MATTHEU 15

₁Jwale, bangodi le bafarisi ba tla ho Jesu, ba etswa Jerusalema, ba re ho yena: ₂Barutuwa ba hao ba tlolelang mokgwa wa baholo, ha ba eja bohobe, ba sa hatlela? ₃A araba, a re ho bona: Le lona, le tlolelang molao wa Modimo ka mokgwa oo le o neanang na? ₄Hobane Modimo o laetse, wa re: Hlonepha ntatao le mmao. Hape ho itswe: Ya rohakang ntatae, leha e le mmae, a bolawe. ₅Kanthe lona le re: Ya reng ho ntatae, leha e le ho mmae: Sa tsa ka seo nka beng ke o thusa ka sona, ke se ke se abetse Modimo, ha a na molato, leha a sa hlonephe ntatae le mmae. ₆Le fetotse molao wa Modimo lefeela ka mokgwa oo le o neanang. ₇Baikaketsi, Esaia o ne a porofete tsa lona hantle, ha a itse: ₈Setjhaba sena se ntlhonepha ka molomo feela; empa pelo tsa bona li hole le nna. ₉Ba nkgumamella lefeela, ha ba ruta dithuto tseo e leng melao ya batho.

₁₀Yaba Jesu o bitsa bongata, a re ho bona: Mamelang, le utlwisise. ₁₁Se kenang ka hanong hase sona se silafatsang motho, empa se tswang hanong ke sona se silafatsang motho.

₁₂Jwale, barutuwa ba mo atamela, ba re ho yena: Na o a tseba hobane bafarisi ba ile ba hlonama ha ba utlwa polelo ya hao na? ₁₃A araba, a re: Setlama se seng le se seng se sa hlongwang ke Ntate ya mahodimong, se tla fotholwa. ₁₄Ba tloheleng; ke difofu tse tsamaisang difofu; sefofu ha se tsamaisa sefofu se seng, di tla wela sekoting tse pedi.

₁₅Petrose a bua, a re ho yena: O re qaqisetse setshwantsho seno. ₁₆Empa Jesu a re: Na le sa hloka kelello le lona na? ₁₇Na ha le utlwisise hobane tsohle tse kenang ka hanong di ya mpeng, di ntoo lahlelwa mohlabeng? ₁₈Empa tse tswang hanong di tswa pelong; ke tsona tse silafatsang motho. ₁₉Hobane mehopolo e mebe, dipolao, dipoko, mafebe, dikutso, diketselletso, le dinyefolo, di tswa pelong; ₂₀ke tsona dintho tse silafatsang motho; empa haele ho ja ka matsoho a sa hatlelwang, ha ho silafatse motho.

₂₁Yaba Jesu o tloha moo, a ikela naheng ya Tire le Sidone. ₂₂Teng ha hlaha mosadi wa Mokanana, ya tswang mathokong ao, a howa, a re: Nkutlwele bohloko, Morena, mora Davida! Moradi wa ka o tshwenngwa hampe ke motemona. ₂₃Empa Jesu a se ke a mo araba letho. Barutuwa ba hae ba atamela, ba mo rapela, ba re: Mo kgutlise, hobane o howa a ntse a re latela. ₂₄A mpa a araba, a re: Ha ke a romelwa ho motho, haese ho dinku tsa ntlo ya Iseraele tse timetseng. ₂₅Yaba mosadi o mo atamela, a kgumama, a re ho yena: Morena, nthuse!

₂₆Jesu a mpa a mo araba, a re: Ha ho hotle ho amoha bana bohobe ho ba akgela dintjanyana. ₂₇Mosadi a re: E, Morena; empa le tsona dintjanyana di ye di thole makumane a wang tafoleng ya beng ba tsona. ₂₈Jwale Jesu a araba, a re ho yena: Mosadi, tumelo ya hao e kgolo; a ho etswe ho wena kamoo o ratang kateng. Mme moradi wa hae a fola nakong yona eo.

₂₉Jesu a tloha teng, a atamela lewatle la Galelea, mme eitse hobane a nyolohele thabeng, a dula teng. ₃₀Matshwele a mangata a tla ho yena, a tlisa dihlotsa, le difofu, le dimumu, le dihole, le ba bang ba bangata; ba ba bea maotong a Jesu, mme a ba fodisa. ₃₁Yaba bongata boo bo a makala, ha bo bona dimumu di bua, le dihole di ena le mmele o motle, le dihlotsa di tsamaya, le difofu di bona, mme ba rorisa Modimo wa Iseraele.

₃₂Yaba Jesu o bitsa barutuwa ba hae, a re: Ke utlwela bongata boo bohloko, hobane matsatsi a se a le mararo ba dutse ho nna, mme ha ba na letho leo ba le jang; ke sitwa ho ba kgutlisa le tlala, esere mohlomong ba ka kgathala tseleng. ₃₃Barutuwa ba hae ba re ho yena: Ana moo, feelleng, re ka nka kae mahobe a ka lekanang ho kgorisa bongata bo bokalo? ₃₄Jesu a re ho bona: Le na le mahobe a makae? Ba re: A supileng, le dihlapinyana di se kae. ₃₅Yaba o laela bongata ho dula fatshe. ₃₆Yare hobane a nke mahobe ao a supileng le dihlapi, a a ngwatha, ha a se a lebohile, a nea barutuwa ba hae, mme barutuwa ba abela bongata. ₃₇Bohle ba eja, ba kgora; ha ba ha thonakwa dingwathwana tse setseng, tsa tlatsa diroto tse supileng. ₃₈Ba jeleng e ne e le banna ba kete tse nne, ha ho sa balwe basadi le bana. ₃₉Mme Jesu hobane a kgutlise matshwele, a kena sekepaneng, a ya naheng ya Magdala.