Ai o a kenwa.
1Yaba Jehova o re ho Joshua: Se tsohe, mme o se ke wa tepella; eya o nkile le wena bahlabani bohle, o tlohe, o futuhele Ai; bona, ke neetse matsohong a hao morena wa Ai, le setjhaba sa hae, le motse wa hae, le lefatshe la hae. 2Etsa ho Ai le ho morena wa teng jwalokaha o entse ho Jeriko le ho morena wa teng; feela tse tla hapjwa teng, le dikgomo tsa teng, e tle e be mafohlo a lona. Bea mekgahlelo kamora motse.
3Ebile Joshua o tloha, a ya le bahlabani bohle ho ya futuhela Ai; Joshua a kgetha banna ba bahale, ba kete tse mashome a mararo, a ba roma bosiu. 4A ba laela, a re: Bonang, le etsetse motse mekgahlelo, kamora motse; le se ke la emela hole le motse, mme le itokise bohle. 5Haele nna, le batho bohle bao ke nang le bona, re tla atamela pela motse; etlare ha ba etswa ho kopana le rona jwaloka pele, re tla baleha pela bona. 6Ba tla tswa, ba re phallele, ho fihlela re ba hulela hole le motse, hobane ba tla re: Ba sa baleha pela rona, jwalokaha pele; mme re fela re tla ba balehela. 7Ke hona le tla tsoha mekgahlelong, le kene motse, hobane Jehova, Modimo wa lona, o tla o neela matsohong a lona. 8Etlare ha le kene motse, le tjhese motse. Etsang hoo ka taelo ya Jehova; bonang, ke le laetse. 9Joshua a ba roma, ba ya mekgahlelong, ba ema dipakeng tsa Bethele le Ai, ka nqa bophirimela ho Ai; Joshua yena a hlola bosiu bona le setjhaba.
10Joshua a tsoha e sa le ka meso, a hlahloba setjhaba, mme a nyolohela Ai, a ena le baholo ba Iseraele, a eteletse setjhaba pele. 11Bahlabani bohle bao a nang le bona ba nyoloha, ba atamela, ba fihla pela motse, mme ba emisa ka nqa leboya ho Ai, kgohlo e le teng mahareng a bona le Ai. 12A nka banna ba ka bang kete tse hlano, a ba bea mekghahlelo dipakeng tsa Bethele le Ai ka nqa bophirimela ho motse. 13Ba emisa phafa tsohle jwalo ka nqa leboya ho motse, ba mekgahlelo bona ba le ka nqa bophirimela ho motse; Joshua yena a ya kgohlong bosiu.
14Morena wa Ai ha a bona hoo, banna ba motse ba akofa ba tsohela, ba tswela lehwatateng ho kgahlanyetsa Baiseraele, moo ho kgethilweng, e le yena le batho bohle ba hae; empa o ne a sa tsebe hobane o beetswe mekgahlelo kamora motse. 15Joshua le Baiseraele bohle ba etsa jwaloka hoja eka ba hlotswe ke bona, ba baleha ka tsela e yang lefeelleng. 16Setjhaba sohle se motseng sa memuwa ho ba phallela; ba phallela Joshua, mme ba hulelwa hole le motse; 17ha ho a ka ha sala monna Ai le Bethele, ya sa phallelang Baiseraele; mme ba siya motse o butswe, mme ba phallela Baiseraele.
18Yaba Jehova o re ho Joshua: Otlollela nqa Ai lerumo le letsohong la hao, hobane ke o neetse matsohong a hao. Mme Joshua a otlollela nqa Ai lerumo le letsohong la hae.
19Jwale ba mekgahlelo ba tloha kapele moo ba dutseng teng, ha ba bona a otlolotse letsoho la hae; ba titima, ba kena motse, ba o nka, mme ba phakisa ba tjhesa motse. 20Eitse ha ba Ai ba reteleha, ba bona mosi o etswa motseng, o nyolohela lehodimong, ba sitwa ho balehela kae le kae. Ba neng ba balehela nqa lefeelleng ba boya ho tla lwantsha ba ba phallelang. 21Joshua le Baiseraele bohle, ha ba bona mekgahlelo e kena motse, le mosi o nyoloha o etswa motseng, ba phekgoha, mme ba bolaya banna ba Ai, 22le bane ba tswa motseng ho teana le bona; ebile ba Ai ba teelwa ke Baiseraele hare, ba bang ka kwano, ba bang ka kwana; 23mme ba ba bolaya, ho se ke ha tlola motho le a mong ya phelang, leha e le ya phonyohileng. Le morena wa Ai ba mo tshwara a sa phela, ba mo tlisa ho Joshua.
24Baiseraele, eitse hobane ba qete ho bolaya ba ahileng Ai, naheng le lefeelleng, moo ba ba phalletseng teng, bohle ha ba dihilwe ka bohale ba lerumo, ba se ba timetse, Baiseraele bohle ba kgutlela Ai, ba bolaya le ba teng ka bohale ba lerumo. 25Bohle ba bolailweng tsatsing leo, ha ho balwa banna le basadi, ya eba kete tse leshome le metso e mmedi, e le batho ba Ai kaofela. 26Hobane Joshua, ha a ka a honyetsa letsoho la hae leo a le otlolotseng, le tshwereng lerumo, ho fihlela a timeleditse ruri bohle ba ahileng Ai. 27Feela, Baiseraele ba ikgapela makgomo le mesebetsi ya motse oo, jwalokaha Jehova a ne a laetse Joshua. 28Joshua a tjhesa Ai jwalo a o etsa qubu ya dithako tsa kamehla; e ntse e le teng le kajeno. 29A fanyeha morena wa Ai sefateng se seng, ya ba ya eba mantsiboya; letsatsi ha le dikela, Joshua a laela hore ba fanyolle setopo sa hae sefateng, mme sa lahlelwa pela kgoro ya motse; hodima sona ba qhobela qubuhadi ya majwe; e sa le teng le kajeno.
Ho hahuwa aletare thabeng ya Ebale.
30Yaba Joshua o hahela Jehova, Modimo wa Iseraele, aletare, thabeng ya Ebale. 31Jwalokaha Moshe, mohlanka wa Jehova, a ne a laetse bana ba Iseraele, kamoo ho ngodilweng kateng bukeng ya molao wa Moshe; e ne e le aletare ya majwe a sa kang a thuhwa, ao tshepe e neng e sa ka ya fihliswa ho wona; hodima yona ba hlabela Jehova ditjheso; ba mo hlabela le mahlabelo a teboho. 32A boela a pheta a ngola molao wa Moshe majweng ao, a o ngola pontsheng ya bana ba Iseraele.
33Baiseraele bohle, le baholo ba bona, le matona a bona, le baahlodi ba bona ba ema ka nqa tse pedi ho areka, mabapa le baprista, e leng Balevi ba jereng areka ya selekane sa Jehova, hammoho le baditjhaba, le Baiseraele ba hlaho; sehlopha se seng se ne se lebane le thaba ya Gerisime, sehlopha sa bobedi se lebane le thaba ya Ebale, kamoo Moshe, mohlanka wa Jehova, a neng a laetse kateng kgale, hore ba hlohonolofatse setjhaba. 34A ntoo bala ditaba tsohle tsa molao, dihlohonolofatso le dithohako, le tsohle tse ngodilweng bukeng ya molao. 35Ha ho a ka ha eba taba le e nngwe ya tseo Moshe a di laetseng, eo Joshua a sa kang a e bala pela phutheho yohle ya Iseraele, ho bile ho na le basadi, le bana ba banyenyane, le baditjhaba ba tsamayang le bona.
