JOBO 22

₁Elifase wa Themane a boela a fetola, a re: ₂Na motho a ka etsetsa Modimo molemo ka ntho e nngwe na? Tjhe, le ho leka; motho ya bohlale o molemo ho yena a nnotshi. ₃Ya matla wohle na a ka bona molemo ka ho loka ha hao, mohlomong a be le leruo ha mekgwa ya hao e lokile na? ₄Na o ya o laya ka hobane o a mo tshaba, kapa na a ka isana kahlolong le wena na? ₅Ha ke re, bobe ba hao bo a tshabeha, ditlolo tsa hao di hloka palo na? ₆Hobane o nkile tebeletso ho wa heno feelafeela; o hlobodisitse bahloki, wa nka dikobo tsa bona; ₇ha o a ka wa nea motho ya nyorilweng metsi, mme o hanetse ya lapileng le bohobe ba hao; ₈naha e ne e ruwa ke ya matla, ho ne ho aha teng motho ya hlomphuwang; ₉o ne o kgutlisa basadi ba bahlolohadi ba le feela, o ne o lesa letsoho la dikgutsana ho robeha. ₁₀Ke ka baka leo o kopilweng ke difi, mme botshabeho bo o tshosa hang; ₁₁kapa na ha o bone lefifi le morwallo wa metsi a o apesang?

₁₂Na Modimo ha o a phahama jwaloka lehodimo na? Tadima bohodimo ba dinaledi, bo hole hakakang! ₁₃Mme o re: Modimo o ka tseba eng? Na o ka ahlola, mahlo a wona a phunya lefifi na? ₁₄Maru a o kwahetse hore o sitwe ho bona; bokgwidikweng ba lehodimo, ke moo o haolang teng. ₁₅Na o rata ho nka tsela ya kgale e hatilweng ke ba babe na? ₁₆Athe ba tlositswe ho eso ho be nako, boahello ba bona ba nkilwe ke morwallo; ₁₇ba ne ba re ho Modimo: Sutha ho rona! Na Ya matla wohle a ka etsang bakeng sa rona na? ₁₈Kanthe o ne o tlatsitse matlo a bona ka menono. Maikutlo a ba bolotsana a be hole le nna. ₁₉Ba lokileng ba bona hoo, mme ba thaba; ya se nang molato o tsheha ka bona, o re: ₂₀E, bao e leng dira ho rona ba fedile, mollo o tjhesitse bokgabane ba bona.

₂₁Ka baka leo, o etse setswalle le Modimo, mme o tla bona kgotso; ka mokgwa o jwalo, leseho le tla tla ho wena. ₂₂Ako amohele thuto e tswang molomong wa wona, o kenye dipolelo tsa wona pelong ya hao. ₂₃Ha o ka kgutlela ho Ya matla wohle, o tla boela o tsoswe; feela, o leleke bokgopo tenteng ya hao. ₂₄O lahlele kgauta leroleng, le kgauta ya Ofire majweng a molatswana. ₂₅Ke hona Ya matla wohle ho wena e tla ba qubu ya kgauta le silefera e benyang haholo; ₂₆hobane moo o tla fumana thabo ho Ya matla wohle, o emisetse sefahleho sa hao ho Modimo. ₂₇O tla o rapela, mme o tla o utlwa; o tla phetha dikano tsa hao. ₂₈Ha o ka rera taba e nngwe, e tla o hlahela, lesedi le kganye tseleng ya hao. ₂₉Leha o ka tsamaya boikokobetsong, o tla ikopela matla a ho itsosa. O boloka motho ya ikokobetsang; ₃₀esita le ya sa hlokeng molato o tla mo namolela ka baka la bosweu ba matsoho a hao!