JEREMIA 34

₁Lentswe le tswang ho Jehova le kile la tla ho Jeremia, ha Nebukadnesare, morena wa Babilona, le makgotla a hae kaofela, le mebuso kaofela ya lefatshe e buswang ke letsoho la hae, le ditjhaba kaofela, di ntse di lwantsha Jerusalema le metse kaofela e mathokong a teng, la re: ₂Ho itswe ke Jehova, Modimo wa Iseraele: Eya, o bolelle Tsedekia, morena wa Juda, o re o yena: Ho itswe ke Jehova: Bona, ke ya neela motse ona matsohong a morena wa Babilona, a tle a o tjhese ka mollo. ₃Mme wena, o ke ke wa phonyoha matsohong a hae, o mpa o tla tshwarwa, o neelwe matsohong a hae; mahlo a hao a tla bona mahlo a morena wa Babilona, molomo wa hae o bue le molomo wa hao, mme o tla ya Babilona. ₄Leha ho le jwalo, o mamele lentswe la Jehova, wena Tsedekia, morena wa Juda: Ho itswe ke Jehova bakeng sa hao: O ke ke wa shwa ke lerumo; ₅o tla shwa ka kgotso; le ho tjhesetswa dibano jwaloka bontatao, marena a pele a bileng teng pele ho wena, o tla tjhesetswa dibano jwalo, mme ba tla o llela, ba re: Jo morena! Hobane nna ke boletse jwalo, ho bolela Jehova.

₆Moporofeta Jeremia a bolella Tsedekia, morena wa Juda, mantswe ao kaofela Jerusalema. ₇Ke ha makgotla a morena wa Babilona a ne a lwantsha Jerusalema, le metse kaofela ya Juda e sa setseng, Lakishe, le Aseka, hobane e ne e sa setse ya metse ya Juda, e le metse ya diqhobosheane.

₈Lentswe le tswang ho Jehova la tla ho Jeremia, ha morena Tsedekia a ne a se a entse selekane le setjhaba kaofela se leng Jerusalema, hore ba bolele tokollo; ₉hore e mong le e mong a lesele mofo wa hae, e mong le e mong a lesele lekgabunyane la hae, e leng Baheberu, e motona le e motshehadi, hore ba ikele; hore ho tle ho se ke ha hlola ho eba Mojuda ya ruileng ngwanabo. ₁₀Mme ha dumela baholo kaofela le setjhaba kaofela ho kena selekaneng sa ho lesela e mong le e mong mofo wa hae, e mong le e mong lekgabunyane la hae, hore ba ikele, ho se be ya ka hlolang a ba rua; ba dumela teng, ba ba lesela. ₁₁Ba mpa ba ntoo kweneha, mme ba lata bahlanka ba batona le bahlanka ba batshehadi bao ba neng ba ba lesetse ba ikela, ba boela ba ba bea bafo le makgabunyane.

₁₂Yaba lentswe la Jehova le tla ho Jeremia, la re: ₁₃Ho itswe ke Jehova, Modimo wa Iseraele: Nna ke ne ke entse selekane le bontata lona moholo, mohla ke ba ntshang lefatsheng la Egepeta, tlung ya bohlanka, ka re: ₁₄Ho feleng ha dilemo tse supileng, le ke le lesele e mong le e mong ngwanabo wa Moheberu ya ithekisitseng ho lona; a ne a le sebeletsa ka dilemo tse tsheletseng, le ntoo mo lesela a ikele; empa bontata lona ha ba ka ba nkutlwa, ha ba ka ba sekeha tsebe. ₁₅Lona, kajeno lena le ne le bakile, le ne le entse ho lokileng pontsheng ya ka, ka ho bolela tokollo e mong le e mong ho ngwanabo, le ne le entse selekane pela ka, ka tlung eo lebitso la ka le bitswang hodima yona. ₁₆Le mpa le boetse le fetohile, le silafaditse lebitso la ka, le boetse le latile e mong le e mong mofo wa hae, e mong le e mong lekgabunyane la hae, bao le neng le kile la ba lesela ba ikela ka ho rata ha bona; le boetse le ba latile hore e be bafo ba lona le makgabunyane a lona.

₁₇Ka baka leo, ho itswe ke Jehova: Lona, ha le a ka la nkutlwa ho bolela tokollo e mong le e mong ho ngwanabo, e mong le e mong ho motswalle wa hae; bonang, ke le bolella tokollo, ho bolela Jehova, e leng ya lerumo, le ya lefu la sewa, le ya tlala, mme ke le neela ho tsokotseha mebusong yohle ya lefatshe. ₁₈Batho ba robileng selekane sa ka, ba sa phetheng mantswe a selekane seo ba se entseng pela ka ka namane eo ba kileng ba e seha ka lehare, mme ba feta hara mekgekgetho ya yona, ₁₉e leng baholo ba Juda le baholo ba Jerusalema, le matona, le baprista, le setjhaba kaofela sa lefatshe, ba fetileng hara mekgekgetho ya namane; ₂₀ke tla ba neela matsohong a bao e leng dira ho bona le matsohong a ba batlang bophelo ba bona; ditopo tsa bona e tla ba dijo tsa manong a lehodimo le tsa dibatana tsa lefatshe. ₂₁Le yena Tsedekia, morena wa Juda, le mahosana a hae, ke tla ba neela matsohong a ba batlang bophelo ba bona le matsohong a makgotla a morena wa Babilona, a tswa le kgutlela. ₂₂Bonang, ke a laela, ho bolela Jehova, mme ba tla boela ho motse ona, ba o lwantshe, ba o hape, ba o t hese ka mollo, le metse ya Juda ke e etse lefeella le sa neng baahi.