LEVITIKE 22

₁Jehova a bua le Moshe, a re: ₂Bolella Aarone le bara ba hae hore, ba itemohele bakeng sa dintho tse halalelang, tseo ke di kgethelwang ke bana ba Iseraele, mme ba se ke ba hlompholla lebitso la ka le halalelang. Ke nna Jehova. ₃Ere ho bona: Mang le mang wa ditloholo tsa lona, leha e le wa leloko la lona, ya atamelang dintho tse halalelang, tse kgethelwang Jehova ke bana ba Iseraele, a le sesila, motho eo o tla tloswa pela ka. Ke nna Jehova.

₄Setloholo se seng le se seng sa Aarone se nang le lepera, kapa ho dutla, se ke ke sa eja dintho tse kgethehileng, se eso ho hlweke; ho jwalo, le bakeng sa e mong ya amileng motho ya leng sesila ke setopo, kapa ya hlapileng. ₅Kapa ha e mong a amile sehahabi, mme a le sesila kahoo, kapa ha a amile motho ya nang le sesila sefe le sefe, ₆ya amileng ntho tseo, o tla ba sesila ho isa mantsiboya, mme a ke ke a ja dintho tse kgethehileng, empa o tla hlatswa mmele wa hae metsing. ₇Etlare hobane letsatsi le dikele, etlaba o hlwekile, a ka ja dintho tse kgethehileng; hobane ke dijo tsa hae.

₈A se ke a ja ntho e shweleng, kapa e harotsweng, a tle a se ke a ba sesila. Ke nna Jehova.

₉Ba boloke melao ya ka, e se be ba jara boima ba sebe sa bona, mme ba se ka ba eshwa, kahobane ba hlomphollotse dintho tse kgethehileng. Ke nna Jehova ya ba halaletsang.

₁₀Ha ho moditjhaba ya tlang ho ja dintho tse halalelang; esita le moeti wa moprista, leha e le mohlanka wa hae ya lefjwang, ba ke ke ba eja dintho tse kgethehileng. ₁₁Empa ekare ha moprista a itheketse mohlanka ka tjhelete, yena o tla di ja; ho jwalo le bakeng sa ya tswaletsweng tlung ya hae; bona ba tla ja dijo tsa hae.

₁₂Ekare ha moradi wa moprista a nyalwa ke motho wa mofuta osele, a ke ke a hlola a eja dintho tse kgethehileng, tse hlahiswang ka tsokotso. ₁₃Empa ekare ha moradi wa moprista e le mohlolohadi, kapa ya hladilweng, a se na bana, mme a kgutlela tlung ya ntatae ho dula teng jwaloka botjheng ba hae, o tla ja dijo tsa ntatae; empa ha ho moditjhaba ya tlang ho di ja.

₁₄Ekare ha motho a eja dintho tse kgethehileng ka ho se tsebe, o tla busetsa ho moprista theko ya ntho eo e kgethehileng, mme o tla e ekeletsa ka bohlano ba yona. ₁₅Baprista ba se ke ba hlompholla dintho tse kgethehileng tsa bana ba Iseraele tseo ba di hlahisetsang Jehova ka tsokotso; ₁₆hobane kahoo ba ka ba jarisa boima ba sebe seo ba ka se etsang, ha ba eja dintho tse kgethehileng; hobane ke nna Jehova ya ba halaletsang.

₁₇Jehova a bua le Moshe, a re: Bolella Aarone, le bara ba hae, le bana ba Iseraele kaofela, o re ho bona: ₁₈Motho e mong le e mong wa ntlo ya Iseraele, kapa wa baditjhaba ya ahileng Iseraeleng, ya tlang ho hlahisetsa Jehova sehlabelo ka ho phetha kano, leha e le nyehelo ka ho ithatela, ₁₉o tla hlahisa ntho e tona e se nang sekodi, e kgethilweng dikgomong tsa lona, kapa dinkung tsa lona, kapa dipoding tsa lona; hore ntho ya hae e ke e dumelehe. ₂₀Le se ke la hlahisa letho le nang le sekodi, hobane le ke ke la dumeleha. ₂₁Ekare ha motho a hlahisetsa Jehova sehlabelo sa teboho ka ho phetha kano, kapa nyehelo ya ho ithatela, a nke dikgomong kapa dikgutshwaneng, e be ntho e hlokang sekodi, e tle e dumelehe; ho se ke ha eba sekodi ho yona. ₂₂Le se ke la hlahisa ntho e foufetseng, kapa e holofetseng, kapa e faotsweng, kapa e nang le dibebe, kapa e sekgwakgwa, kapa e nang le dihloba, mme le se ke la etsa ka yona aletareng sehlabelo se tjhesetswang Jehova. ₂₃O ka etsa nyehelo ya boithatelo ka kgomo, kapa ka nku e nang le setho se selelele, kapa se sekhutshwanyane; empa ntho e jwalo e ke ke ya dumellwa hore ho tle ho phethwe kano ka yona. ₂₄Le se ke la hlahisetsa Jehova ntho e marete a teteditsweng, kapa a pshatlilweng, kapa a qotsutsweng, kapa a pomilweng; mme le se ke la etsa sehlabelo ka e jwalo naheng ya lona. ₂₅Le se ke la amohela tse jwalo matsohong a baditjhaba ho etsa ka tsona sejo sa Modimo wa lona, hobane di holofetse, di na le dikodi; di ke ke tsa dumellwa ke hona.

₂₆Jehova a boela a bua le Moshe, a re: ₂₇Kgomo, nku, leha e le podi e tlang ho tswalwa, e tla dula le mma yona ka matsatsi a supileng; ho tloha letsatsing la boroba meno e le mmedi, le kamora lona, e tla dumellwa hore e hlahisetswe Jehova, e be sehlabelo se tjheswang ka mollo. ₂₈Empa ho makgomo le ho manku, le se ke la hlaba tswetse le ngwana yona ka tsatsi le le leng.

₂₉Etlare ha le hlahisetsa Jehova sehlabelo sa teboho, le se hlahise ka mokgwa oo se ka dumelehang ka wona. ₃₀Se tla jewa ka lona letsatsi leo, mme le se ke la bolokela hosasane eng le eng ya sona. Ke nna Jehova.

₃₁Le boloke melao ya ka, mme le ye ka yona. Ke nna Jehova.

₃₂Le se ke la hlompholla lebitso la ka le halalelang, ke tle ke kgethehe hara bana ba Iseraele. Ke nna Jehova ya le halaletsang, ₃₃ya le ntshitseng naheng ya Egepeta, ke tle ke be Modimo wa lona. Ke nna Jehova.