LUKA 3

₁Ka lemo sa leshome le metso e mehlano sa puso ya Tibere Sesare, ha Ponse Pilato e le mmusisi wa Judea, Heroda yena e le moteterareke wa Galelea, Filipi, ngwanabo, e le moteterareke wa Iturea le wa naha ya Trakonita, Lisaniase e le moteterareke wa Abilene; ₂ha Anna le Kaiafa e le baprista ba baholo, lentswe la Modimo la tla ho Johanne, mora wa Sakaria, feelleng. ₃A ya le lefatshe lohle le mathoko a Jordane, a ntse a bolela kolobetso ya pako, ya ho tshwarelwa dibe; ₄jwalokaha ho ngodilwe bukeng ya ditaba tsa moporofeta Esaia, ho thwe: Lentswe la ya howang feelleng, le re: Hlekang mmila wa Morena, le lokise ditsela tsa hae. ₅Diphula tsohle di katwe, dithaba tsohle le maralla wohle a kokobetswe; ho kgopamileng ho lokiswe; ditsela tse makukuno di latswe; ₆mme nama yohle e bone poloko ya Modimo.

₇O ne a re ho matshwele a tswelang ho kolobetswa ke yena: Madinyane a marabe, le tshositswe ke mang ho balehela bohale bo tlang? ₈Ha ho le jwalo, behang ditholwana tse tshwanelang pako. Le se ke la qala la re ka ho lona: Abrahama ke ntata rona; hobane ke re ho lona: Modimo o ka tsosetsa Abrahama bana le ka majwe ana. ₉Hape, selepe se se se beilwe metsong ya difate. Mme jwale, sefate ka seng se sa beheng ditholwana tse molemo, se tla rengwa, se lahlelwe mollong.

₁₀Bongata ba mmotsa, ba re: Ha ho le jwalo, re tla etsa eng na? ₁₁A araba, a re ho bona: Ya nang le dikobo tse pedi a abele ya se nang yona, le ya nang le dijo a etse jwalo.

₁₂Balekgetho le bona ba tla ho kolobetswa, mme ba re ho yena: Moruti, re tla etsang na? ₁₃a re ho bona: Le se ke la lefisa ho fetisa hoo le ho laetsweng.

₁₄Masole le wona a mmotsa, a re: Le rona, re tla etsa eng? A re ho wona: Le se ke la etsa motho ka matla, leha e le ka thetso; hape le kgolwe ke moputso wa lona.

₁₅Jwale, kahobane setjhaba se ne se dutse ka tebello, bohle ba hakanya ka dipelong tsa bona, ka ho re: Na mohlomong Johanne e ke se be ke yena Kreste, ₁₆Johanne a ba araba bohle, a re: Nna, ke fela ke le kolobetsa ka metsi; empa e mong o a tla, ya mphetang ka matla, eo ke sa lokelang ho lokolla leqhwele la dieta tsa hae; ke yena ya tla le kolobetsa ka Moya o Halalelang le ka mollo. ₁₇Seoloso sa hae se letsohong la hae, mme seotlo sa hae o tla se fiela ruri; o tla bokella koro modikong wa hae; haele mooko, o tla o tjhesa mollong o sa timeng.

₁₈A nna a ba kgothatsa le ka ditaba tse ding tse ngata, a ntse a bolella setjhaba Evangeli. ₁₉Empa, eitse hoba Heroda moteterareke a kgalemelwe ke Johanne, bakeng sa Herodiase, mosadi wa Filipi, ngwanabo, le bakeng sa tsohle tse mpe tseo a neng a di entse, ₂₀a eketsa tsohle tseo ka ho kenya Johanne teronkong.

₂₁Yare ha batho bohle ba kolobetswa, Jesu a kolobetswa le yena; ha a ntse a rapela, lehodimo le phetlwa, ₂₂mme Moya o Halalelang wa theohela hodima hae ka sebopeho se bonahalang se jwaloka sa leeba; mme lentswe la tswa lehodimong, la re: O Mora ka ya ratwang; ke kgahliswa ke wena.

₂₃Jesu o ne a batla ho ba le dilemo tse mashome a mararo, ha a qala ho ruta. Ka ho lekanya ha batho, e ne e le mora wa Josefa, wa Heli, ₂₄wa Mathate, wa Levi, wa Melki, wa Janai, wa Josefa, ₂₅wa Matathia, wa Amose, wa Nahume, wa Esli, wa Naggai, ₂₆wa Maathe, wa Matathia, wa Semei, wa Joseke, wa Juda, ₂₇wa Joanane, wa Rhesa, wa Sorobabele, wa Salathiele, wa Neri, ₂₈wa Melki, wa Adi, wa Kosame, wa Elmadame, wa Ere, ₂₉wa Jose, wa Eliesere, wa Jorime, wa Mathate, wa Levi, ₃₀wa Simeone, wa Juda, wa Josefa, wa Joname, wa Eliakime, ₃₁wa Melea, wa Mainane, wa Matatha, wa Nathane, wa Davida, ₃₂wa Jese wa Obede, wa Boase, wa Salmone, wa Naasone, ₃₃wa Aminadabe, wa Arame, wa Esrome, wa Farese, wa Juda, ₃₄wa Jakobo, wa Isaaka, wa Abrahama, wa Thera, wa Nakore, ₃₅wa Seruge, wa Rehu, wa Pelege, wa Hebere, wa Shela, ₃₆wa Kainane, wa Arpaksade, wa Sema, wa Nowe, wa Lemeke, ₃₇wa Methusela, wa Henoke, wa Jerede, wa Mahalaleele, wa Kenane, ₃₈wa Enose, wa Setha, wa Adama, wa Modimo.