NUMERE 11

₁Setjhaba sa korotla, mme ha eba hobe ditsebeng tsa Jehova; Jehova a utlwa, mme kgalefo ya hae ya tuka; mollo wa Jehova wa tuka hara bona, wa qeta karolo ya diahelo e kamorao. ₂Yaba setjhaba se howeletsa ho Moshe, mme Moshe a rapela Jehova, mme mollo wa tima. ₃Yaba sebaka seo se rewa lebitso la Tabeera, kahobane mollo wa Jehova o ne o tukile hara bona.

₄Le bona baditjhaba ba leng hara bona ba tshwarwa ke boshwata; esita le bona bana ba Iseraele ba boela ba lla, ba re: ₅Ke mang ya tla re fa nama, re je? Re sa hopotse dihlapi tseo re neng re di ja Egepeta re sa di reke, le dikomkomere, le mahapu, le sholoto, le dieie, le sofothafotha; ₆mme jwale, meya ya rona e omeletse; ha ho sa le letho; mahlo a rona a se a bona manna feela.

₇Manna e ne e ka hlaku ya koriandere, mme ka mmala e ne e tshwana le badela; ₈setjhaba se ne se qhalana, se tle se e thonake; ba ne ba e sila ka malwala, kapa ba e tula ka boloko; ba ne ba e pheha dipitseng, kapa ba ne ba etsa dinkgwa ka yona; ka hanong e ne e utlwahala jwaloka senkgwa se dubilweng ka ole. ₉Ha phoka e ne e theohela hodima diahelo bosiu, manna le yona e ne e theohela hodima tsona.

₁₀Jwale Moshe a utlwa setjhaba se lla ka matlung wohle a sona, e mong le e mong monyako wa tente ya hae. Le yona kgalefo ya Jehova ya tuka hampe. Yaba Moshe o a hlabeha. ₁₁Moshe a re ho Jehova: A ke ka baka lang o swabisang mohlanka wa hao na? Ke ba baka lang ha ke sa ka ka fumana mohau pela mahlo a hao, haele moo o ntjarisitse phahlo ya setjhaba sena kaofela? ₁₂A hleka ke nna ke emotseng setjhaba sena sohle na? A ke nna ke se tswetseng, ha o tla re: Se jare ka sefubeng sa hao, jwaloka moanyesi ha a jara ngwana ya anyang, se be se fihle naheng eo o hlapanyeditseng bontata sona hoba o tla se nea yona na? ₁₃Na ke tla nka kae nama, ke tle ke fe setjhaba sena sohle; hobane bohle ba itelela ho nna, ba re: Re fe nama, re tle re je! ₁₄Nna ke nnotshi, ke sitwa ho jara setjhaba sena kaofela, hobane se nkimela ruri. ₁₅Ha ekaba o nketsa jwalo, oho, ke a o rapela, o mpolaye, ha ekaba ke fumane mohau pela hao; e, o mpolaye, ke tle ke se ke ka bona bomadimabe ba ka!

₁₆Yaba Jehova o re ho Moshe: Mphuthele banna ba mashome a supileng ba baholo ba Iseraele, bao o ba tsebang hoba ke baholo ba setjhaba le ba nang le matla hodima sona; o ba tlise pela tente ya pokano, hore ba tle ba itlhahise le wena teng. ₁₇Ke tla theoha, ke bue le wena teng; ke tla nka moyeng o hodima hao, mme ke tla o bea hodima bona; ba tla jara le wena phahlo ya setjhaba, mme ha o sa tla e jara o nnotshi. ₁₈Haele setjhaba, e re ho sona: Le itlhwekisetse letsatsi la hosasane, le tle le je nama, hobane le kile la lla ditsebeng tsa Jehova, la re: Ke mang ya tla re jesa nama, athe re ne re iketla Egepeta? ₁₉Jehova o tla le nea nama, mme le tla e ja; le tla e ja, e seng ka tsatsi le le leng, leha e le ka matsatsi a mabedi, leha e le ka matsatsi a mahlano, leha e le ka matsatsi a leshome, leha e le ka matsatsi a mashome a mabedi; ₂₀tjhe, empa e tla ba ka kgwedi e tletseng, ho fihlela ha nama e etswa dinkong tsa lona, mme e nyekisa dipelo tsa lona; hobane le lahlile Jehova ya leng hara lona, la lla pela hae, la re: A ke ka baka lang ha re tswile Egepeta?

₂₁Moshe a re: Setjhabeng seo ke leng hara sona, ho na le banna ba dikete tse makgolo a tsheletseng, mme o re: Ke tla ba fa nama, mme ba tla e ja ka kgwedi e tletseng. ₂₂Na ba tla hlabelwa manku le makgomo, hore a ba lekane na? Na ba tla bokellelwa dihlapi tsohle tsa lewatle hore di ba lekane na? ₂₃Jehova a re ho Moshe: A letsoho la Jehova le honyeditswe na? Jwale o tla bona hore na lentswe la ka ho wena le tla etsahala, kapa tjhe.

₂₄Yaba Moshe o a tswa, a phetela setjhaba mantswe a Jehova; a kgetha ho baholo ba setjhaba banna ba mashome a supileng, mme a ba emisa ba teela tente hare. ₂₅Jehova a theoha lerung, a bua le yena, a nka moyeng o leng hodima Moshe, a o bea hodima baholo ba mashome a supileng. Eitse hobane moya o dule hodima bona, hang ba hla ba porofeta; empa ba se ke ba hlola ba pheta.

₂₆Ho ne ho setse banna ba babedi diahelong, lebitso la e mong e le Eldade, la e mong e le Medade, mme moya wa dula hodima bona; leha e ne e le ba kgethilweng, ba ne ba sa ka ba ya tenteng; mme ba porofeta diahelong. ₂₇Yaba mohlankana e mong o titima, a bolella Moshe, a re: BoEldade le Medade ba porofeta diahelong. ₂₈Joshua, mora Nune, e neng e le mohlanka wa Moshe haesale botjheng ba hae, a bua, a re: Morenaka, Moshe, ba thibele! ₂₉Moshe a re: Na o a mpoulella na? O! hoja setjhaba kaofela sa Jehova se ka fela sa porofeta, mme Jehova a bea moya wa hae hodima bona! ₃₀Mme Moshe a tloha, a ya diahelong, yena le baholo ba Iseraele.

₃₁Jehova a fokisa moya o tlisang dikwekwe tse tswang ka nqa lewatleng, wa di dihela fatshe pela diahelo, sebaka se ka bang sa leeto la letsatsi le le leng ka nqa e nngwe, le sebaka sa leeto la letsatsi le le leng ka nqa e nngwe hape, ka nqa tsohle ho diahelo. Ho teteana ha tsona, ho tloha fatshe, e ne e batla e le ditswe tse pedi. ₃₂Setjhaba sa ema, tsatsi leo lohle, le bosiu bohle, le letsatsi lohle la hosasane, se ntse se bokella dikwekwe; eo ho neng ho thwe, o di bokeletse hanyenyane, o ne a na le dihomere tse leshome tsa tsona. Ba di aneha ka nqa tsohle ho diahelo. ₃₃Empa nama ha e sa ntse e le menong a bona, e eso ho hlafunwe, kgalefo ya Jehova ya tukela setjhaba, mme Jehova a otla setjhaba ka kotsi e kgolo haholo. ₃₄Nqalo eo ya rewa lebitso la Kibrothe-Hattaava (phupu ya boshwata), kahobane ke moo ho ileng ha epelwa batho ba hapilweng ke boshwata.

₃₅Setjhaba sa tloha Kibrothe-Hattaava, sa tla Hatserothe, mme sa emisa Hatserothe.