JOBO 32

₁Jwale, banna bao ba bararo ba lesa ho fetola Jobo, hobane e ne e le ya lokileng mahlong a hae.

₂Yaba ho tuka bohale ba Elihu, mora wa Barakeele, wa Buse, wa ntlo ya Rame; bohale ba hae ba tukela Jobo, hobane a ipeile ya lokileng ho fetisa Modimo; ₃hape, bohale ba hae ba tukela metswalle ya hae e meraro, hobane leha ba ne ba hlokile seo ba ka arabang ka sona, leha ho le jwalo, ba ne ba tswile Jobo. ₄Elihu o ne be a diehile ho fetola Jobo, hobane ba ne ba mo feta ka dilemo. ₅Eitse ha Elihu a mpa a bona hoba ho se karabo melomong ya banna ba bararo bao, bohale ba hae ba tuka.

₆Yaba Elihu, mora wa Barakeele, wa Buse, o fetola, a re: Ke monyenyane ka dilemo, mme lona le hodile; ka itshwara ke hona, ka tshaba ho le tsebisa mohopolo wa ka; ₇ka re: Ba nang le matsatsi ba tla bolela, ba dilemo tse ngata ba rute bohlale. ₈Empa moya o teng ho motho, pudulo ya Ya matla wohle ke yona e neang motho kutlwisiso. ₉Ba dilemo tse ngata hase bona ba leng bohlale, ba hodileng hase bona ba utlwisisang tse lokileng. ₁₀Ke ka baka leo ke reng: Mmameleng! le nna ke rata ho tsebisa mehopolo ya ka.

₁₁Bonang, ke ne ke ntse ke lebeletse qetello ya dipolelo tsa lona, ke ne ke sekehela diphetoho tsa lona ditsebe, ha le ntse le nahana seo le tla se bua. ₁₂Ka le mamela ka ho le ela hloko; empa bonang, ha ho e mong ho lona ya hlotseng Jobo, ya arabileng dipolelo tsa hae. ₁₃Leha ho le jwalo, le se ke la re: Re bone bohlale ho yena, ke Modimo feela o ka mo hlolang, e seng motho. ₁₄Ha a ka a lebisetsa dipolelo tsa hae ho nna; nke ke ka mo araba ka mantswe a kang a lona.

₁₅Ba tsielehile, ha ba sa araba letho! Ba timeletswe ke puo! ₁₆Ka lebella, mme ha ba ka ba bua; ba ema, ha ba sa fetola! ₁₇Jwale, ke tla fetola le nna bakeng sa ka; le nna ke tla hlahisa mehopolo ya ka, ₁₈hobane ke kgotse ditaba, mme moya o teng ho nna o ntshututsang. ₁₉Bonang, matshwafo a ka a jwaloka veine e sa kang ya thibollwa, jwaloka makuka a matjha a ratang ho phatloha. ₂₀Ke rata ho bua, ke ntoo tseba ho ntsha letshwea hantle; ke tla ahlamisa melomo ya ka, ke arabe. ₂₁Empa nke ke ka tadima tshobotsi ya motho, nke ke ka qeka motho; ₂₂hobane ha ke tsebe ho qeka; hape, Mmopi wa ka a ka be a phakisa a ntlosa.