Jeremia o kenngwa teronkong.
1Tulong tsa Jekonia, mora Jojakime, ha busa Tsedekia, mora Josiase, a beilwe morena lefatsheng la Juda ke Nebukadresare, morena wa Babilona. 2Haele yena le bahlanka ba hae le setjhaba sa lefatshe, ha ba ka ba utlwa mantswe a Jehova, ao a neng a ntse a a bolela moporofeta Jeremia.
3Morena Tsedekia a romela Jukale, mora Shelemia, le Sofonia, mora Maaseia, moprista, ho moporofeta Jeremia, ka ho re: Ako re rapelle ho Jehova, Modimo wa rona. 4Ke ha Jeremia a ne a ntse a kena, a etswa hara setjhaba, a eso ho kenngwe teronkong. 5Makgotla a Faro a ne a tswile Egepeta; Bakalde ba neng ba thibella Jerusalema ba ne ba utlwile taba tseo, mme ba ne ba tlohile pela Jerusalema.
6Yaba lentswe la Jehova le tla ho moporofeta Jeremia, la re: 7Ho itswe ke Jehova, Modimo wa Iseraele: Bolellang morena wa Juda, ya le romileng ho nna ho mpotsa, le re: Bona, makgotla a Faro a tswetseng lona ho le tlatsa, a tla boela lefatsheng la habo Egepeta; 8mme Bakalde ba tla boya, ba lwantshe motse ona; ba tla o kena, ba o tjhese ka mollo. 9Ho itswe ke Jehova: Le se ke la ithetsa ka ho re: Bakalde ba fela ba tla tloha, ba ye hole le rona, athe ha ba tla ke ba tloha. 10Hobane hojane ebe le bolaile sera sohle sa Bakalde ba le lwantshang, mme ho setse batho ba maqeba feela ho bona, ba ne ba tla tsoha, e mong le e mong tenteng ya hae, ba tjhese motse ona ka mollo.
11Eitse hobane makgotla a Bakalde a tlohe pela Jerusalema ke ho tshaba makgotla a Faro, 12Jeremia a tswa Jerusalema ho ya lefatsheng la Benjamine, ho intsha hara setjhaba. 13A re a sa fihla monyako wa Benjamine, molaodi wa dibohodi o ne a le hona teng, lebitso la hae e le Jireja, mora Shelemia, mora Hanania, mme a tshwara moporofeta Jeremia, ka ho re: O ya ineela Bakalde. 14Jeremia a re: Leshano! Ha ke ye ho ineela Bakalde. Empa eo ha a ka a mo dumela. Yaba Jireja o tshwara Jeremia, a mo tlisa ho baholo. 15Yaba baholo ba hlwenyetsa Jeremia, ba mo otla, ba mo isa tlung ya teronko, ka tlung ya Jonathane mongodi, hobane ba ne ba e entse teronko. 16Jeremia a kena tlung ya teronko la mameneng, mme Jeremia a hlola teng ditshiu tse ngata.
17Morena Tsedekia a ntoo romela ho mo lata, mme morena a mmotsa ka tlung ya hae, ka sephiring, a re: Na lentswe le teng le tswang ho Jehova na? Yaba Jeremia o araba, a re: Le teng. Mme a re: O tla neelwa matsohong a morena wa Babilona. 18Hape, Jeremia a bolella morena Tsedekia, a re: Ke o sitetswe kang, kapa wena, kapa bahlanka ba hao, kapa setjhaba sena, ha le nkentse teronkong? 19Ba kae baporofeta ba lona ba nnileng ba le porofetela, ba re: Morena wa Babilona a ke ke a le futuhela, lona le lefatshe lena? 20Mme jwale, ako mmamele, monga ka, morena, thapelo ya ka e ke e bewe pela hao, o se ke wa mpusetsa ka tlung ya Jonathane mongodi, ke tle ke se ke ka shwela teng. 21Yaba morena Tsedekia o laela hore Jeremia a bewe lebaleng la teronko, a newe ka tsatsi le leng le le leng polokwe ya bohobe e tswang seterateng sa diapehi, ho fihlela bohobe bo fela motseng. Mme Jeremia a hlola lebaleng la teronko.
