MATTHEU 27

₁Yare kameso, baprista bohle ba baholo le baholo ba setjhaba ba rera Jesu ho mmolaya. ₂Eitse hobane ba mo tlame, ba ya le yena, ba mo neela Ponse Pilato, mmusisi.

₃Jwale, Judase ya mo ekileng, ha a bona hoba Jesu o tswilwe, a inyatsa; a busetsa ditjhelete tsa silefera tse mashome a mararo ho baprista ba baholo le ho baholo; ₄a re: Ke sitilwe ha ke ekile madi a se nang molato. Ba re: E ka ba eng ho rona? Ho iponele wena teng. ₅Ebile ke ha a lahlela ditjhelete tsa silefera tempeleng, a tloha, a iphenetha. ₆Baprista ba baholo ba nka ditjhelete, ba re: Ha ho a tshwanela hore di kenngwe polokelong ya tempele, hobane ke theko ya madi. ₇Mme hobane ba rere, ba reka tshimo ya mmopi wa dipitsa ka tsona, ho epela baditjhaba teng. ₈Ka baka leo, tshimo eo e bitsitswe Tshimo ya madi, ho fihlela kajeno. ₉Ke moo ho etsahetseng ho boletsweng ke moporofeta Jeremia, ha a re: Ba nkile ditjhelete tse mashome a mararo, theko ya ya lekanntsweng, eo bara ba Iseraele ba mo lekantseng jwalo, ₁₀ba di ntshitse ho reka tshimo ya mmopi, jwalokaha Morena a ne a ntaetse.

₁₁Haele Jesu, a ema pela mmusisi, mme mmusisi a mmotsa, a re: Na o morena wa Bajuda na? Jesu a re ho yena: O boletse teng. ₁₂Empa leha a ne a qoswa ke baprista ba baholo le ke baholo, ha a ka a araba letho. ₁₃Yaba Pilato o re ho yena: Na ha o utlwe ha ba o qosa hakakale na? ₁₄Empa ha a ka a araba lentswe leha le le leng; mmusisi a ba a makala haholo.

₁₅E ne e le mokgwa wa mmusisi, ka mokete oo, ho lokollela setjhaba motlamuwa e mong, eo ba mo ratang. ₁₆Mohlang oo, ho bo ho le motlamuwa e mong ya tumileng, ya bitswang Barabase. ₁₇Ha ba phuthehile, Pilato a re ho bona: Le rata ha ke le lokollela ofe, haele Barabase, kapa Jesu ya bitswang Kreste? ₁₈Hobane o ne a tseba hobane ba mo neetse yena ka mona.

₁₉Yare ha a sa dutse setulong sa kahlolo, mosadi wa hae a romela ho yena, a re: O se ke wa ba le taba, leha e le e nngwe, le motho eo ya lokileng; hobane ke utlwile bohloko bo boholo ka baka la hae, ha ke lora kajeno.

₂₀Empa baprista ba baholo le baholo ba hlohlelletsa bongata hore ba kope Barabase, Jesu yena a bolawe. ₂₁Mmusisi a boela a bua, a re ho bona: Le rata ha ke le lokollela ofe ho ba babedi bao? Ba re: Barabase. ₂₂Pilato a re ho bona: Mme Jesu, ya bitswang Kreste, yena ke mo etse jwang na? Bohle ba re ho yena: A thakgiswe! ₂₃Mmusisi a re: Na o entse bobe bofe? Empa ba totisa ho howa, ba re: A thakgiswe! ₂₄Jwale, Pilato ha a bona hobane ha a thuse letho, le hoba moferefere o ntse o tota, a nka metsi, a hatlela pontsheng ho bongata, a re: Ha ke na molato mading a motho eo ya lokileng; ho iponele lona. ₂₅Setjhaba kaofela sa araba, sa re: Madi a hae a be hodima rona, le hodima bana ba rona.

₂₆Jwale, a ba lokollela Barabase; haele Jesu, eitse hobane a mo shape, a mo neela hore a thakgiswe.

₂₇Yaba bahlabani ba mmusisi ba isa Jesu kgotla, ba mmokellela sehlopha sohle sa bona. ₂₈Ba mo hlobodisa, ba ntoo mo apesa kobo e kgubedu. ₂₉Ba loha mofapahlooho wa meutlwa, ba mo rwesa wona hloohong; ba mo tshwarisa leqala letsohong la hae le letona, mme ba kgumama ka mangwele pela hae, ba mo soma, ba re: Dumela, morena wa Bajuda! ₃₀Ba mo tshwela ka mathe, ba nka leqala, ba mmata hloohong. ₃₁Eitse hobane ba mo some jwalo, ba mo hlobodisa kobo eo, ba mo apesa diaparo tsa hae, mme ba ya le yena ho mo thakgisa.

₃₂Ha ba etswa, ba fumana monna wa Sirene, ya bitswang Simone, ba mo qobella hore a jare sefapano sa Jesu. ₃₃Eitse hobane ba fihle thoteng e bitswang Golgotha, e leng ho re, thota ya lehata, ₃₄ba mo nea asene e tswakilweng ka nyooko, hore a nwe; empa hobane a e latswe, a hana ho nwa.

₃₅Yare hobane ba mo thakgise, ba arolelana diaparo tsa hae, ba di laola ka lotho; hore ho etsahale ho boletsweng ke moporofeta, ha a re: Ba arolelane diaparo tsa ka, mme ba laotse kobo ya ka ka lotho. ₃₆Ba ntoo dula, ba mo lebela moo.

₃₇Ka hodimo ho hlooho ya hae ba maneha lengolo le bolelang molato wa hae, le reng: Enwa ke Jesu, morena wa Bajuda.

₃₈Jwale, ba thakgisa le yena disenyi tse pedi, se seng ka letsohong le letona, se seng ka ho le letshehadi.

₃₉Ba fetang ba ne ba mo nyefola, ba mo sisinyetsa dihlooho, ba re: ₄₀Wena, ya qhaqhang tempele, o reng o tla e tsosa ka matsatsi a mararo, ipholose he! Ha o le Mora Modimo, theoha sefapanong! ₄₁Ka mokgwa o jwalo, le bona baprista ba baholo ba mo soma, ba ena le bangodi le baholo, ba re: ₄₂O pholositse ba bang, yena o sitwa ho ipholosa! Haele yena morena wa Iseraele, a ke a theohe jwale sefapanong, mme re tla dumela ho yena. ₄₃O tshepile Modimo; a o mo lwele jwale, ha o mo rata; hobane o itse: Ke Mora Modimo. ₄₄Disenyi tse thakgisitsweng le yena, le tsona di ne di mo hlapaola jwalo.

₄₅Ka hora ya botshelela, lefifi la eba teng lefatsheng lohle, ho fihlela hora ya boroba mono o le mong. ₄₆Ha ho batlile ho ba hora ya boroba mono o le mong, Jesu a howa ka lentswe le leholo, a re: Eli, Eli, lamma sabakthani? ke ho re: Modimo wa ka, Modimo wa ka, o ntloheletseng? ₄₇Ba bang ho ba leng moo, ha ba utlwa, ba re: O bitsa Elia. ₄₈Yaba e mong wa bona o phakisa a matha, a nka seponse, a se tlatsa ka asene, a se hloma leqaleng, a mo nwesa. ₄₉Empa ba bang ba re: Lesang, re ke re bone na Elia o tla tla mo pholosa.

₅₀Empa Jesu a boela a meketsa ka lentswe le leholo, mme a neela moya.

₅₁Mme hang, lesela la tempele la hahoha kalehare, ho qala hodimo ho isa tlase; lefatshe la sisinyeha, le mafika a kgephoha; ₅₂mabitla a buleha, le ditopo tse ngata tsa bahalaledi ba robetseng tsa tsoha. ₅₃Eitse hobane ba tswe mabitleng, kamora tsoho ya hae, ba kena motseng o halalelang, mme ba ipontsha ho ba bangata.

₅₄Molaodi wa lekgolo, le ba nang le yena, ba ntseng ba lebela Jesu, ha ba bona tshisinyeho ya lefatshe le tse hlahileng, ba tshoha haholo, ba re: Eo e ne e le Mora wa Modimo ruri!

₅₅Basadi ba bangata ba ne ba le teng moo, ba tadimile ba le hole, e le ba neng ba mo latetse ha a etswa Galelea, ba mo sebeleditseng. ₅₆Ho bona ho ne ho le Maria Magdalena, le Maria, mma Jakobo le Jose, le mma bara ba Sebedea.

₅₇Yare mantsiboya, ha tla monna ya ruileng wa Arimathea, lebitso la hae e le Josefa; le yena e ne e le morutuwa wa Jesu. ₅₈A ya ho Pilato, a kopa setopo sa Jesu. Yaba Pilato o laela hore a se newe. ₅₉Eitse hobane a nke setopo, a se phuthela ka lesela le lesweu; ₆₀a se bea lebitleng la hae le letjha, leo a le betlileng lefikeng; mme hobane a phikolosetse lejwe le leholo pela monyako wa lebitla, a ikela. ₆₁Athe Maria Magdalena o ne a le moo le Maria e mong, ba dutse pela lebitla.

₆₂Ka hosasane, e leng tsatsi le hlahlamang la hlekelo, baprista ba baholo le bafarisi ba phuthehela ho Pilato, ₆₃ba re: Morena, re sa hopola hobane mothetsi eo, ha a sa phela, o ne a re: Ke tla tsoha ka letsatsi la boraro. ₆₄Ka baka leo, ako laele hore lebitla le tiiswe, letsatsi la boraro le be le tjhabe, esere mohlomong barutuwa ba hae ba mo utswa, mme ba re ho setjhaba: O tsohile bafung; leshano leo la ho fela le ne le tla fetisa la pele. ₆₅Pilato a re ho bona: Le na le balebedi; eyang, le tiise kamoo le tsebang kateng. ₆₆Yaba ba ya, ba tiisa lebitla, ba lebeletsa lejwe ka letshwao la bona, mme ba bea balebedi.