LUKA 20

₁Mohlang oo, ka tsatsi le leng, ha a ntse a ruta batho tempeleng, a ba bolella Evangeli, baprista ba baholo, le bangodi, le baholo ba setjhaba ba tla, ₂ba bua le yena, ba re: Ako re bolelle matla ao o etsang ntho tseo ka wona, le hoba ya o fileng matla ao ke mang na? ₃A araba, a re ho bona: Ke tla le botsa taba le nna. ₄Mpolelleng, na kolobetso ya Johanne e ne e tswa lehodimong, kapa e ne e tswa bathong na? ₅Jwale ba eletsana hammoho, ba re: Ha re ka re: E ne e tswa lehodimong, o tla re: Ha le a ka la e dumela keng? ₆Mme ha re ka re: E ne e tswa bathong, setjhaba kaofela se tla re tlepetsa ka majwe; hobane se kgotswe hoba Johanne e ne e le moporofeta. ₇Ba araba, ba re: Ha re tsebe moo e tswang teng. ₈Yaba Jesu o re ho bona: Le nna nke ke ka le bolella matla ao ke etsang ntho tseo ka wona.

₉Yaba o qala ho bolella batho setshwantsho sena: Motho wa horeng o ne a hlome tshimo ya merara; a e laeletsa balemi, a ntoo eta ka tshiu tse teletsana. ₁₀Ka nako ya ho kotula, a romela mohlanka wa hae ho balemi, hore ba mo fe ditholwana tsa merara; empa balemi ba mo otla, mme ba mo kgutlisa a le feela. ₁₁A eketsa a roma mohlanka e mong; le yena ba mo otla, ba mo hlabisa dihlong, mme ba mo kgutlisa a le feela. ₁₂A eketsa a roma wa boraro; mme hobane ba mo ntshe kotsi, ba mo lelekisa. ₁₃Yaba monga tshimo ya merara o re: Ke tla etsa jwang? Ke tla roma mora wa ka, eo ke mo ratang; ha ba mmona, ekaba ba tla mo hlonepha. ₁₄Empa balemi, yare ha ba mmona, ba bolellana, ba re: Enwa ke mojalefa; tloong, re mmolayeng, lefa e tle e be la rona. ₁₅Eitse hobane ba mo lahlele kantle ho tshimo ya merara, ba mmolaya. Mme jwale, monga tshimo ya merara o tla ba etsa jwang? ₁₆O tla tla, a timetse balemi bao; mme tshimo ya merara o tla e nea ba bang. Ha ba utlwa hoo, ba re: ho se ke ha eba jwalo! ₁₇A mpa a ba tjamela, a re: Mme ke eng hona ho ngodilweng: Lejwe le lahlilweng ke dihahi, ke lona le entsweng la motheo la sekgutlo? ₁₈E mong le e mong ya tla wela hodima lejwe leo, o tla robeha; mme le tla pitla eo le mo welang hodimo.

₁₉Baprista ba baholo le bangodi ba batla ho isa matsoho ho yena ka yona nako eo, empa ba tshaba batho; hobane efela ba ne ba tsebile hoba o lekantse bona ka setshwantsho seo.

₂₀Yaba ba mo ela hloko, ba roma dihlwela, tsa iketsa batho ba lokileng, hore di tle di mo tshwase dipolelong tsa hae, hore ba mo neele matleng le matsohong a mmusisi. ₂₁Ba mmotsa, ba re: Moruti, re a tseba hobane o bua le ho ruta ka ho loka; ha o tadime tshobotsi ya motho, o mpa o hlile o ruta tsela ya Modimo kannete. ₂₂Na ho a re lokela ho ntshetsa Sesare lekgetho, kapa tjhe? ₂₃Eitse ha a lemoha mano a bona, a re ho bona: Le ntekelang? ₂₄Mpontsheng denare. E na le setshwantsho sa mang, le lengolo la mang? Ba araba, ba re: La Sesare. ₂₅Yaba o re ho bona: Ha ho le jwalo, ntshetsang Sesare tseo e leng tsa Sesare, le Modimo tseo e leng tsa Modimo. ₂₆Ba sitwa ho mo tshwasa polelong tseo tsa hae pela batho; ba makatswa feela ke karabo ya hae, mme ba kgutsa.

₂₇Yaba ba bang ba basadusi, ba latolang tsoho ya bafu, ba tla ho yena, ba mmotsa, ₂₈ba re: Moruti, Moshe o re ngoletse, a re: Moholwane wa motho ha a shwele a ena le mosadi, empa a se na bana, e ka kgona moenae a nke mohlolohadi eo wa hae, a tle a hlahisetse ngwanabo bana. ₂₉Jwale, bara ba motho ba ne ba le teng, ba supile; wa pele ho bona a nyala mosadi, a shwa a se na bana. ₃₀Wa bobedi a nka mosadi eo, mme a shwa a se na bana le yena. ₃₁Le wa boraro a mo nka; mme ha eba jwalo ho bona ba supileng: ba eshwa, ba sa siye bana. ₃₂Kamora bona kaofela, le yena mosadi eo a shwa. ₃₃Hleka mohla tsoho ya bafu, mosadi e tla ba wa ofe ho bona, haele moo ba supileng ba ne ba mo nyetse? ₃₄Jesu a araba, a re ho bona: Bana ba lefatshe lena ba nyala, mme ba nyalwa; ₃₅empa ba tlang ho newa tokelo ya ho bona lefatshe le tlang le tsoho ya bafu, ba ke ke ba nyala, le hona ba ke ke ba nyalwa. ₃₆Hobane ha ba sa tla hlola ba eshwa; hobane ba tla tshwana le mangeloi, mme e tla ba bara ba Modimo, ha e se e le bara ba tsoho. ₃₇Haele hobane bafu ba tla tsoha, Moshe le yena o ho bonahaditse, mohla a leng pela sehlahla, ha a bitsa Morena, Modimo wa Abrahama, le Modimo wa Isaaka, le Modimo wa Jakobo. ₃₈Athe Modimo hase Modimo wa bafu, ke wa ba phelang; hobane ho wona batho kaofela ke ba phelang. ₃₉Yaba ba bang ho bangodi ba bua, ba re: Moruti, o arabile hantle. ₄₀Hobane ba ne ba tshaba ho boela ba mmotsa taba leha e le nngwe.

₄₁Empa a ba bolella, a re: Ho thwe, Kreste ke mora wa Davida jwang, ₄₂kanthe Davida yena o boletse bukeng ya Dipesaleme, a re: Morena o boleletse Morena wa ka, a re: Dula letsohong la ka le letona, ₄₃ke be ke bee bao e leng dira ho wena bonamelo ba maoto a hao? ₄₄Ana jwale, Davida ha a mmitsa Morena wa hae, e ka ba mora wa hae jwang?

₄₅Yaba o bolella barutuwa ba hae, batho bohle ba ntse ba mametse, ₄₆a re: Phemang bangodi, ba ratang ho itsamaela ka dikobo tse telele, le ho dumediswa mapatlelong; ba ratang ditulo tse kapele masinagogeng, le ditulo tse kapele meketeng. ₄₇Ba metsa matlo a basadi ba bahlolohadi ka ho re, ba ba etsetsa merapelo e melelele. Ba tla ahlolwa ka kahlolo e fetisisang.