la batla tsa boithatelo ba dipelo tsa lona le ba mahlo a lona, kamoo bo ntseng bo le febisa kateng; ₄₀hore le tle le hopole, mme le etse melao ya ka kaofela, mme le kgethehele Modimo wa lona. ₄₁Ke nna Jehova, Modimo wa lona, ya le ntshitseng naheng ya Egepeta, hore ke be Modimo wa lona. Ke nna Jehova, Modimo wa lona.