ESAIA 32

₁Bonang, morena o tla busa ka ho loka, mahosana le wona a dise ka ho loka. ₂E mong le e mong wa bona o tla ba jwaloka tshireletso ha moya o foka, jwaloka lehaha ha sefefo se etla, jwaloka molatswana wa metsi naheng e omileng, le jwaloka moriti wa lefika le phahameng naheng e nyorilweng. ₃Mahlo a ba bonang ha a sa tla tutubala, ditsebe tsa ba utlwang di tla mamela. ₄Dipelo tsa ba potlakang di tla lokela ho utlwisisa, leleme la ya kokotletsang le bue ka hlalosetso. ₅Molotsana ha a sa tla bitswa motho ya hlomphehang, mothetsi a ke ke a bitswa motho ya bokgabane. ₆Hobane molotsana o bolela tsa bolotsana feela, pelo ya hae e neetswe bobe, a tle a etse bolotsana, a sebe Jehova ka dipuo tsa bohata, a beelle moya wa ya lapileng tlala, a time ya nyorilweng seno. ₇Haele mothetsi, dibetsa tsa hae ke tsa bolotsana, o loha mano ho timetsa mosenyehi ka dipolelo tsa leshano, leha taba tsa mohloki e le tse lokileng. ₈Empa motho ya kgabane o rera tsa bokgabane o phehella tsa bokgabane.

₉Tsohang, lona basadi ba iketlang, le utlwe lentswe la ka! Lona baradi ba itshepang, le mamele dipolelo tsa ka! ₁₀Ho tla feta selemo se le seng se nang le matsatsi a mang, le ntoo tsieleha, lona ba iketlileng, hobane ho kgolwa ha merara ho tla ba siyo, ho ke ke ha kotulwa le ditholwana. ₁₁Tsohang, baiketli! Thothomelang, baitshepi! Lahlang dikobo tsa lona, le hlobole, le itlame matheka ka lesela le mahwashe! ₁₂Ho tla itetwa difuba ka baka la dirapa tse kgahlisang, le ka baka la merara e behang haholo! ₁₃Dibajwa le meutlwa di tla mela naheng ya setjhaba sa ka, le hodima matlo a thabo kaofela a motse wa menyaka. ₁₄Hobane matlo a borena a tla tlohelwa, motse wa lerata o tla fetoha lesupi; leralla le tora ya sebohodi e be mahaha ka ditshiu le ditshiu, e be thabo ya dipitsi tsa naha le makgulo a mehlape, ₁₅ho fihlela moya wa lehodimo o tshelwa hodima rona, le lefeella le fetoha serapa, le serapa se tshwana le moru.

₁₆Ke moo ho loka ho tla ikahela lefeelleng, bokgabane bo hlole bo le teng serapeng. ₁₇Moputso wa ho loka e tla ba kgotso, tholwana ya ho loka e be phomolo le boiketlo ka ho sa yeng kae. ₁₈Setjhaba sa ka se tla aha moahong wa kgotso, le matlung a tshepehang, nqalong tsa boiketlo le phomolo. ₁₉Empa sefako se tla wela hodima moru, mme motse o tla kokobetswa tlasetlase. ₂₀Ho lehlohonolo lona ba jalang kahohle naheng e noseditsweng, ba sa kgineng leoto la kgomo le la esele!