ESEKIELE 14

₁Yaba ho tla ho nna banna ba bang ba baholo ba Iseraele, ba dula pela ka. ₂Teng, lentswe la Jehova la ntlela, la re: ₃Mora motho, banna bana ba kgomaretse ditshwantsho tsa bona ka dipelo tsa bona, ba beile lebaka la kgopiso la bokgopo ba bona maloka le bona: Hleka nka dumela ho botswa ke bona na? ₄Ha ho le jwalo, o bue le bona, o re ho bona: Morena Jehova o re: Leha e ka ba mang wa ntlo ya Iseraele ya kgomaretseng ditshwantsho tsa hae ka pelo ya hae, ya beileng lebaka la kgopiso la bokgopo maloka le yena, ha a etla ho moporofeta, nna ke leng Jehova, ke tla mo arabela ka bongata ba ditshwantsho tsa hae; ₅ke tle ke tshware ba ntlo ya Iseraele ka dipelo tsa bona, hobane ba ntahlile bohle ho latela ditshwantsho tsa bona. ₆Ha ho le jwalo, ere ho ntlo ya Iseraele: Morena Jehova o re: Sokolohang, le lahle ditshwantsho tsa lona, le lahle le manyala wohle a lona; ₇hobane leha e ka ba mang le mang wa ntlo ya Iseraele, kapa wa ba ditjhaba ba jakileng Iseraeleng, ya kgaohanang le nna, ya kgomarelang ditshwantsho tsa hae ka pelo ya hae, ya beang lebaka la kgopiso la bokgopo maloka le yena, a ntoo tla ho moporofeta ho mpotsa ka yena, nna Jehova, ke nna ke tla mo arabela. ₈Ke tla tonela motho eo mahlo, ke be ke mo timeletse, ke mo etse pontsho le polelo, ke mo kgaole setjhabeng sa ka, le tle le tsebe hoba ke nna Jehova.

₉Leha moporofeta a ka thetswa, a ba a bua polelo, e tla ba nna, Jehova, ke thetsitseng moporofeta eo; ke tla mo otlollela letsoho la ka, ke tle ke mo timeletse setjhabeng sa ka sa Iseraele. ₁₀Ba tla jara bokgopo ba bona; seo bokgopo ba ya botsang bo tla ba sona, bokgopo ba moporofeta bo tla ba sona, ₁₁hore ba ntlo ya Iseraele ba se ke ba hlola ba nkwenehela, ba se ke ba hlola ba itshilafatsa ka meikgantsho yohle ya bona, e be setjhaba sa ka, nna ke be Modimo wa bona: ho rialo Morena Jehova.

₁₂Yaba lentswe la Jehova le ntlela, la re: ₁₃Mora motho, ha lefatshe le itseng le ne le ka ntshitelwa ka ho tlola, mme ka le otlollela letsoho, ha ke ne nka le robela kotlo ya bohobe, ka le romela tlala, ka kgaola batho le dikgomo ho lona, ₁₄ha ho ne ho ka ba teng ho lona banna bao ba bararo, Nowe, le Daniele, le Jobo, haele bona, ba ne ba tla namolela meya ya bona, ka ho loka ha bona; ho rialo Morena Jehova. ₁₅Leha ke be nka tlisa dilalome tse bohale lefatsheng lena, tsa timetsa batho ba lona, la tla la senyeha ka baka la dibatana, motho a ba a sitwa ho feta ka lona, ₁₆banna bao ba bararo, ha ba ne ba ka ba teng ho lona, ka nna ya phelang, ho rialo Morena Jehova, ba ne ba ke ke ba namolela bara, kapa baradi ba bona; ba ne ba tla inamolela ba nnotshi; haele lefatshe, le ne le tla nne le senyehe. ₁₇Leha ke be nka tlisa lerumo lefatsheng lena, ka re: Lerumo a le ke le tsamaye le lefatshe, ka ba ka kgaola batho le dikgomo teng, ₁₈le hoja banna bao ba bararo ba ne ba ka ba teng ho lona, ka nna ya phelang, ho rialo Morena Jehova, ba ne ba ke ke ba namolela bara, kapa baradi ba bona, ba ne ba tla inamolela ba nnotshi. ₁₉Leha ke be nka neela lefatshe lena lefu la sewa, ka le tshollela kgalefo ya ka ho fihlela madi a tsholoha, hore ke tle ke kgaole batho le dikgomo teng, ₂₀Nowe, Daniele le Jobo ba ntse ba le ho lona, ka nna ya phelang, ho rialo Morena Jehova, ba ne ba ke ke ba namolela bara le baradi ba bona; haele bona, ba ne ba tla namolela meya ya bona ka ho loka ha bona.

₂₁Hobane Morena Jehova o re: Etlare hobane ke neele dikahlolo tsena tsa ka tse mpe tse nne, e leng lerumo, le tlala, le dilalome tse bohale, le lefu la sewa, ho wela Jerusalema, hore ho kgaolwe batho le dikgomo teng, ₂₂bonang, leha ho le jwalo, ho tla siuwa teng ba phonyohileng, e leng bara le baradi ba tlang ho ntshetswa kantle; bonang, ba tla tswela ho tla ho lona, mme le tla bona metsamao le mesebetsi ya bona, le tshedisehe bakeng sa bobe bohle boo ke bo tlisetsang Jerusalema, e leng tsohle tseo ke mo tlisetsang tsona. ₂₃Ba tla le tshedisa, hobane le tla bona metsamao le mesebetsi ya bona, le tle le tsebe hoba hase feela ha ke mo etsa tsohle tseo ke mo etsang tsona: ho rialo Morena Jehova.