Tsietsi tse ding tse hlotsweng ke Nehemia.
1Sanballate, le Tobia, le Gesheme Moarabe, le dira tse ding tsa rona, eitse ha ba utlwa hore ke tsositse lerako, le hore ha ho sekgeo se setseng ho lona, — leha ke ne ke eso ho kenye mamati a menyako ho fihlela motsotso oo — 2Sanballate le Gesheme ba romela ho nna, ba re: Tloo, re teane le wena metseng ya sekgutlo sa Ono. Athe ba ne ba rerile hore ba tla nntsha kotsi. 3Ka ba romela manqosa, ka re: Ke tshwerwe ke mosebetsi o moholo, ke sitwa ho theoha; nka emisetsang mosebetsi ka ho o tlohela le ka ho theohela ho lona? 4Ba nthomela taba eo e le nngwe makgetlo a mane, mme le nna ka nna ka ba romela karabo e le nngwe. 5Ke ha Sanballate a boela a nthomela taba eo la bohlano ka mohlanka wa hae, a tla a tshwere lengolo le phetlilweng letsohong la hae, 6leo ho ngodilweng ho lona taba e reng: Ho tumile hara ditjhaba, le yena Gashmu o rialo, hore wena le Bajuda le rerile morero wa ho kweneha; ke kahoo o tsosang lerako; leshano le re, ke wena o tla ba morena wa bona, 7o bile o beile baporofeta ho o bolela Jerusalema, ka ho re: Morena o teng Juda. Mme jwale, taba tseo di tla phetelwa morena; ha ho le jwalo, tloo jwale, mme re rere hammoho. 8Yaba ke romela ho yena, ka re: Ha ho taba e teng ya tseo o di bolelang; o di qapile pelong ya hao. 9Hobane efela bohle ba ne ba leka ho re tshosa, ba re: Matsoho a bona a tle a tepellele mosebetsi, hore o tle o se ke wa etswa.
Oho jwale, Modimo wa ka, o ke o matlafatse matsoho a ka!
10Jwale, ka kena tlung ya Shemaia, mora Delaia, mora Mehetabeele; o ne a ikwaletse kateng. A re ho nna: A re phutheheleng tlung ya Modimo, kahare ho tempele, mme re kwale mamati a tempele; hobane ba ya tla o bolaya; bosiung bona bona ba ya tla o bolaya. 11Ka re: Hleka motho ya kang nna a ka baleha na? Mme o kae motho ya kang nna ya ka kenang tempeleng, hore a phele? Nke ke ka ba ka kena teng. 12Ka tseba hoba Modimo ha o a ka wa mo roma, a mpile a boletse boporofeta boo ho ntwantsha ka jona, kahobane Sanballate le Tobia ba ne ba mo lefa. 13Seo a neng a lefelwa sona, e ne e le hore ke tshabe, mme ke etse sebe ka ho etsa jwalo, ba tle ba fihlele seo ba ka senyang lebitso la ka ka sona, ka ho nketselletsa.
14Oho, Modimo wa ka, hopola Tobia le Sanballate le diketso tsa bona, le yena Noadia moporofeta wa mosadi, le baporofeta ba bang ba lekileng ho ntshabisa!
15Haele lerako, la phetheha ka la mashome a mabedi a metso e mehlano la kgwedi ya Elule, le sebeditswe ka matsatsi a mashome a mahlano a metso e mmedi. 16Eitse ha dira tsohle tsa rona di utlwa, tjhaba tsohle tse re teetseng hare tsa tshoha, mme tsa nyahama dipelo; tsa tseba hoba mosebetsi oo o entswe ke Modimo wa rona.
17Hape, mehleng eo, ho ne ho na le baholo ba bang ba Juda ba neng ba romela mangolo a mangata ho Tobia, ba boele ba fihlelwe ke mangolo a Tobia. 18Hobane ho ne ho le batho ba bangata ba Juda ba neng ba ikopantse le yena ka kano, kahobane e ne e le mokgwenyana wa Shekania, mora Arake; mme mora hae Johanane o ne a nyetse moradi wa Meshullame, mora Berekia. 19Hape, ba ne ba mmolela ka taba tse ntle pela ka; ba ne ba mo sebela dipolelo tsa ka; mme Tobia o ne a romela mangolo ho ntshabisa.
