BAHEBERU 3

₁Ka baka leo, banabeso ba halalelang, ba nang le kabelo pitsong ya lehodimo, le ke le lemohe Jesu Kreste, moapostola le moprista e moholo wa tumelo eo re leng ho yona; ₂ya bileng kgabane ho ya mmeileng, jwalokaha Moshe le yena o bile kgabane ka tlung ya hae yohle. ₃Hobane Kreste o lekantswe hoba o tshwanelwa ke tlotliso e fetisang ya Moshe, kamoo ya hahileng ntlo a felang a ena le hlompheho kateng, e fetisang ya ntlo. ₄Hobane ntlo e nngwe le e nngwe e ye e hahuwe ke motho; empa ya hahileng ntho tsohle ke Modimo. ₅Haele Moshe, o fela a bile kgabane ka tlung yohle ya Modimo, ka mokgwa wa mohlanka, ho behela batho tse neng di tshwanetse ho bolelwa. ₆Empa Kreste o bile kgabane pusong ya ntlo ya wona ka mokgwa wa Mora; mme ntlo ya wona ke rona, ha re boloka, ka ho tiya, tshepo le thabo ya tebello ya rona ho fihlela la bofelo.

₇Ka baka leo, jwalokaha Moya o Halalelang o bolela, o re: Kajeno, ha le utlwa lentswe la wona, ₈le se ke la thatafatsa dipelo tsa lona, jwaloka mohla phephetso, mohla moleko feelleng; ₉moo bontata lona ba ntekileng, ba nkgathaditseng, mme ba bone mesebetsi ya ka ka dilemo tse mashome a mane. ₁₀Ka baka leo, ka na ka halefiswa ke moloko oo, ka re: Pelo tsa bona di kgeloha kamehla; ha ba ka ba tseba ditsela tsa ka. ₁₁Ke moo ke hlapantseng kgalefong ya ka, ka re: Ba ke ke ba kena phomolong ya ka!

₁₂Banabeso, iponeleng, esebe e mong ho lona a ka ba le pelo e mpe ya ho se dumele, e mo lahlisang Modimo o phelang; ₁₃le mpe le kgothatsane ka matsatsi wohle, ha ho sa ntsane ho thwe: Kajeno! esebe e mong ho lona a ithatafatsa ka thetso ya sebe. ₁₄Hobane re filwe kabelo ho Kreste, ha re fela re tiisetsa, ho fihlela la bofelo, ho seo e leng motheo wa tshepo ya rona; ₁₅ha ho ntse ho thwe: Kajeno, ha le utlwa lentswe la wona, le se ke la thatafatsa dipelo tsa lona, jwaloka mohla phephetso. ₁₆Na ba le utlwileng, ba ba ba o phephetsa, ke bafe? Na hase bohle ba tlohileng Egepeta ka Moshe? ₁₇Ana ba o halefisitseng ka dilemo tse mashome a mane ke bafe? Na hase ba sitilweng, bao ditopo tsa bona di wetseng feelleng? ₁₈Mme ke ho bomang o kileng wa hlapanya hore ba ke ke ba kena phomolong ya wona, haese ho ba ikgantshitseng? ₁₉Ke moo re bonang hore ba ne ba sitwe ho kena ke ho se dumele.