1Yaba o ntlisa monyakong, monyakong o lebileng ka nqa botjhabela, 2mme ka bona kganya ya Modimo wa Iseraele e etla e etswa botjhabela; lentswe la wona le ne le le jwaloka modumo wa metsi a mangata; lefatshe le ne le benya ka kganya ya wona. 3Hoo ke neng ke ho bona, ho ne ho na le ponahalo e kang ya seo ke na beng ke se bone mohla ke tlang ho timetsa motse; tse bonwang di ne di na le ponahalo e kang ya tseo ke na beng ke di bone nokeng ya Kebare; yaba ke ikakgela fatshe ka sefahleho. 4Mme kganya ya Jehova ya kena tlung, ka tsela ya monyako o tadimileng ka nqa botjhabela. 5Ke ha moya o nkuka, wa ntlisa lebaleng le kahare; mme ka bona kganya ya Jehova e tletse ntlo. 6Yaba ke utlwa e mong a bua le nna, a le ka tlung; yaba ho ema motho pela ka; 7a re ho nna: Mora motho, ke yona nqalo ya terone ya ka, le moo bohato ba maoto a ka bo tla ema teng, e leng moo ke tla dula hara bana ba Iseraele ka ho sa feleng; ntlo ya Iseraele hae sa tla silafatsa lebitso la ka le halalelang, leha e le bona, leha e le marena a bona, ka ho boka ha bona le ka ditopo tsa marena a bona, le ka dinqalo tsa bona tse diphahameng. 8Enereha ba bea mohato wa monyako wa bona mabapa le wa ka, le kosene ya bona mabapa le ya ka, ho le lerako feela le ba arohantseng le nna, ba ne ba silafatsa lebitso la ka le halalelang ka manyala a bona ao ba a etsang; ka ba ka ba timetsa kgalefong ya ka. 9Jwale, ba tla lahlela ho boka ha bona le ditopo tsa marena a bona hole le nna, mme ke tla dula hara bona ka ho sa feleng.
10Mora motho, tshwantshetsa ntlo ya Iseraele ntlo eo, hore ba tle ba hlajwe ke dihlong ka baka la makgopo a bona, mme ba lekanye phetheho ya yona. 11Ha ba ka hlajwa ke dihlong ka baka la tsohle tseo ba di entseng, hlo o ba bontshe sebopeho sa ntlo, le mmopo wa yona, le moo ho tsuwang, le moo ho kenwang, le sebopeho sohle sa yona, le ditaelo tsohle tsa yona, le mmopo wohle wa yona, le melao yohle ya yona; o ngole tseo pela bona, hore ba boloke mmopo wa yona le ditaelo tsohle tsa yona, ba ye ka tsona. 12Molao wa ntlo ke wona. Moedi wohle wa yona, o hodima thaba, ka nqa tsohle, ke nqalo e halalelang haholo. Bonang, molao wa ntlo ke oo.
13Ke tsena tekanyo tsa ditswe tsa aletare: setswe sona ke setswe se nang le boahlamo ba seatla; sedulo sa yona se na le setswe se le seng, bophara ba sona bo le setswe se le seng; morumong wa sona, ho na le moqhaka wa bophara ba seatla, o se potolohang; ke sona sedulo sa aletare. 14Ho tloha fatshe ho sedulo ho isa mothating o katlase, ho na le ditswe tse pedi, bophara bona bo le setswe se le seng; ho tloha mothating o monyenyane ho isa mothating o moholo, ho le ditswe tse nne, bophara bo le setswe se le seng. 15Aletare e na le tswe tse nne, mme ho tloha leifong, hodimo ho lona, ho na le manaka a mane. 16Leifo le na le bolelele bo ditswe tse leshome le metso e mmedi, le bophara bo ditswe tse leshome le metso e mmedi, meetse ya lona e mene e lekane. 17Mothati o na le bolelele bo tswe tse leshome le metso e mene meetseng ya wona e mene; moqhaka wa wona o o potolohang o le halofo ya setswe, mme sedulo sa wona se le setswe se le seng kahohle; haele methatinyana ya ho nyoloha, e ne e lebile ka nqa botjhabela.
18Yaba o re ho nna: Mora motho, Morena Jehova o re: Ke tsena ditaelo tsa aletare letsatsing leo e tla etswa ka lona, hore ho tle ho hlajwe ho yona setjheso, mme e fafatswe ka madi. 19O tla nea baprista ba Balevi, bao e leng ba lesika la Tsadoke, ba atamelang pela ka, pohwana ho e etsa sehlabelo sa sebe: ho rialo Jehova. 20O tla nka madi a mong a yona, o a bee manakeng a yona a mane, le dintlheng tse nne tsa mothati wa yona, le moqhakeng o o potolohang, mme o tla e hlatswa jwalo, le ho e phekola. 21O ntoo nka poho ya sehlabelo sa sebe, o e tjhese nqalong e beilweng ya ntlo, kantle ho sehalalelo. 22Ka tsatsi la bobedi, o tla hlaba phooko e hlokang sekodi, e be sehlabelo sa sebe, ho hlatsuwe jwalo aletare, jwalokaha e hlatswitswe ka poho. 23Etlare hobane o qete ho e hlatswa, o tla hlaba pohwana e hlokang sekodi le pheleu e hlokang sekodi. 24O di hlahise pela Jehova; baprista ba tla akgela letswai hodima tsona, ba di etse setjheso ho Jehova. 25Ka matsatsi a supileng, o tla hlaba phooko ka tsatsi le leng le le leng, mme ba tla hlaba pohwana le pheleu tse hlokang sekodi. 26Ka matsatsi a supileng, ba tla phekola aletare, ba e hlwekise, ba e kgethe. 27Ba fele ba qetele matsatsi ao, mme ka la boroba meno e le mmedi le ka a hlahlamang, baprista ba tla hlaba mahlabelo a lona a ditjheso le a teboho aletareng, mme ke tla kgahlwa ke lona: ho bolela Morena Jehova.
