JEREMIA 41

₁Ka kgwedi ya bosupa, Ishmaele, mora Nethania, mora Elishama, wa leloko la borena, tona ya morena, a tla ho Gedalia, mora Akikame, Mitspe, a ena le batho ba leshome, mme ba dula teng dijong hammoho, Mitspe. ₂Yaba Ishmaele, mora Nethania, le batho ba leshome bao a nang le bona, ba ema, ba hlaba Gedalia, mora Akikame, mora Shafane, ka lerumo, ba mmolaya, e le eo morena wa Babilona a neng a mmeile ho disa naha; ₃le bona Bajuda kaofela ba neng ba le teng ho Gedalia, Mitspe, le Bakalde ba neng ba le teng, e le bahlabani, Ishmaele a ba bolaya.

₄Ka tsatsi la bobedi, ha Gedalia a setse a shwele, ho ntse ho sa tsebe motho, ₅ha tla batho ba Sikeme, le ba Silo, le ba Samaria, ba mashome a robileng meno e le mmedi, ba beotswe ditedu, le meaparo ya bona e hahotswe, ba phatsitswe, ba tshwere dinyehelo le dibano, ba di tlisa tlung ya Jehova. ₆Yaba Ishmaele, mora Nethania, o tswa Mitspe ho ya ba kgahlanyetsa, a ya a ntse a lla; yare ha a teana le bona, a ba bolella, a re: Tloong ho Gedalia, mora Akikame. ₇Eitse ha ba fihlile hare ho motse, Ishmaele, mora Nethania, a ba bolaya, a ba lahlela lemeneng, a ena le batho bao a nang le bona. ₈Empa batho ba leshome ba eba teng ho bona, ba bolella Ishmaele, ba re: O se ke wa re bolaya, hobane re na le moo re patileng koro naheng, le harese, le ole, le dinotshi. Yaba o a ba lesela, mme ha ba ka ba eshwa le ba habo bona. ₉Lemena leo Ishmaele a lahletseng ho lona ditopo kaofela tsa batho bao a ba bolaileng hammoho le Gedalia, ke leo morena Asa a neng a le entse ka ho tshaba Baesha, morena wa Iseraele; ke lona lemena leo Ishmaele a kileng a le tlatsa ditopo. ₁₀Yaba Ishmaele o ya le ba siilweng kaofela ba setjhaba ba neng ba le Mitspe, le baradi ba morena le ba setjhaba kaofela ba neng ba setse Mitspe, bao Nebusaradane, molaodi wa balebedi, a neng a ba beile tisong ya Gedalia, mora Akimane; Ishmaele, mora Nethania, a ya le bona, a tloha teng a lebile nqa naha ya bana ba Ammone.

₁₁Johanane, mora Karea, le balaodi kaofela ba neng ba le ho yena, ba utlwa diketso tsohle tse mpe tseo Ishmaele, mora Nethania, a di entseng. ₁₂Yaba ba nka batho ba bona kaofela, ba phalla ho lwantsha Ishmaele, mora Nethania; ba mo fihlela metsing a maholo a haufi le Gibeone. ₁₃Yare ha setjhaba kaofela se leng ho Ishmaele se bona Johanane, mora Karea, le balaodi kaofela ba leng ho yena, sa ithabela. ₁₄Setjhaba kaofela seo Ishmaele a neng a se tshwere Mitspe sa reteleha, sa sokoloha, sa ya ho Johanane, mora Karea. ₁₅Empa Ishmaele, mora Nethania, a phonyoha ho Johanane, a ena le batho ba robileng meno e le mmedi, mme a ya ho bana ba Ammone. ₁₆Yaba Johanane, mora Karea, le balaodi ba makgotla kaofela ba neng ba le ho yena, ba nka masala wohle a setjhaba ao Ishmaele, mora Nethania, a neng a a tlositse Mitspe, hobane a bolaye Gedalia, mora Akikame, e leng banna ba dinatla tsa ntwa, le basadi le bana, le maqhalaha, ba ba kgutlisa Gibeone; ₁₇mme ba tsamaya, ba ya dula tlung ya phapohelo ya Kimhame, maloka le Bethlehema, ba tle ba ntoo ya Egepeta, ka baka la ho tshaba Bakalde, ₁₈hobane ba ne ba ba tshaba, hobane Ishmaele, mora Nethania, o ne a bolaile Gedalia, mora Akikame, eo morena wa Babilona a neng a mmeile ho disa naha.