BAGALATA 6

₁Banabeso, ekare ha motho a wela molatong o mong, lona bao le leng ba moya, le ke le mo tsose ka moya o mosa; mme o iponele, esere wa lekwa le wena. ₂Jarelanang diphahlo, mme le phethe jwalo molao wa Kreste. ₃Hobane ekare ha e mong a itekanya hore ke letho, athe hase eng, o ithetsa e le yena. ₄Empa e mong le e mong a ke a leke mesebetsi eo e leng ya hae, mme ke moo a tla ba le sebaka sa ho ithorisa ka tsa hae, e seng ka tsa ba bang. ₅Hobane e mong le e mong o tla jara phahlo eo e leng ya hae.

₆Ya rutwang Lentswe a ke a qotsetse ya mo rutang mesebetsing ya hae yohle.

₇Le se ke la thetswa, Modimo ha o songwe; hobane seo motho a se jalang, o tla se kotula le hona. ₈Ya jallang nama ya hae, o tla kotula nameng ho bola; empa ya jallang Moya, o tla kotula Moyeng bophelo bo sa feleng. ₉Re se ke ra kgathala ke ho etsa hantle, hobane re tla kotula nakong ya teng, ha re sa tepelle. ₁₀Ka baka leo, ha re sa na le sebaka, a re etseng bohle hantle, empa haholo ba ntlo ya tumelo.

₁₁Bonang, ke le ngoletse ka letsoho la ka ka dihlaku tse kaakang.

₁₂Bohle ba ratang ho kgahlisa ka nama, ba le phehella ho bolla, hore ba tle ba se ke ba hlorisetswa sefapano sa Kreste. ₁₃Kanthe esita le bona ba bollang, ha ba boloke molao; empa ba rata ha le ka bolla, ba tle ba ithorise ka nama ya lona. ₁₄Haele nna, ho ithorisa ho be hole le nna, haese ka sefapano sa Morena wa rona Jesu Kreste, eo ka yena lefatshe le thakisitsweng ka nqeng ya ka, le nna ke thakigisitsweng ka nqeng ya lefatshe. ₁₅Hobane ho Jesu Kreste ho bolla le boqai hase letho, empa eo e leng taba ke hore motho e be mmopuwa e motjha. ₁₆Mme haele bohle ba tlang ho ya ka molao oo, kgotso le mohau di be ho bona, le ho Iseraele wa Modimo.

₁₇Empa feela, motho a tle a se ke a ntshwabisa, hobane ke jere mabote a Morena Jesu mmeleng wa ka.

₁₈Banabeso, mohau wa Morena wa rona Jesu Kreste o be le moya wa lona. Amen!