JOBO 20

₁Yaba Tsofare wa Naama o fetola, a re: ₂Mehopolo ya ka, bakeng sena, e tla mponela phetolo, le hona ke sitwa ho itshwara maikutlong a ka. ₃Ke utlwile dikgalemelo tse ntlhabisang dihlong, empa kelello ya ka e nnea karabo.

₄Na ha o tsebe hoba, esale kgalekgale, haesale motho a bewa lefatsheng, ₅thabo ya molotsana e fela kapele, le ho nyakalla ha ya kgopo e le ha motsotso o le mong feela? ₆Le hoja a ka hola ho isa lehodimong, hlooho ya hae ya fihla marung, ₇leha ho le jwalo, o tla fela jwaloka lethete la hae, ka ho sa feleng; ba mmoneng ba tla re: O kae? ₈O tla feta jwaloka toro, mme a ke ke a hlola a fumanwa; a timele jwaloka pono ya bosiu. ₉Le mahlo a kileng a mmona, ha a sa tla hlola a mmona; ditulo tsa hae ha di sa tla boela di mmone. ₁₀Bara ba hae ba tla kgathatswa ke mafutsana, matsoho a hae a tla tshwanela ho busetsa leruo la hae. ₁₁Masapo a hae a tletse matla a botjha, athe jwale a tla robala le yena leroleng. ₁₂Leha bolotsana bo ne bo le monate molomong wa hae, mme a bo patile katlasa leleme la hae, ₁₃a bo bolokile, a hanne ka bona, a bo bolokile mahalapeng a hae, ₁₄dijo tseo di tla fetoha maleng a hae, e be mahloko a marabe kahare ho yena. ₁₅O metsitse menono, mme jwale o tshwanetse ho e hlatsa; Modimo o ya e ntsha mpeng ya hae. ₁₆O antse mahloko a marabe, mme leleme la qowane le tla mmolaya. ₁₇Mahlo a hae ha a sa tla thabela melatswana, leha e le melapo, leha e le dinokana tsa dinotshi le lebese. ₁₈O tla busetsa ditlatlapilweng tsa hae, a ke ke a di rua. O tla busetsa tse lekanang le tseo a di tlatlapileng, mme ha a sa tla di thabela. ₁₉Hobane o tubile basenyehi, o ba lahlile; mme leha a sentse matlo ka mano, ha a ka ke a a tsosa. ₂₀Erekaha a sa tsebe ho kgolwa kateng ho yena, o tla sitwa ho pholosa seo a se ratang. ₂₁Ha ho letho le phonyohang meharong ya hae; ka baka leo, boiketlo ba hae bo ke ke ba tiya. ₂₂O tla hloka, leha maruo a hae a mo atetse haholo; matsoho a ba tujwang a tla mo wela hodimo. ₂₃Modimo ke wona o tlang ho kgorisa mpa ya hae, o tla mo otla ka tjheso ya kgalefo ya wona, o e nese hodima nama ya hae. ₂₄Leha a ka balehela sebetsa sa tshepe, seqha sa koporo se tla mo hlaba. ₂₅O ya ntsha motsu mmeleng wa hae, tshepe e hadimang e tswe nyokong ya hae; o fedile o tshwerwe ke botshabeho ba lefu. ₂₆Lefifi le tshabehang e tla be letlotlo la hae; mollo o sa butswelwang ke motho o tla mo tjhesa, o fedise se setseng ka tenteng ya hae. ₂₇Lehodimo le tla senola bokgopo ba hae, mme lefatshe le tla tsoha ho mo qosa. ₂₈Maruo a ntlo ya hae a tla timela, a tla feta ka letsatsi la kgalefo ya Modimo. ₂₉Ke yona kabelo ya molotsana e tswang ho Modimo, le lefa le beetsweng yena ke Modimo.