LEVITIKE 7

₁Molao wa sehlabelo sa molato ke wona ona: ke ntho e halalelang haholo: Ho tla hlajwa sehlabelo sa molato nqalong eo setjheso se hlabelwang teng, mme madi a sona a tla tshelwa aletareng ka nqa tsohle. ₃Ho tla hlahiswa mafura wohle a sona a mohatla, le mohlehlo o apesang mala, ₄le diphio tse pedi le mafura a tsona, ho isa ho a mahlono, le mafura a kguto a katlasa sebete, a tlang ho kgaolwa pela diphio. ₅Moprista o tla a tjhesa aletareng, e le sehlabelo se tjheseditsweng Jehova ka mollo; ke sehlabelo sa molato. ₆Ba batona bohle hara baprista ba tla se ja; se tla jelwa nqalong e halalelang: se halalela haholo. ₇Kamoo sehlabelo sa sebe se leng kateng, le sehlabelo sa molato se jwalo feela; molao o mong feela ho se seng le se seng sa tsona; sehlabelo e tla ba sa moprista ya tlang ho etsa pheko. ₈Moprista ya hlahisang setjheso sa e mong, o tla newa letlalo la ntho e entsweng setjheso seo a se hlahisitseng. ₉Nyehelo e nngwe le e nngwe e apehilweng seboping, kapa e apehilweng pitseng, kapa paneng, e tla ba ya moprista ya e hlahisitseng; ke ya hae. ₁₀Nyehelo e nngwe le e nngwe e dubilweng ka ole, e omileng, e tla ba ya bara ba Aarone kaofela, leha e le mang kapa mang wa bona.

₁₁Molao wa sehlabelo sa teboho se hlahisetswang Jehova, ke wona ona: ₁₂Ekare ha e mong a se hlahisa ka teboho, e ka kgona a hlahise hammoho le sehlabelo sa teboho bohobe bo sa lomoswang, bo dubilweng ka ole, le maqebekwane a sa lomoswang, a tlotsitsweng ka ole, le dinkgwana tsa lefi la phofo tse hadikilweng ka ole, tse dubilweng ka ole. ₁₃O tla hlahisa nyehelo ya hae, le dinkgwana tsa bohobe bo lomositsweng, hammoho le sehlabelo sa hae sa teboho le sa kgotso. ₁₄Karolo ya nyehelo e nngwe le e nngwe e tla hlahiswa ho Jehova e emisitswe, mme e tla ba ya moprista ya tsholotseng madi a se entsweng sehlabelo sa teboho. ₁₅Nama ya sehlabelo sa teboho, sa kgotso e tla jewa ka lona letsatsi leo motho a hlahisitseng nyehelo ya hae ka lona; ho se ke ha sala letho la yona ho isa hosasa. ₁₆Ekare ha motho a hlahisa sehlabelo ho lefa kano eo a anneng ka yona, kapa e le sehlabelo sa boithatelo, nama ya sona e tla jewa ka lona letsatsi la sehlabelo, mme se ka salang se tla jewa hosasane. ₁₇Se setseng sa nama ya sehlabelo ho isa letsatsing la boraro, se tla tjheswa ka lona, ka mollo. ₁₈Ha ekaba motho a ka leka ho ja nama ya sehlabelo sa hae sa teboho ka letsatsi la boraro, se ke ke sa amohelwa, mme se ke ke sa ballwa ya se entseng; e tla ba ntho e manyala, mme motho ya se jang o tla jara molato wa hae. ₁₉Nama e amilweng ke ntho e sa hlwekang, ha e na ho jewa; empa e tla tjheswa ka mollo. Haele nama e jewang, motho e mong le e mong ya hlwekileng a ka e ja. ₂₀Empa motho ya ditshila, ha a ka ja nama ya sehlabelo sa teboho, e leng sa Jehova, o tla kgaolwa setjhabeng sa habo. ₂₁Motho ya amileng ntho efe le efe e sa hlwekang, kapa sesila sa motho, kapa phoofolo e sa hlwekang, leha e le ntho e nngwe le e nngwe e manyala, e ditshila, ha a ka ja nama ya sehlabelo sefe le sefe sa teboho, e leng sa Jehova, o tla kgaolwa setjhabeng sa habo.

₂₂Jehova a bua le Moshe, a re: ₂₃Bolella bana ba Iseraele, o re: Le se ke la ba la ja mafura a kgomo le a nku, le a podi. ₂₄Mafura a phoofolo e itjhweletseng, kapa mafura a phoofolo e rusolotsweng, le ka itshebeletsa ho hong hofe le hofe ka wona, empa le wona, le ke ke la a ja. ₂₅Hobane, mang le mang ha a ka ja mafura a dintho tseo ho etswang ka tsona mahlabelo a tjhesetswang Jehova, ya a jeleng, o tla kgaolwa hara setjhaba sa habo. ₂₆Le ke ke la ba la ja madi le hanyenyane, meahong ya lona kaofela; leha e le a dinonyana, leha e le a tse maoto a mane. ₂₇Ya ka jang madi afe le afe, motho eo o tla kgaolwa setjhabeng sa habo.

₂₈Jehova a bua le Moshe, a re: ₂₉Bolella bana ba Iseraele, o re: Ya tlang ho hlahisa sehlabelo sa hae sa teboho ho Jehova, o tla tlisa ho Jehova nyehelo ya hae e nkilweng sehlabelong sa hae sa teboho. ₃₀O tla tlisa ka matsoho a hae tse tlang ho tjhesetswa Jehova; o tla tlisa mafura le sefuba, sefuba se tle se tsokotswe pela Jehova. ₃₁Moprista o tla tjhesa mafura aletareng, mme sefuba e be sa Aarone le bara ba hae. ₃₂Mahlabelong a lona a teboho, le tla nea moprista letsoho le letona, a le hlahise ka kemiso. ₃₃Hara bara ba Aarone, ya tlang ho hlahisa ho Jehova madi le mafura a sehlabelo sa teboho, letsoho le letona e tla ba kabelo ya hae. ₃₄Hobane mahlabelong a teboho a bana ba Iseraele, ke nka sefuba se tlang ho tsokotswa, le letsoho le tlang ho hlahiswa ka kemiso, mme ke di nea moprista Aarone le bara ba hae ka taelo ya kamehla, e tlang ho bolokwa ke bana ba Iseraele. ₃₅Ke yona tokelo ya Aarone, le ya bara ba hae, eo ba e neilweng ka ho tlotsuwa ha bona, mahlabelong a tjhesetswang Jehova, ho qala ka letsatsi leo ba hlahiswang ka lona hore ba sebetse mosebetsi wa Jehova wa boprista. ₃₆Ke tseo Jehova a laelang bana ba Iseraele ho ba nea tsona, ho qala letsatsing leo a ba tlotsitseng ka lona. Hoo e tla ba molao wa kamehla melokong ya bona.

₃₇Ke wona oo molao wa setjheso, le wa nyehelo, le wa sehlabelo sa sebe, le wa sehlabelo sa molato, le wa peo ya boprista, le wa sehlabelo sa teboho, ₃₈oo Jehova a o laetseng Moshe, thabeng ya Sinai, ka letsatsi leo a laetseng bana ba Iseraele ho hlahisa dinyehelo tsa bona ho Jehova, feelleng la Sinai.