BAAHLODI 1

₁Eitse hobane Joshua a timele, bana ba Iseraele ba botsa Jehova, ba re: Ke mang ho rona ya tla simolla ho futuhela Bakanana le ho ba lwantsha? ₂Jehova a araba, a re: Ho futuhe Juda; bonang, ke neetse lefatshe matsohong a hae. ₃Juda a bolella Simeone ngwanabo, a re: A re nyolohele le wena fatsheng leo ke le abetsweng, re tle re futuhele Bakanana, re ntoo ya le wena ho le abetsweng wena. Mme Simeone a ya le yena.

₄Juda a nyoloha, mme Jehova a neela Bakanana le Baferese matsohong a bona, mme ba bolaya banna ba kete tse leshome Beseke. ₅Ba fihlela Adoni-Beseke motseng wa Beseke, ba mo lwantsha, mme ba qhala Bakanana le Baferese. ₆Adoni-Beseke a baleha, mme ba mo phallela, ba mo tshwara, ba mo poma menwana e metona ya matsoho le ya maoto. ₇Yaba Adoni-Beseke o re: Marena a mashome a supileng a pomilweng menwana e metona ya matsoho le ya maoto, a ne a thola makumane katlasa tafole ya ka. Modimo o buseditse ho nna seo ke se entseng. Ba mo isa Jerusalema, mme a shwela teng.

₈Yaba bana ba Juda ba futuhela Jerusalema, ba o kena; ba bolaya baahi ba teng ka bohale ba lerumo, mme ba tjhesa motse. ₉Bana ba Juda ba ntoo theoha, ho ya futuhela Bakanana ba ahileng dithabeng, le Borwa, le lehwatateng. ₁₀Hape, ba Juda ba futuhela Bakanana ba ahileng Hebrone (bitso la pele la Hebrone e ne e le Kiryath-Arba), mme ba hlola metse ya Sheshai, le Akimane, le Talmai. ₁₁Eitse ha ba tloha teng, ba futuhela ba ahileng Debire (bitso la pele la Debire e ne e le Kiryathe-Sefere).

₁₂Kalebe a re: Leha e ka ba mang ya tla hlola Kiryathe-Sefere, a o kene, ke tla mo nea moradi wa ka Aksa, e be mosadi wa hae. ₁₃Othniele, mora Kenase, moena Kalebe, a o kena, mme Kalebe a mo nea moradi wa hae Aksa, hore e be mosadi wa hae. ₁₄Aksa ha a fihla hae, a susumetsa monna wa hae hore a qele tshimo ho ntatae. Ebile Aksa o theoha eseleng ya hae, mme Kalebe a re ho yena: Taba ya hao ke efe? ₁₅Yena a re: Ntshitse ka ho hong; hobane o nneile naha e lebileng nqa borwa; mphe le didiba. Kahoo, Kalebe a mo nea didiba tse kahodimo, le didiba tse katlase.

₁₆Haele bana ba Mokene, mohwehadi wa Moshe, ba ne ba tlohile motseng wa Dipalema, ba nyolohetse le bana ba Juda feelleng la Juda, le leng ka nqa borwa ho Arade; mme ba tla, ba aha le batho ba teng.

₁₇Hape, Juda ba tsamaya le Simeone ngwanabo, ba ya, ba hlola Bakanana ba ahileng Tsefathe, mme ba ba neela anathema. Ka baka leo, motse oo wa rewa lebitso la Horma (anathema). ₁₈Juda a nka le Gasa le naha ya teng, le Ashkelone le naha ya teng, le Ekrone le naha ya teng. ₁₉Jehova a ba le Juda, mme Juda a hapa dithaba, a mpa a sitwa ho tlosa ba ahileng lehwatateng, kahobane ba ne ba na le makoloi a tshepe. ₂₀Kalebe yena a newa Hebrone, kamoo Moshe a neng a boletse kateng, mme a leleka bara ba bararo ba Anake teng.

₂₁Haele bana ba Benjamine, ha ba ka leleka Bajebuse ba ahileng Jerusalema; ka baka leo, Bajebuse ba nna ba aha Jerusalema le bana ba Benjamine ho fihlela kajeno.

₂₂Ba ntlo ya Josefa bona ba nyolohela Bethele, mme Jehova a ba le bona. ₂₃Ba ntlo ya Josefa ba romela ho hlwela Bethele (bitso la pele la motse oo e ne e le Luse). ₂₄Dihlwela tsa bona motho ya tswang motseng, tsa re ho yena: Ako re supise moo motse o ka kenwang, mme re tla o etsetsa mohau. ₂₅Eitse hobane a ba supise moo motse o ka kenwang, ba bolaya ba motse ka bohale ba lerumo, ba mpa ba hauhela motho eo le bohle ba ntlo ya hae. ₂₆Motho eo a fallela naheng ya Bahethe, mme a haha motse teng, a o rea lebitso la Luse. Esale lebitso la wona le kajeno.

₂₇Manasse yena ha a ka a leleka batho ba Bethe-Sheane le ba metse ya teng, leha e le ba Thaanake le ba metse ya teng, leha e le ba ahileng Dore le ba metse ya teng, leha e le ba ahileng Jibleame le ba metse ya teng, leha e le ba ahileng Meggido le ba metse ya teng; Bakanana ba mpa ba hanella naheng eo. ₂₈Eitse hobane Baiseraele ba iphe matla, ba ntshisa Bakanana lekgetho, ba mpa ba se ke ba ba lelekela ruri.

₂₉Haele Efraime, ha a ka a leleka Bakanana ba ahileng Gesere; Bakanana ba nna ba aha le bona Gesere.

₃₀Sabulone yena ha a ka a leleka ba ahileng Kitrone, leha e le ba ahileng Nahalole; Bakanana ba nna ba aha le bona, ba mpa ba ba ntshetsa lekgetho.

₃₁Asere, ha a ka a leleka ba ahileng Akko, leha e le ba ahileng Sidone, le Aklabe, le Aksibe, le Helba, le Afike, le Rehobe. ₃₂Baasere ba nna ba aha le Bakanana ba ahileng naheng eo, ba se ke ba ba leleka.

₃₃Nefthali yena ha a ka a leleka ba ahileng Bethe-Shemeshe, leha e le ba ahileng Bethe-Anathe; a nna a aha le Bakanana ba ahileng naheng eo; ba ahileng Bethe-Shemeshe le Bethe-Anathe ba mpa ba mo ntshetsa lekgetho.

₃₄Baamore ba patisa bana ba Dane dithabeng, ba se ke ba ba dumella ho theohela lehwatateng. ₃₅Kahoo, Baamore ba hanella Hare-Herese, le Ajalone, le Shaalbime; leha ho le jwalo, ba ntlo ya Josefa ba ba imela, ba ba ba ntshiswa lekgetho. ₃₆Haele naha ya Baamore e ne e tloha thabeng ya Akrabbime, lefikeng, le ho ya nqa hodimo.