GENESE 25

₁Abrahama a boela a nka mosadi, lebitso la hae e le Ketura. ₂Mosadi eo a mo tswalla Simrane, le Jokshane, le Medane, le Midiane, le Jishbake, le Shua. ₃Jokshane a tswala Seba le Dedane; bara ba Dedane ya eba Baashurime, le Baletushime, le Baleummime. ₄Bara ba Midiane ke Efa, le Efere, le Henoke, le Abida, le Eldaa: bohle bao ke bara ba Ketura. ₅Abrahama a abela Isaaka tsohle tseo a nang le tsona. ₆Empa haele bara ba basadi ba bang, bao Abrahama a neng a na le bona, Abrahama a ba abela dimpho, mme a ba tlosa pela Isaaka, mora hae, a sa ntse a phela, a ba isa ka nqa botjhabela, naheng ya Botjhabela. ₇Ditshiu tsa bophelo ba Abrahama tseo a phetseng ka tsona, ke tsena: ke dilemo tse lekgolo le mashome a supileng a metso e mehlano. ₈Abrahama a neela moya, a shwa botsofading bo botle, a hodile ho kgodisang; mme a orohela setjhabeng sa habo. ₉Isaaka le Ishmaele, bara ba hae, ba mo pata lehaheng la Makpela, tshimong ya Efrone, mora Tsohare, Mohethe, e pela Mamre. ₁₀Tshimo eo ke eo Abrahama a neng a e rekile ho bara ba Hethe: ya eba moo Abrahama a patwang teng le Sara, mosadi wa hae. ₁₁Yare Abrahama ha a se a shwele, Modimo wa nna wa hlohonolofatsa Isaaka, mora hae; mme a aha sedibeng sa Lakai-roi.

₁₂Ke tsena ditloholo tsa Ishmaele, mora Abrahama, eo Agare, Moegepeta, lekgabunyane la Sara, a mo tswaletseng Abrahama. ₁₃Mabitso a bara ba Ishmaele, ka lenaneo la bona, ka ho tswalwa ha bona, ke wona ana: Ke Nebajothe, letsibolo la Ishmaele, le Kedare, le Adbeele, le Mibsame, ₁₄le Mishma, le Duma, le Masa, ₁₅le Hadade, le Thema, le Jethure, le Nafishe, le Kedma. ₁₆Ke bona bao bara ba Ishmaele, ke ao mabitso a bona ka metse ya bona, le ka meaho ya bona, mahosana a leshome le metso e mmedi a ditjhaba tsa wona. ₁₇Dilemo tsa bophelo ba Ishmaele ke tsena: e bile dilemo tse lekgolo le mashome a mararo a metso e supileng, mme a neela moya, a shwa, a orohela setjhabeng sa habo. ₁₈Ba lesika la hae ba ahela ho nka Havila ho isa Shure e pela Egepeta ka nqa Asiria; Ishmaele a aha jwalo pontsheng ya banababo kaofela.

₁₉Ke tsena ditloholo tsa Isaaka, mora Abrahama. Abrahama o ne a tswale Isaaka. ₂₀Isaaka o ne a na le dilemo tse mashome a mane ha a nyala Rebeka, moradi wa Bethuele, Moarame wa Paddan-Arame, kgaitsedi ya Labane, Moarame. ₂₁Isaaka a rapela Jehova bakeng sa Rebeka, mosadi wa hae, hobane e ne e le nyopa; Jehova a utlwa thapelo ya hae, mme Rebeka, mosadi wa hae, a emola. ₂₂Mafahla a ne a thala maleng a hae; yaba o re: Ha ho le jwalo, taba eo e ntlhahellang? Yaba o ya botsa Jehova. ₂₃Jehova a re ho yena: Ditjhaba tse pedi di ka popelong ya hao; mefuta e mmedi e tla ikarohanya e etswa maleng a hao, setjhaba se tla hlola setjhaba se seng, mme e moholo o tla sebeletsa e monyenyane.

₂₄Ditshiu tsa hae tsa ho beleha ha di phethahala, a tshoha mafahla a le popelong ya hae; ₂₅wa pele a tswa a le mofubedu kahohle, a tshwana le kobo ya boya, mme ba mo rea lebitso la Esau. ₂₆Moenae a tswa kamora hae, letsoho la hae le tshwere serethe sa Esau; mme a rewa lebitso la Jakobo. Isaaka e ne e le motho ya dilemo tse mashome a tsheletseng, mohla ba tswalwang.

₂₇Bashanyana ba hola. Esau ya eba setsomi se masene, motho wa dinaha; Jakobo yena ya eba motho ya se nang mokgwa, ya dulang ditenteng. ₂₈Isaaka a rata Esau, kahobane a ne a eja dinama tse tsomilweng ke yena, mme Rebeka a rata Jakobo. ₂₉Mohlomong, Jakobo o ne a phehile dijo; Esau a fihla a etswa naheng, a kgathetse. ₃₀Yaba Esau o re ho Jakobo: Ako mphe hle, ke je bofubedu boo, hobane ke kgathetse. Ke ka baka leo a reilweng lebitso la Edomo. ₃₁Jakobo a re: Nthekisetse boholo ba hao pele. ₃₂Yaba Esau o re: Bona, ke se ke ya shwa, mme boholwane boo bo tla nthusang? ₃₃Jakobo a re: Ntlhapanyetse he pele. Yaba o a mo hlapanyetsa, a rekisa ka boholwane ba hae ho Jakobo. ₃₄Yaba Jakobo o fa Esau bohobe le moapeho wa dinawa; mme a ja, a nwa, a ntoo ikela. Esau o ne a nyedise boholwane ba hae ka mokgwa o jwalo.