JOBO 35

₁Elihu a boela a isetsa polelo pele, a re: ₂Na o hloma hore ke taba e lokileng ha o ipea ya lokileng ho fetisa Modimo na, ₃ha o re: Molemo ho nna e tla ba eng? Seo ke tla se rua ka ho se sebe keng? ₄Ke tla etsetsa wena le metswalle ya hao karabo.

₅Tadima nqa mahodimong, mme o bone; o tadime maru; a phahamile ho fetisa wena. ₆Ha o seba, o ka o etsang kahoo? Leha o ka atisa dibe tsa hao, o o senyeditse kae? ₇Ha o lokile, o o thusitse kang? O ruile eng ka mosebetsi wa hao? ₈Sebe sa hao se ka senya motho ya jwaloka wena feela, ho loka ha hao ho ka thusa ngwana wa motho feela.

₉Batho ba lla ka dihloriso tsa batubi; ba bokolla tlasa bothata ba marena. ₁₀Empa ha ho ya botsang, a re: Modimo, Mmopi wa ka, o kae, ₁₁o re neang dipina tsa thabo hara bosiu, o re fileng bohlale bo fetang ba diphoofolo, le hlalefo e fetang ya dinonyana tsa lehodimo? ₁₂Ba fela ba lla, empa Modimo ha o arabe ka baka la boikgohomoso jwa ba babe. ₁₃Tjhe! Modimo o ke ke wa utlwa dithapelo tsa lefeela, Ya matla wohle a ke ke a di ela hloko. ₁₄Leha o boletse hore ha o o bone, leha ho le jwalo, nyewe ya hao o pela wona, o o lebelle. ₁₅Empa kahobane bohale ba wona ha bo eso ho otle, Jobo o hopola hoba ha o re letho ka bobe, ₁₆mme o ntse a ahlamisa molomo wa hae a se na taba; o ntse a bua ditaba tse sa utlwahaleng.