LEVITIKE 3

₁Ekare ha e mong a nyehella Jehova ka sehlabelo sa teboho, mme a nyehela ka kgomo e tona kapa ka e tshehadi, o tla e hlahisa pela Jehova, e hloka sekodi. ₂O tla bea letsoho la hae hodima hlooho ya kgomo eo ya sehlabelo sa hae, o tla e hlaba monyako wa tente ya pokano; baprista, bara ba Aarone, ba tla tshollela madi aletareng ka nqa tsohle. ₃Sehlabelong seo sa teboho o tla nka seo a tlang ho etsa ka sona sehlabelo se tjhesetswang Jehova, e leng mafura a apesang mala, le mafura kaofela a kgomaretseng mala, ₄le diphio tse pedi, le mafura a tsona, ho isa ho a mahlono, a nke le mafura a kguto a katlase ho sebete, ao a tlang ho a kgaola ho a diphio. ₅Bara ba Aarone ba tla a tjhesetsa aletareng, hodima setjheso se seng se leng hodima patsi e beilweng mollong, e be sehlabelo se tjhesitsweng ka mollo, se monko o monate ho Jehova.

₆Ha a nyehela ka e kgutshwane e tona, kapa e tshehadi, e le sehlabelo sa teboho, o tla e hlahisa pela Jehova, e hloka sekodi. ₇Ha a nyehela ka nku e tona, a hlahise sehlabelo sa hae pela Jehova; ₈a bee letsoho la hae hodima hlooho ya sehlabelo seo sa hae, a se hlabe pela tente ya pokano, mme bara ba Aarone ba tla tshollela madi aletareng ka nqa tsohle. ₉Sehlabelong seo sa teboho, o tla nka seo a tla se etsa sehlabelo se tjheswang ka mollo pela Jehova, e leng mafura, le mohatla kaofela, oo a tlang ho o pomela senokong sa sefutsi, le mohlehlo o apesang mala, le mafura wohle a kgomaretseng mala, ₁₀le diphio tse pedi, le mafura a tsona ho isa le ho a mahlono, le mafura a kguto a katlase ho sebete, ao a tlang ho a kgaola pela diphio. ₁₁Moprista o tla di tjhesa aletareng: ke sejo sa sehlabelo se tjheseditsweng Jehova.

₁₂Ekare ha a nyehela ka podi, o tla e tlisa pela Jehova; ₁₃o tla bea letsoho la hae hodima hlooho ya yona, mme o tla e hlaba pela tente ya pokano; bara ba Aarone ba tla tshollela madi a yona aletareng ka nqa tsohle. ₁₄Sehlabelong sa hae, o tla hlahisa seo a se tjhesetsang Jehova, mohlehlo o apesang mala, le mafura wohle a kgomaretseng mala, ₁₅le diphio tse pedi, le mafura a tsona, ho isa ho a mahlono, le mafura a sebete, ao a tlang ho a kgaola pela diphio. ₁₆Moprista o tla tjhesa mafura ao kaofela aletareng: mafura kaofela ke sejo sa sehlabelo sa setjheso se tjheswang ka mollo, se monko o monate ho Jehova.

₁₇Molao ona e tla ba wa kamehla melokong ya lona, kahohle moo le tla aha teng: Le se ke la ja mafura, leha e le madi.