LUKA 17

₁Jesu a bolella barutuwa, a re: Haele hore dikgopiso di se hlahe, ho ke ke ha etswa; empa ho madimabe eo di hlahang ka yena. ₂Ho ka bang molemo ho yena, ke ho tlamellwa lelwala le leholo molaleng, le ho dihelwa lewatleng, ho ena le hore a kgopise e mong wa ba banyenyane bana.

₃Iponeleng! Ekare ha ngwaneno a o sitetswe, o mo kgalemele; ha a baka, o mo tshwarele. ₄Mme leha a ka o sitelwa hasupa ka tsatsi le le leng, mme a kgutlela ho wena hasupa, a re: Ke bakile; o mo tshwarele.

₅Baapostola ba re ho Morena: Totisa tumelo ya rona. ₆Morena a re: Hojane le na le tumelo e ka ka hlaku ya mosetareta, le ne le ka re ho sefate seo sa sikomora: Fothoha, o ye ho itlhoma lewatleng; mme se ne se tla le utlwa.

₇Ke mang ho lona, ya nang le mohlanka ya lemang, kapa ya disang dikgomo, a ka reng ho yena, ha a sa tswa oroha naheng: Tloo kapele, o dule dijong? ₈Na haholo a ke ke a re ho yena: Lokisa seo ke tla lalla ka sona, o itlame, o ntshebeletse, ke tle ke be ke je, ke nwe; kamora tseo, wena o tla ja, o nwe? ₉Na o tla boka mohlanka eo, kahobane a entse ntho tseo a di laetsweng? Ha ke lekanye jwalo. ₁₀Ka mokgwa o jwalo, le lona, etlare ha le entse ntho tsohle tseo le di laetsweng, le re: Re bahlanka ba se nang thuso, hobane re entse seo re neng re tshwanetse ho se etsa.

₁₁Enereha a eya Jerusalema, a sika le moedi wa Samaria le Galelea. ₁₂Eitse ha a kena motsaneng o mong, a kgahlana le banna ba leshome, e leng balepera, ba neng ba eme hojana. ₁₃Ba phahamisa mantswe, ba re: Jesu, Monghadi, re hauhele. ₁₄Mme ha a ba bona, a re ho bona: Eyang, le ipontshe ho baprista. Ba re ba sa ya, ba hla ba ntlafala. ₁₅E mong wa bona, eitse ha a fihlela hobane o fodile, a kgutla le mehlala ya hae, a ntse a rorisa Modimo ka lentswe le leholo; ₁₆mme a itihela maotong a Jesu ka sefahleho, a mo leboha. Athe eo e ne e le Mosamaria. ₁₇Yaba Jesu o bua, a re: Na ha ba ka ba ntlafala ba le leshome na? Ba robileng mono o le mong ba kae na? ₁₈Ha ba ka ba boya, ba tle ba tlotlise Modimo, haese motho enwa wa mofuta osele? ₁₉Yaba o re ho yena: Ema, o ikele; tumelo ya hao e o pholositse.

₂₀Eitse ha Jesu a botswa ke bafarisi, hore mmuso wa Modimo o tla tla neng, a ba araba, a re: Mmuso wa Modimo ha o tle ka ho lemohuwa. ₂₁Ho ke ke ha thwe: Bonang, o mona; kapa: Bonang, o mane; hobane mmuso wa Modimo o se o le kahare ho lona.

₂₂A re ho barutuwa: Ho tla matsatsi ao le tla lakatsa ho bona le leng la matsatsi a Mora motho, mme le ke ke la le bona. ₂₃Ho tla thwe ho lona: Bonang, o mona; kapa: Bonang, o mane. Le se ke la ya teng, mme le se ke la mathela teng. ₂₄Hobane jwaloka lehadima, ha le hadima, le ye le hadime ho qala nqa e nngwe tlasa lehodimo, ho isa nqa e nngwe tlasa lehodimo, ho tla ba jwalo le Mora motho tsatsing la hae. ₂₅Empa e ka kgona a utlwiswe bohloko bo boholo pele, a lahlwe ke moloko ona.

₂₆Jwalokaha ho ne ho etsahale mehleng ya Nowe, ho tla ba jwalo mehleng ya Mora motho. ₂₇Ho ne ho jewa, ho nowa, ho nyalwa, ho nyadiswa, ho fihlela letsatsi leo Nowe a ileng a kena arekeng ka lona, morwallo wa metsi wa ba wa fihla, wa ba timetsa kaofela. ₂₈Le hona ho tla ba jwalokaha ho kile ha etsahala mehleng ya Lota: Ho ne ho jewa, ho nowa, ho rekwa, ho rekiswa, ho lengwa, ho hahuwa matlo. ₂₉Empa ka letsatsi leo Lota a tswang Sodoma ka lona, lehodimo la neswa mollo le sebabole, ba ba ba timetswa kaofela ke tsona. ₃₀Ho tla ba jwalo ka letsatsi leo Mora motho a tla hlaha ka lona.

₃₁Ka tsatsi leo, ya leng hodima ntlo, mme phahlo tsa hae di leng ka tlung, a se ke a theohela ho di nka; ka mokgwa o jwalo ya leng naheng, le yena a se ke a kgutlela hae. ₃₂Elellwang mosadi wa Lota. ₃₃E mong le e mong ya tla batla ho boloka bophelo ba hae, o tla timellwa ke jona, mme e mong le e mong ya tla timellwa ke jona, ke yena ya tla bo boloka. ₃₄Ke a le bolella, ke re: Ka bosiu boo, ho ba babedi ba robetseng phateng e le nngwe, e mong o tla nkwa, e mong a tlohelwe. ₃₅Ho basadi ba babedi ba silang hammoho, e mong o tla nkwa, e mong a tlohelwe. ₃₆Ho ba babedi ba masimong, e mong o tla nkwa, e mong a tlohelwe.

₃₇Yaba ba bua, ba re ho yena: Morena, e tla ba kae? A re ho bona: Moo setopo se leng teng, ke moo le manong a tla bokana teng.