JOBO 17

₁Phefumoloho ya ka e a timela, matsatsi a ka a tima, lebitla le nkemetse.

₂Efela basomi ba nteetse hare, mme mahlo a ka a bona dihlohloletso tsa bona. ₃Ako mpeele selebeletso bakeng sa ka; hobane ke mang ya ka nkemelang a ntshwere ka letsoho? ₄Hobane dipelo tsa bona o di kwaletse kutlwisiso; ka baka leo, o ke se ke wa ba phahamisa. ₅Ya ekang motswalle wa hae, mahlo a bana ba hae o tla a bona a timilwe.

₆O mpeile sesomo hara batho; ke fetohile ntho e nyatsehang pela bona. ₇Dillo di thibile mahlo a ka, ditho tsohle tsa ka ke seriti feela. ₈Ba lokileng ba maketse ke hoo, ba se nang molato ba halefela ba bolotsana. ₉Leha ho le jwalo, ya lokileng o tiisetsa tseleng ya hae, ya nang le matsoho a masweu o eketsa ho ipha matla.

₁₀Haele ka lona kaofela, kgutlang hle, le boye; nke ke ka bona motho ya hlalefileng hara lona. ₁₁Matsatsi a ka a fetile, merero ya ka eo ke e hopotseng pelong ya ka, merero ya ka e wele fatshe. ₁₂Bosiu ba re ke motshehare; lesedi ba re ke motshehare; lesedi ba re le haufi, ha le phirimile. ₁₃Jwale, ke tadimile nqalo ya bafu hoba e tla ba ntlo ya ka; ke adile diphate tsa ka nqalong e lefifi. ₁₄Ke re ho lebitla: O ntate! le ho diboko: Le mme le ngwaneso! ₁₅Mme jwale, tshepo ya ka e kae? E tla bonwa ke mang e hlahile? ₁₆E tla theohela dikgorong tsa nqalo ya bafu, moo re ya robala hammoho leroleng.