JOBO 40

₁Jehova a boela a bua le Jobo, a re: ₂Na modumadumi o sa tseka le Ya matla wohle na? Ya pheileng kgang le Modimo a ke a arabe jwale!

₃Yaba Jobo o arabela Jehova, a re: ₄Bona ke motho feela, nka reng ho wena na? Ke bea letsoho la ka molomong. ₅Ke buile hang, nke ke ka hlola ke araba letho; ke phetile la bobedi, ha ke sa tla hlola ke eketsa letho.

₆Yaba Jehova o fetola Jobo, a le sefefong, a re: ₇Ako itlame letheka, jwaloka monna; ke tla o botsa, o ke o nthute.

₈Na o fela o rata ho senya kahlolo ya ka? O rata ho ntswa hore o itokafatse na? ₉A o na le letsoho le kang la Modimo? Lentswe la hao na le ka duma jwaloka la wona na? ₁₀O ikapesa jwaloka boholo le ka bokgabane, o ikgabise ka kganya le ka botle! ₁₁O tshele dikgapatso tsa kgalefo ya hao, o tadime baikgohomosi bohle ho ba kokobetsa hang! ₁₂Tadima baikgantshi, o ba dihe; o hatakele ba bolotsana moo ba emeng teng. ₁₃O ba pate kaofela leroleng, o epele difahleho tsa bona lebitleng. ₁₄Ke moo le nna ke tla o rorisa, ke re, letsoho le letona la hao le o bolokile.

₁₅Tadima jwale Behemothe (kubu), eo ke e entseng jwalokaha ke o entse. E fula jwang jwaloka kgomo. ₁₆Bona, jwale, matla a matheka a yona, le bothata ba mesifa ya mpa ya yona. ₁₇E sisinya mohatla, e o tiisa jwaloka kedare; mesifa ya dirope tsa yona e lohilwe hammoho; ₁₈masapo a yona a ka dipompo tsa koporo, mme dikgopo tsa yona di jwaloka ditshiya tsa tshepe. ₁₉Ke mosebetsi o fetisisang wa Modimo; ya e bopileng o e neile lerumo. ₂₀E ikgella dijo tsa yona dithabeng, moo diphoofolo tsa naha di ipapallang teng. ₂₁E ithoballa meriting ya difate tsa lotuse, mosemeng le mahlakeng. ₂₂Difate tsa lotuse di e etsetsa moriti, meduwane ya noka e e kopela hare. ₂₃Bona, dinoka leha di ka tlala, ha e tshohe letho; e ke ke ya makala, leha Jordane e ka kgokoloha hodima hlooho ya yona. ₂₄Na o tla leka ho e tshwara, e fadimehile, kapa o e phunye nko, o tle o e holehe na?