MAREKA 2

₁Eitse hobane ho fete matsatsi a mang, Jesu a boela a kena Kapernauma, mme ha utlwahala hobane o tlung. ₂Batho ba bangata ba phakisa ba phuthehela teng, sebaka sa ba sa hlokahala le pela monyako; mme Jesu a ruta lentswe la Modimo.

₃Ha fihla ba tlisang ho yena motho ya omeletseng ditho, a jerwe ke batho ba bane. ₄Mme kahobane ba ne ba sitwa ke bongata ho atamela Jesu, ba phunya marulelo a ntlo eo a leng ho yona, mme ha ba a phuntse, ba lepelletsa diphate tseo ya omeletseng ditho a robetseng ho tsona. ₅Jesu ha a bona tumelo ya bona, a bolella ya omeletseng ditho, a re: Ngwana ka, o tshwaretswe dibe tsa hao. ₆Bangodi ba bang ba ne ba dutse moo, ba nyatsa ka dipelong tsa bona, ba re: ₇Enwa o buelang jwalo? O a nyefola! Ke mang ya ka tshwarelang motho dibe, haese Modimo o nnotshi? ₈Jesu a lemoha kapele, ka moya wa hae, hobane ba hopotse jwalo ka ho bona, mme a re ho bona: Le hopolelang jwalo ka dipelong tsa lona? ₉Na haele ho re ho ya omeletseng ditho: O tshwaretswe dibe tsa hao, e le ho re: Ema, nka diphate tsa hao, o tsamaye, ho bonolo ke hofe na? ₁₀Jwale — hore le tsebe hoba Mora motho o na le matla lefatsheng a ho tshwarela batho dibe — a re ho ya omeletseng ditho: ₁₁Ke re ho wena: Tloha o eme, o nke diphate tsa hao, o ikele tlung ya hao. ₁₂A ema kapele, a nka diphate, a tswa pontsheng ho bona bohle. Ba hlollwa bohle, ba rorisa Modimo, ba re: Ha re eso ho ka re bona ho jwalo!

₁₃Jesu a boela a tloha, a ya nqa lewatleng, mme bongata bohle ba ya ho yena, mme a ba ruta. ₁₄Eitse ha a iphetela, a bona Levi, mora Alfea, a dutse pela ntlo ya lekgetho; a re ho yena; Ntatele. Yaba Levi o ema, a mo latela.

₁₅Yare ha Jesu a dutse dijong, tlung ya Levi, balekgetho ba bangata le baetsadibe ba dula dijong le Jesu le barutuwa ba hae; hobane batho ba ne ba le bangata, mme ba ne ba mo latela. ₁₆Yare ha bangodi le bafarisi ba mmona a eja le balekgetho le baetsadibe, ba re ho barutuwa ba hae: O jelang le balekgetho le baetsadibe, o nwelang le bona? ₁₇Jesu ha a utlwa tseo, a re ho bona: Ba phelang hantle ha ba batle ngaka, empa e batlwa ke ba kulang; ha ke a tla ho bitsa ba lokileng, empa e le baetsadibe.

₁₈Barutuwa ba Johanne le ba bafarisi ba ne ba itima dijo, mme ba tla ho Jesu, ba re ho yena: Barutuwa ba Johanne le ba bafarisi ba itimelang dijo, kanthe barutuwa ba hao ha ba itime tsona? ₁₉Jesu a re ho bona: Na balekane ba monyadi ba ka itima dijo, ha monyadi a sa le ho bona na? Ba ke ke ba itima dijo, monyadi a sa le ho bona. ₂₀Empa nako e tla tla, eo monyadi a tla tloswa ho bona; mohlang oo ba tla itima dijo. ₂₁Ha ho motho ya rokellang setsiba se setjha seaparong se tsofetseng; ha ho ka etswa jwalo, setsiba se setjha se ka hahola ho tsofetseng, sa eketsa taboho. ₂₂Hape, ha ho motho ya tshelang veine e ntjha makukeng a kgale, hobane veine e ntjha e ka phatlola makuka, mme veine ya tsholoha, le ona makuka a timela; empa veine e ntjha e tshelwa makukeng a matjha.

₂₃Ka tsatsi le leng, e neng e le la Sabatha, yare ha a feta hara masimo, barutuwa ba hae ba qala ho kga diqwapi ba ntse ba tsamaya. ₂₄Bafarisi ba re ho yena: Bona, ba etsetsang ka Sabatha ho sa dumellwang. ₂₅Jesu a re ho bona: Hleka ha le eso ho bale ho entsweng ke Davida, mohla a hlokang dijo, a lapile le bao a nang le bona; ₂₆kamoo a neng a kene tlung ya Modimo kateng, mehleng ya Abiathare, moprista e moholo, a ja mahobe a pontsha, a sa lokelang ho jewa, haese ke baprista ba nnotshi, a ba a fa le ba nang le yena? ₂₇Jesu a re ho bona: Sabatha a entswe ka baka la motho, motho ha a etswa ka baka la Sabatha. ₂₈Ha ho le jwalo, Mora motho ke morena le wa Sabatha.