JOBO 10

₁Pelo ya ka e kgobohelwa ke bophelo ba ka; ha ho le jwalo, e ka kgona ke neele ho dumaduma ha ka sebaka, ke bolele bohloko ba moya wa ka. ₂Ke tla re ho Modimo: O se ke wa ntswa, o mpe o mpolelle seo o se tsekang ho nna! ₃Na o ka thaba ka ho nketsa hampe, hore o be o lahle mosebetsi wa matsoho a hao, mme o kganyetse merero ya ba babe na? ₄Na o na le mahlo a nama na? Na o bona kamoo batho ba bonang kateng na? ₅Na matsatsi a hao a jwaloka a batho na? le dilemo tsa hao na di jwaloka tsa batho na, ₆ha o batla molato wa ka, mme o botsisisa sebe sa ka na? ₇Athe o ntse o tseba hobane ha ke na molato, le hobane ha ho motho ya ka nnamolelang letsohong la hao.

₈Matsoho a hao a mpopile, a mphethisitse kahohle: athe o rata ho mpshatla! ₉Elellwa hle hobane o mpopile jwaloka letsopa; mme o re, ke kgutlele leroleng? ₁₀Na hase wena o ntsholotseng jwaloka lebese, wa nqhatsa jwaloka mafi a tiileng? ₁₁Na ha o a ka wa nkapesa ka letlalo le ka nama, le ho ntoha ka masapo le mesifa na? ₁₂O nneile bophelo le mohau, mme paballo ya hao e sireleditse phefumoloho ya ka.

₁₃Empa pelong ya hao o patile taba! Ke bona seo o se hopotseng ka ho wena. ₁₄Ha ke entse sebe, o ntse o ntadima hampe, o hana ho ntshwarela molato wa ka. ₁₅Leha nka tshoha ke etsa molato, ho madimabe nna! Le hoja ke se na molato, ke tshaba ho emisa hlooho, hobane ke kgotshe dihlong, mme ke itsebela bomadimabe ba ka. ₁₆Ha ke be nka e emisa, o ne o ya mphallela jwaloka tau, o phethe mehlolo ya hao hodima ka. ₁₇O ne o ya hlahisa dipaki tse ding ho ntwantsha, le ho nkatisetsa kgalefo ya hao; o ne o ya ntlela ka makgotla a phomotsanang!

₁₈Jo! Na o nntsheditseng popelong ya mme? Nka be ke shwele teng, ke se ke ka bonwa ke leihlo la motho; ₁₉nka be ke le jwaloka ya bileng siyo, nka be ke jaretswe lebitleng ke etswa popelong. ₂₀Matsatsi a ka na ha a makaenyana na? Ha ho le jwalo, lesa, o ntlohele, ke tle ke boele ke ele sefahleho hanyenyane, ₂₁ke eso ho ikele moo nke keng ka hlola ke kgutla teng, naheng ya lefifi le ya moriti wa lefu; ₂₂e leng naha e ntsho jwaloka bosiu, ya moriti wa lefu le moferefere, moo lesedi le tshwanang le lefifi.